“Mateuteu ke Hoko ko ha Faifekau,” Ki Hono Fakamālohia ʻo e Toʻutupú, Māʻasi 2023.
Mateuteu ke Hoko ko ha Faifekau
ʻOkú ke ʻiloʻi fēfē kuó ke mateuteu ke ngāue fakafaifekaú?
Kuo fakamanatu mai ʻe Palesiteni Lāsolo M. Nalesoni ʻa e mahuʻinga ʻo e ngāue fakafaifekaú pea kuó ne poupouʻi ʻa e kau talavoú mo e kau finemuí ke nau teuteu ke ngāue.1 ʻOku fiemaʻu ʻa e ngāué ʻi he faifekau taimi kakató, ka ʻoku pehē pē foki ʻa e feinga ki aí!
ʻOku faʻa ongoʻi lōmekina he taimi ʻe niʻihi ʻa e teuteu ngāue fakafaifekaú koeʻuhí he ʻoku hangē ʻoku lahi fau e ngaahi meʻa ke faí:
“ʻOku fiemaʻu ke u tānaki ha paʻanga.”
“ʻOku totonu ke u ako ʻa e Malangaʻaki ʻEku Ongoongoleleí.”
“ʻE fēfē haʻaku feimeʻatokoni pe fai ʻeku foó?”
“ʻOku totonu ke u fokotuʻu ha ʻapoinimeni mo ʻeku pīsopé.”
“ʻOku ou loto-toʻa feʻunga nai ke vahevahe ʻa e ongoongoleleí?”
ʻOku ʻaonga e ngaahi fakakaukau mo e hohaʻa ko ʻení. Ka neongo ia, ko e lelei tahá ke tokanga taha ki he ʻuhinga totonu hoʻo ngāué.
Ko Hoʻo ʻUhingá
ʻOku ʻaonga ke ke fehuʻi pē kiate koe: “Ko e hā e ʻuhinga ʻoku ou fie ʻalu ai ʻo ngāue fakafaifekaú?”
Mahalo te ke ongoʻi hangē ko ho fatongiá ia. Mahalo ʻokú ke fiefia ke nofo ʻi ha feituʻu foʻou pe ako ha lea fakafonua foʻou. Mahalo ʻokú ke fie vahevahe hoʻo fakamoʻoni ki he Fakalelei ʻa Sīsū Kalaisí pe tokāteline ʻo e fāmili taʻengatá. Pe ʻokú ke tui hangē ko e lea ne fai ʻe Palesiteni Nalesoní, “ʻe fiemaʻu ʻe he taha kotoa pē ha faingamālie ke ne ʻilo fekauʻaki mo e ongoongolelei ʻo Sīsū Kalaisi kuo fakafoki maí.”2
ʻOku lelei ange ha ngaahi ʻuhinga ʻe niʻihi ʻo e ngāue fakafaifekaú ʻi ha [ngaahi ʻuhinga] kehe, pea ʻoku lahi hake he ʻuhinga lelei ʻe tahá ke ʻalu aí. ʻOku totonu ke aofangatuku hono fakatefito hoʻo ngaahi ʻuhingá ʻi hoʻo ʻofa ki he ʻEikí mo ʻEne ongoongolelei kuo fakafoki maí. Fakakaukau ki hoʻo ngaahi ʻuhingá pea kapau te nau tokoni atu ke ke tauhi ki he ʻEikí “ʻaki homou lotó, iví, ʻatamaí, mo e mālohí kotoa” (Tokāteline mo e Ngaahi Fuakava 4:2). Pea kapau ʻoku ʻikai ke ke maʻu ʻa e holi [ke ngāue fakafaifekaú], te ke lava ʻo lotu ki he Tamai Hēvaní ke tokoni atu ke ke maʻu ia.
Ko Hoʻo Fakamoʻoní.
“ʻOku ʻi ai haʻaku fakamoʻoni ki he ongoongolelei ʻo Sīsū Kalaisí? Pea ʻoku ou tui moʻoni nai kuó Ne ui au ke u ngāue?”
Ko e taumuʻa ʻa e faifekaú ke fakaafeʻi e niʻihi kehé ke haʻu kia Kalaisi. Kapau ʻokú ke fakaafeʻi e kakaí ke nau ako fekauʻaki mo Sīsū Kalaisi mo ʻEne ongoongoleleí, ʻoku mahuʻinga ke ʻi ai haʻo fakamoʻoni pē ʻaʻau.
ʻOku ʻikai fiemaʻu ia ke haohaoa hoʻo fakamoʻoní; ʻe ʻi ai maʻu pē ha ngaahi faingamālie ke fakatupulaki ia. Ko e meʻa ʻoku mahuʻinga tahá ko e makatuʻungá: ko Sīsū Kalaisi. Te ke lava ʻo ʻiloʻi Ia ʻiate koe pē ʻaki haʻo ako ʻEne folofolá ʻi he ngaahi folofolá, lotu ki he Tamai Hēvaní ʻi Hono huafá, mo feinga ke moʻui ʻo hangē ko Iá.
ʻOku ʻikai ʻuhinga ʻa e hoko ko ha faifekau maʻongoʻongá ʻoku lelei maʻu pē hoʻo talanoa ki he kakaí pe ako maʻuloto ʻa e folofola kotoa pē (neongo te ke lava maʻu pē ʻo feinga ke fakaleleiʻi hoʻo ngaahi taukeí). Kapau te ke falala ki he ʻEikí, tui kiate Ia, mo loto-fiemālie ke fai ʻEne ngāué, te Ne fakalahi hoʻo ngaahi feingá mo tokoni ke ke hoko ko ha faifekau lelei.
Ko Hoʻo ʻEnitaumeni Fakatemipalé
“ʻOku ou ongoʻi mateuteu ke ʻalu ki he temipalé.”
Kimuʻa peá ke ngāue fakafaifekaú, mahalo te ke maʻu hoʻo ʻenitaumení ʻi he temipalé kapau kuo teʻeki ke ke fai ia.
Ko e ngaahi tāpuaki ʻo e temipalé ko ha “tafaʻaki mahuʻinga ʻo e teuteu ki ha ui ki he ngāué, ka ʻoku ʻikai faʻa fakatokangaʻi.” Pea “ko e moʻui taau fakafoʻituituí ko e fiemaʻu mahuʻinga taha ia ki hono maʻu e ngaahi tāpuaki ʻo e temipalé.”3 ʻI hoʻo teuteu mo moʻui taau ke ʻalu ki he temipalé ʻo fakahoko ha ngaahi fuakava toputapu mo e ʻOtuá, te ke teuteu foki ai ke ke hoko ko ha faifekau Maʻana (vakai, Tokāteline mo e Ngaahi Fuakava 105:33; 109:22).
Te ke lava ʻo kau ʻi ha kalasi teuteu ki he temipalé. Ka ʻi he taimi tatau, te ke lava ʻo ako mo e teuteu ʻiate koe pē. Kuo fokotuʻu mai ʻe Palesiteni Nalesoni ha ngaahi potufolofola mo ha ngaahi tefito pau ʻo e ongoongoleleí te ke lava ʻo ako ai fekauʻaki mo e temipalé.4 Te ke lava foki ʻo ako lahi ange ʻi he temples.ChurchofJesusChrist.org.
Moʻui Taau mo Mateuteu
ʻOku lahi ʻa e ngaahi tafaʻaki ʻo e teuteu ki he ngāue fakafaifekaú. ʻIo, ʻoku totonu ke ke tānaki ha paʻanga, tauhi koe ke ke moʻui lelei fakatuʻasino, pea ako e ngaahi tefitoʻi taukei hangē ko hono monomono ʻo e valá pe feimeʻatokoní. Te ke kei lava pē ʻo maʻu ʻa e ngaahi taumuʻa ko iá.
Kae ʻoua naʻa tuku ke lōmekina koe ʻe he ngaahi fakaikiikí. Ko e teuteu mahuʻinga taha te ke lava ʻo faí ko e faʻahinga teuteu ʻokú ne fakaʻatā koe ke ke hoko ko ha meʻangāue taau mo lelei ʻi he toʻukupu ʻo e ʻEikí.
Kapau ʻokú ke ongoʻi taʻefeʻunga, mafasia, pe taʻepauʻia ʻi he ngāué, ʻoku fakanatula pē ia. Manatuʻi ʻoku finangalo ʻa e ʻEikí ke ke lavameʻa! ʻI hoʻo falala kiate Ia mo muimui ki he fakahinohino ʻa e Laumālié, te Ne tokoniʻi koe ke ke teuteu ke hoko ko e faifekau lelei taha te ke ala lavá.