ʻOku ou Faʻa Fai ʻa e Ngaahi Meʻa Kotoa pē ʻia Kalaisi

ʻOku vahevahe ʻe he toʻutupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).

ʻOku ʻAfioʻi ʻe he Fakamoʻuí ʻa e Founga ke Tokoniʻi ai Au lolotonga e Kanisaá

finemui

Ne u moʻui angamaheni pē kae ʻoua kuo aʻu ki he faʻahitaʻu momoko ʻo e 2020. Naʻá ku puke ʻi he meʻa naʻa mau pehē ko ha mahaki pipihi, ko ia naʻá ku folo hokohoko ha ngaai foʻiʻakau ʻenitipaiōtiki. Kimui ange aí, naʻe kamata ke u ongoʻi ne toutou langa hoku ʻulú, helaʻia, mo u ongoʻi pongia. Ne ʻikai fuoloa mei ai kuó u ʻā hake ʻi he 10 p.m. ʻo fakakaukau kuo pongipongi pea kamata ke u teuteu ki he akó.

ʻI he taimi naʻe talamai ai ʻe hoku taʻoketé ʻoku kei poʻulí, ne u lele ki he loki ʻo ʻeku ongomātuʻá mo e ongoʻi manavahē. Ne fā ʻeku faʻeé ki hoku ʻulú, pea naʻá ku mofi lahi ʻaupito. Naʻá ma ō ki he toketaá he ʻaho hono hokó, ʻa ia naʻá ne fai ha ngaahi sivi lahi.

Naʻe haʻu ʻeku ongomātuʻá ki hoku lokí he pō ko iá mo e tangí. Naʻá na talamai ʻoku ou maʻu ʻa e kanisā totó pea kuo pau ke mau ō ki ha falemahaki ke maʻu ha ngaahi tali lahi ange. Naʻá ku ʻi he loki fiemaʻu tokoni fakavavevavé he poó kakato pea kamata ai pē ʻeku faitoʻo kimó ʻi ha ngaahi ʻaho siʻi pē mei ai.

ʻE hokohoko atu hoku faitoʻó ʻi ha taʻu ʻe taha pe ua, ka kuo lava eni ke tokangaʻi lelei ange ia. Kuó u ongoʻi lelei ange kimuí ni mai pea ʻoku ou ʻamanaki ʻe vave pē haʻaku toe ʻalu ki he akó. Ka neongo ia, ʻoku ʻikai ke faingofua. ʻOku lahi e ngaahi nunuʻa ʻo e kimó, kau ai ha palopalema ki he huí ʻoku ui ko e avascular necrosis (mate ʻa e tisiū ʻo e huí ʻi he ʻikai maʻu ha totó) ʻa ia ʻoku faingataʻa ai ke u luelue.

finemui ʻi ha falemahaki

Neongo ʻa e ngaahi meʻa kotoa kuo hokó—mahalo pē na koeʻuhí ko ia—kuó u tupulaki ʻo ofi lahi ange ki heʻeku Tamai Hēvaní. Kuó u maʻu ʻeni ha mahino lahi ange ki he Fakalelei ʻa Sīsū Kalaisí. Naʻá ku faʻa fakakaukau ko ʻEne Fakaleleí ko ha meʻa pē ia naʻá ke fiemaʻu ʻi he taimi naʻá ke fai ai ha fehalaaki. Ko hano konga pē ia, ka ko e falala ki he Fakamoʻuí ko ha meʻa foki ia kuó ne tokoniʻi au ke siʻisiʻi ange ʻeku ongoʻi tuenoá.

Kuo toʻo ʻe Sīsū Kalaisi kiate Ia ʻa hotau ngaahi faingataʻaʻiá mo e angahalá, ʻa ia ʻoku ʻuhinga ia ʻokú Ne ʻafioʻi tonu pē ʻa e founga ke tokoniʻi au ʻi heʻeku aʻusia ʻa e kanisā totó. ʻE lava ke tau ongoʻi liʻekina ʻi ha faʻahinga faingataʻa pē, ka ʻi he Fakalelei ʻa Kalaisí, te tau lava ʻo maʻu ha fiemālie ʻi heʻetau ʻiloʻi ʻoku mahino moʻoni kiate Ia ʻa e meʻa ʻoku tau fouá.

Ruby H., ʻIutā, ʻIunaiteti Siteiti ʻo ʻAmeliká