“‘E founga fēfē haʻaku tokoniʻi lelei ange hoku ngaahi kaungāmeʻa ʻoku māmālohi ʻi he Siasí ke fakamālohia ʻenau fakamoʻoní?,” Ki Hono Fakamālohia ʻo e Toʻutupú, Māʻasi 2023.
Ngaahi Fehuʻí mo e Talí
“‘E founga fēfē haʻaku tokoniʻi hoku ngaahi kaungāmeʻa ʻoku māmālohi ʻi he Siasí ke fakamālohia ʻenau fakamoʻoní?”
Hoko ko ha Tāpuaki ki he Niʻihi Kehé
“ʻI he taimi ʻoku ou feinga ai ke tokoniʻi ha kaungāmeʻa ke fakamālohia ʻene fakamoʻoni fakatāutahá, ʻoku ou feinga ke hoko ko ha tāpuaki mo e poupou ʻi heʻene moʻuí. ʻOku ou feinga ke hoko ko ha faʻifaʻitakiʻanga mo fakahaaʻi kiate ia ʻe lava ʻe he ongoongolelei ʻo Kalaisí ʻo fakamālohia ʻene anga fakakaungāmeʻá mo e ngaahi vā fetuʻutaki fakafāmilí kapau te ne feinga ke talangofua mo angatonu. ʻOku ou saiʻia ke tokoniʻi ia ke ne ongoʻi ʻoku ʻofaʻi ia.”
Selina O., 19, Polivia
Fakaafe Maʻu Pē
“Te ke lava ʻo akoʻi hoʻo ngaahi kaungāmeʻá ki he ʻofa mo e ʻaloʻofa ʻa Sīsū Kalaisí pea mo e founga te Ne lava ʻo tokoniʻi ai kinautolú. Fakaafeʻi kinautolu ke mou ō ki he lotú pea mou ō ki he ngaahi kalasi ʻa e toʻutupú. ʻE lava ke tokoni ʻeni kiate kinautolu ke fakatupulaki ha fakamoʻoni mālohi kia Sīsū Kalaisi.”
Shara R., 12, Kolomupia
Tomuʻa Hoko ko Honau Kaungāmeʻa
“ʻOku ou feinga maʻu pē ke fakakau mai mo fakapapauʻi ʻoku ʻiloʻi ʻe hoku ngaahi kaungāmeʻá ʻoku ou fakakaukau kiate kinautolu. ʻOku ou ʻilo te u lava ʻo hoko ko ha maama kiate kinautolu ʻi heʻeku tauhi homau vā fakaekaungāmeʻá mo e ʻofá. Te u lava ʻo fakaafeʻi hoku ngaahi kaungāmeʻá ki he ngaahi ʻekitivitī ʻa e Siasí, ka ʻoku ou ʻuluaki hoko maʻu pē ko honau kaungāmeʻa moʻoni. ʻE fakamālohia ʻe hoʻo ngaahi kaungāmeʻá ʻenau fakamoʻoní ʻi heʻenau mamata ki hoʻo tā sīpinga ʻofá mo e feohi fakaekaungāmeʻa fakalotolahí.”
Mia D., 19, Fololita, ʻIunaiteti Siteiti ʻo ʻAmeliká
ʻE Tokoniʻi Koe ʻe Kalaisi
“ʻE lava pē ke faingataʻa ke ʻi ai ha ngaahi kaungāmeʻa māmālohí, ka ʻoku ou saiʻia ke fakaafeʻi hoku ngaahi kaungāmeʻá ki ha ʻekitivitī fakafiefia ʻa e toʻutupú pe ki he lotú ʻi he taimi ʻoku ou fai ai ha malangá. Kapau ʻoku nau fakahaaʻi ʻoku nau fieʻilo ki ai, ʻoku ou ʻoange kiate kinautolu ʻa e Tohi ʻa Molomoná mo ʻeku fakamoʻoní pea mo ha ngaahi veesi makehe kiate au kuo ʻosi fakaʻilongaʻi. Manatuʻi, ʻe tokoniʻi koe ʻe Kalaisi ʻi ha faʻahinga tūkunga pē.”
Elizabeth B., 15, Fololita, ʻIunaiteti Siteiti ʻo ʻAmeliká
Angaʻofa Pē
“Naʻá ku fai e fehuʻi ko ʻení ki heʻeku faiako seminelí. Naʻá ne pehē mai, ʻAngaʻofa pē, Soatani. Kuó ke ʻosi fai ʻe koe e meʻa totonú.ʼ Naʻá ku fakakaukau ʻi he kamataʻangá, ʻʻOku ʻikai feʻunga pē ʻa e angaʻofá.ʼ Ka naʻá ku fakakaukau ki hoku kaungāmeʻa naʻá ne fiemaʻu ʻeku feohi fakaekaungāmeʻá mo ʻeku faʻifaʻitakiʻangá. Naʻe tokoniʻi au ʻe he Laumālié ke u angaʻofa mo ʻiloʻi e meʻa ke u lea ʻakí. ʻI he taimi ní, ʻokú ne fie papitaiso ʻi ha ʻaho!”
Jordan S., 17, ʻIutā, ʻIunaiteti Siteiti ʻo ʻAmeliká