ʻOku ou Faʻa Fai ʻa e Ngaahi Meʻa Kotoa pē ʻia Kalaisi

ʻOku vahevahe ʻe he toʻutupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻa (vakai, Filipai 4:13).

Te Tau Lava ʻo Fakatomala

talavou

Neongo naʻe papitaiso au ʻi hoku taʻu valú, ka naʻe ʻikai ke u fai maʻu pē ʻa e ngaahi meʻa ʻoku totonú. ʻI heʻeku kei taʻu hongofulu tupú, naʻe kamata ke u feohi mo ha kulupu ʻo ha tamaiki tangata, pea kamata ke mau fai ha ngaahi tōʻonga naʻá ku ʻiloʻi naʻe ʻikai lelei.

Hili e mali hoku tuofefiné, naʻá ne tokoniʻi au ke u foki mai ʻo mālohi ʻi he Siasí. Naʻá ku ako fekauʻaki mo e mahuʻinga ʻo e Lea ʻo e Potó mo hono tauhi lelei hoku sinó.

Ka ʻi ha ʻaho ʻe taha, naʻá ku toe fakahoko ai ha angahala mamafa. Naʻá ku ongoʻi he ʻikai ke u lava ʻo maʻu ʻa e Laumālié pe ko e mālohi ʻo e lakanga fakataulaʻeikí. Naʻá ku ongoʻi naʻe ʻikai ʻaupito haʻaku mahuʻinga pea naʻe ʻikai ke u fakakaukau te u lava ʻo fakakakato hoku ngaahi fatongia ʻi he lotú, hangē ko hono tāpuakiʻi mo tufaki ʻo e sākalamēnití.

Ka naʻe akoʻi au ʻe he ongoongoleleí te tau lava maʻu pē ʻo fakatomala. Naʻe faingataʻa ke u ʻalu ʻo sio ki heʻeku pīsopé mo vete ʻeku angahalá. Naʻe faingataʻa ke u ʻiloʻi ne lava ʻa e kakaí ʻo sio mai kiate au ʻi heʻeku hū atu ki he ʻōfisi ʻo e pīsopé. Ka naʻá ku fiemaʻu ʻa e melino ʻa e ʻEikí, pea naʻá ku fie fakatomala.

Naʻe fai ʻe heʻeku pīsopé haʻama lotu peá ne talamai ʻoku ʻaloʻofa maʻu pē ʻa e ʻEikí kiate kinautolu ʻoku feinga ke fakatomalá pea te u lava ʻo fakaakeake mei heʻeku fehalaākí. Kuó u kamata ʻeni ke lau e folofolá mo lotu, pea ʻoku ou ʻiloʻi ʻoku tokoni ia ke u matuʻuaki e ʻahiʻahí.

Kapau ʻoku faingataʻa ʻa e founga ʻo e fakatomalá kiate koe, ʻoku totonu ke ke manatuʻi maʻu pē ʻa e meʻaʻofa ʻa Sīsū Kalaisí mo ʻEne Fakalelei fakaofó. ʻOku tau faiangahala kotoa mo fai ha ngaahi fehalaaki, pea he ʻikai ke tau maʻu ʻa e haohaoá ʻi he moʻuí ni. Ka te tau lava maʻu pē ʻo fakatomala ʻi he Fakalelei ʻa Sīsū Kalaisí mo e taʻataʻa naʻá Ne lilingi maʻatautolú. Te tau lava ʻo laka atu ki muʻa ki he haohaoá ʻi he tokoni ʻa e ʻEikí.

Kenneth B., Tonga