“ʻOku vaʻinga kumi monūʻia hoku ngaahi kaungāmeʻá. ʻOku ou ʻilo ʻoku hala ia. Te u fakamatalaʻi fēfē ange ia kiate kinautolu?,” Ki Hono Fakamālohia ʻo e Toʻutupú, Māʻasi 2023.
ʻAi Hangatonu
ʻOku vaʻinga kumi monūʻia hoku ngaahi kaungāmeʻá. ʻOku ou ʻilo ʻoku hala ia. Te u fakamatalaʻi fēfē ange ia kiate kinautolu?
ʻOku ʻuhinga ʻa e vaʻinga kumi monūʻiá ki hono tuku ʻo e paʻangá ʻi ha tuʻunga fakatuʻutāmaki ʻo e ngaahi vaʻinga faingamālié pe ko e peti ʻi ha ngaahi ola. “ʻOku fakafepakiʻi mo faleʻi ʻe he Siasí ke taʻofi ha faʻahinga tuʻunga pē ʻo e vaʻinga kumi monūʻiá. ʻOku kau heni ʻa e peti paʻanga he sipotí mo e ngaahi lulu ʻoku fakalele ʻe he puleʻangá” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.8.17, ChurchofJesusChrist.org).
ʻOku tau fakaʻehiʻehi mei he vaʻinga kumi monūʻiá koeʻuhí ko ha ngaahi ʻuhinga kehekehe pē. ʻOku ʻikai ngata pē heʻene maumauʻi e taimí mo e paʻangá, ka te ne toe lava foki ke maumauʻi e moʻui ʻa e kakaí. ʻE lava ke hoko ia ko ha meʻa ke te ʻāvea aí, ʻo aʻu pē ki hano maʻunimā kita.
ʻIkai ngata aí, ʻoku akoʻi mai ʻe he vaʻinga kumi monūʻiá te ke lava ʻo maʻu ha meʻa taʻe ngāueʻi. Ko ha fakakaukau fakatuʻutāmaki mo hala ia. Ko e ikuna ʻi he vaʻinga kumi monūʻiá ʻoku ngali ʻikai malava pea taʻefalalaʻanga. Ko e lavameʻa kuó ke ngāue ki aí ʻoku fakafiemālie, falalaʻanga, mo tolonga fuoloa ange ia.
Kapau ʻoku ʻi ai haʻo ngaahi kaungāmeʻa ʻoku vaʻinga kumi monūʻia, te ke lava ʻo feinga ke tokoniʻi kinautolu. Te ke lava ʻo talaange—pea ko e meʻa mahuʻinga angé, ko hono fakahaaʻi ange—ʻoku ʻi ai ha ngaahi founga lelei ange ke fakaʻaongaʻi ai ho taimí mo e paʻangá. Te ke lava ʻo fakahaaʻi ange ʻoku lelei ange ʻa e moʻuí ʻi he taimi ʻoku ʻikai ke ke tuʻu laveangofua ai hoʻo paʻangá mo e tuʻunga leleí ʻi ha ʻulungaanga ʻokú ne ʻomi ʻa e taʻe-pauʻiá mo e mamahí ki ha kakai tokolahi.