“Andam na nga Mahimong usa ka Misyonaryo,” Alang sa Kalig-on sa mga Kabatan-onan, Mar. 2023.
Andam na nga Mahimong usa ka Misyonaryo
Unsaon nimo sa pagkahibalo nga ikaw andam na nga moserbisyo og misyon?
Si Presidente Russell M. Nelson mipahinumdom kanato sa kaimportante sa misyonaryo nga buhat ug miawhag sa batan-ong mga lalaki ug mga babaye sa pagpangandam alang sa pagserbisyo.1 Ang pagka full-time nga misyonaryo nagkinahanglan og buhat, apan mao usab ang pagkahimong usa niini!
Ang pagpangandam alang sa misyon usahay mabati nga bug-at tungod kay ingon og kini adunay daghan kaayong butang nga buhaton:
“Ako kinahanglan nga magtigom og kuwarta.”
“Ako kinahanglan nga magtuon sa Isangyaw ang Akong Ebanghelyo.”
“Unsaon nako sa pagluto o paglaba para sa akong kaugalingon?”
“Ako kinahanglan nga mohimo og appointment sa akong bishop.”
“Igo na ba ang akong kamasaligon nga mopaambit sa ebanghelyo?”
Kini nga mga hunahuna ug mga kabalaka mga balido. Hinoon, mas maayo nga makapokus sa mas dako nga katuyoan alang sa imong pagserbisyo.
Ang Imong Katarongan
Makatabang ang pagpangutana sa imong kaugalingon: “Nganong ako gusto nga moserbisyo og misyon?”
Tingali mibati ka nga kini imong katungdanan. Tingali mahinamon ka nga mopuyo og bag-ong dapit o magkat-on og bag-ong pinulongan. Basin gusto kang mopaambit sa imong pagpamatuod bahin sa Pag-ula ni Jesukristo o sa doktrina sa mahangtoron nga mga pamilya. O ikaw mituo, sama sa giingon ni Presidente Nelson, nga ang “tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo.”2
Ang pipila ka katarongan sa pagserbisyo og misyon mas maayo kay sa uban, ug adunay mas daghan pa kay sa usa ka maayo nga katarongan. Ang imong mga katarongan kinahanglang magsentro gayod diha sa imong gugma sa Ginoo ug sa Iyang gipahiuli nga ebanghelyo. Hunahunaa ang imong mga katarongan ug kon kini makatabang ba nimo nga makaserbsiyo sa Ginoo sa “tibuok nimo nga kasingkasing, gahom, hunahuna ug kusog” (Doktrina ug mga Pakigsaad 4:2). Ug kon ikaw walay tinguha, mahimo ka nga mag-ampo sa Langitnong Amahan aron matabangan ka nga makabaton niini.
Ang Imong Pagpamatuod
“Ako ba dunay pagpamatuod sa ebanghelyo ni Jesukristo? Ug ako ba tinuoray nga nagtuo nga Siya mitawag kanako nga moserbisyo?”
Ang katuyoan sa misyonaryo mao ang pagdapit sa uban sa pagduol ngadto kang Kristo. Kon ikaw nagdapit sa katawhan sa pagkat-on mahitungod ni Jesukristo ug sa Iyang ebanghelyo, importante ang pagbaton og imong kaugalingon nga pagpamatuod.
Ang imong pagpamatuod wala kinahanglana nga hingpit; sa kanunay adunay luna sa pagpalambo niini. Ang importante mao ang pundasyon: si Jesukristo. Ikaw makaila Kaniya sa imong kaugalingon pinaagi sa pagtuon sa Iyang mga pulong diha sa mga kasulatan, sa pag-ampo ngadto sa Langitnong Amahan pinaagi sa Iyang ngalan, ug pagpaningkamot nga magpuyo sama Kaniya.
Ang pagkahimong talagsaon nga misyonaryo wala magpasabot nga talagsaon kanunay ang imong pagpakigsulti ngadto sa mga tawo o mamemorya ang tanang kasulatan (bisan og kanunay kang makapaningkamot nga molambo ang imong mga kahanas). Hangtod nga mosalig ka sa Ginoo, motuo Kaniya, ug andam nga mohimo sa Iyang buhat, Iyang palamboon ang imong mga paningkamot ug tabangan ka nga mahimong usa ka epektibong misyonaryo.
Ang Imong Pagtuga diha sa Templo
“Mibati ba ko nga andam nga mosulod sa templo?”
Sa dili ka pa moserbisyo og usa ka misyon, malagmit makadawat ka sa imong pagtuga diha sa templo kon ikaw wala pa makahimo niini.
Ang mga panalangin sa templo mao ang “importante apan kanunayng mataligam-an nga aspeto sa pagpangandam alang sa tawag ngadto sa buhat.” Ug “ang personal nga katakos maoy labing importanting kinahanglanon aron madawat ang mga panalangin sa templo.”3 Samtang mangandam ka ug takos nga mosulod sa templo ug mohimo og sagradong mga pakigsaad sa Dios, ikaw usab nag-andam sa imong kaugalingon nga mahimong usa ka misyonaryo alang Kaniya (tan-awa sa Doktrina ug mga Pakigsaad 105:33; 109:22).
Sa kataposan, mahimo kang mokuha og klase alang sa pagpangandam sa templo. Apan sa pagkakaron, mahimo kang magtuon sa imong kaugalingon ug sa pagpangandam. Si Presidente Nelson mirekomendar og piho nga mga kasulatan ug mga hilisgotan sa ebanghelyo nga imong matun-an aron makat-on mahitungod sa templo.4 Makakat-on ka usab og dugang pa diha sa temples.ChurchofJesusChrist.org.
Takos ug Andam
Usab, dunay daghang aspeto sa pagpangandam sa misyon. Oo, kinahanglan ka nga magtigom og kwarta, mohimo sa imong kaugalingon nga haom sa pisikal, ug magkat-on sa sukaranang mga kahanas sama sa pagtarong sa mga sinina o pagluto. Ikaw mahimong aduna pa gihapon niana nga mga tumong.
Apan ayaw itugot nga ang mga detalye maghatag kanimo og kalisod. Ang labing importante nga pagpangandam nga imong mahimo mao ang butang nga magtugot nimo sa pagkahimong takos ug epektibong instrumento sa mga kamot sa Ginoo.
Kon mibati ka nga aduna pay kulang, naluya, o dili sigurado mahitungod sa pagserbisyo, natural lang kana. Hinumdomi lang nga ang Ginoo gusto nga molampos ka! Kon ikaw mosalig Kaniya ug mosunod sa giya sa Espiritu, Siya motabang nga ikaw maandam nga mahimong labing maayo nga misyonaryo kutob sa imong mahimo.