“Jesukristo: Kalinaw taliwala sa mga Unos,” Alang sa Kalig-on sa mga Kabatan-onan, Mar. 2023.
Dali, Sunod Kanako
Jesukristo: Kalinaw taliwala sa mga Unos
Adunay mga adlaw, nga bation nimo nga morag gikuso-kuso sa mga unos sa kinabuhi. Apan si Jesukristo adunay gahom sa paghatag nimo og kalinaw nga dili nimo makaplagan bisan asa.
Peace, Be Still [Hunong], ni Yong Sung Kim
Tunga-tunga sa tuig sa akong pagka-senior sa hayskul, nakadawat ko og dakong surprisa. Ang akong mga ginikanan gitawag aron mangulo sa Uruguay Montevideo Mission, nga nagpasabot nga mobalhin sila ngadto sa pikas bahin sa kalibotan uban sa akong upat ka manghod. Naglisod na gani ko mahitungod sa pagradwar sa hayskul, unya karon magkolehiyo ko nga mag-inusara, nga ang akong pamilya anaa sa laing kontinente. Nahadlok kaayo ko.
Ang akong pagbalhin gikan sa hayskul ngadto sa kolehiyo lisod kaayo alang nako. Bisan kon gilibotan ko og mabination nga mga kauban sa lawak ug liboan ka estudyante, gibati nako nga nag-inusara nga wala nako mabati sukad. Ang mga kalisod sa eskwelahan grabe kaayo. Wala ko kahibalo unsay akong gusto nga kurso ug nakita nga lisod kaayo ang mga klase. Nagsagubang usab ako og relasyon nga makamanipular sa emosyon, nga nakaapekto kaayo sa akong kahimsog sa pangisip. Gidaog ko sa akong kahadlok sa umaabot.
Wala madugay ang akong mga pagbati sa depresyon, kahadlok, ug pag-inusara ang nakapalisod sa paglihok. Bisan ang yano nga naandang buluhaton morag imposible. Usa ka buntag, nangayo ko sa Langitnong Amahan nga hatagan ko og kalig-on nga makasugakod sa tibuok adlaw. “Dili nako kaya nga magpadayon sa paghimo niini nga mag-inusara,” ako nag-ampo. Sa usa ka talagsaong gutlo sa kaklaro sa panghunahuna ug pagbati, ang mga pulong miabot sa akong hunahuna “Dili ka kinahanglang mag-inusara.” Ang kalinaw milukop sa akong hunahuna. Ang unos nga anaa sa akong hunahuna mihunong.
Ang sunod nga pipila ka bulan (ug katuigan) dili sayon. Ang akong mga pagbati og depresyon ug pag-inusara wala mawala dihadiha dayon. Apan sa unang higayon, akong nasabtan sa kinaugalingong paagi kon unsay ipasabot sa pagkaadunay usa ka Manluluwas. Ako nasayod nga Siya nakasabot sa akong mga hagit ug akong kasakit. Ako nasayod nga Siya lamang ang makatabang nako, ug Siya mihimo niini.
Mga katuigan ang milabay, usa na ko ka returned missionary, gradwado sa kolehiyo, ug malipayon nga naminyo. Ug ako nasayod nga dili unta nako makab-ot ang bisan unsa niadto nga mga tumong kon wala pa ko mosalig sa Ginoo.
Litrato gikan sa Getty Images
Hunong
Si Jesus natulog diha sa sakayan uban sa Iyang mga Apostoles sa dihang miabot ang usa ka dakong unos. Ang mga Apostoles mipukaw ni Jesus, nag-ingon, “Magtutudlo, wala ka ba mabalaka nga hapit na man kita malunod?” (Marcos 4:38). Dihadiha gayod nga naghunahuna sila nga mamatay na sila sa kusog nga unos, ang Ginoo mibangon ug “gipahunong ang hangin ug ang mga balod iyang giingnan, Hunong. Ug mihunong ang hangin, ug mibanos ang kalinaw” (Marcos 4:39).
Pila ka higayon sa imong kinabuhi nga naghunahuna ka, “Wala ka ba mabalaka nga hapit na man ako malunod?” Usahay, kon ikaw nagpakabuhi nga nagsugakod og lisod nga mga hagit, dali ra kaayo ang pagbati nga nag-inusara ug gipasagdan. Tingali naghunahuna ka kon nganong wala gipahunong sa Ginoo ang imong mga unos. Tingali mibati ka nga morag ang imong kinabuhi dili makakab-ot nianang “kalinaw” nga gihisgotan sa bersikulo 39.
Hinoon, ang importante nga bahin niini nga sugilanon mao ang baroganan nga gitudlo sa Manluluwas sa sunod. Siya miingon: “Nganong nalisang man kamo? Wala ba kamoy pagsalig?” (Marcos 4:40). Sa gutlo sa ilang kahadlok ug kawalay paglaom, ang Apostoles nakalimot kon kinsay ilang kuyog. Ang Anak sa Dios, nga naglalang mismo sa yuta, natulog sa ilang sakayan. Nganong nahadlok man sila?
Sa samang paagi, ang Manluluwas adunay gahom sa pagpahunong sa bisan unsa nga unos sa imong kinabuhi. Siya makaayo sa imong kasakit, makapagaan sa imong mga palas-anon, ug makahatag og kahayag kon ikaw anaa sa kangitngit. Ang imong bahin niini nga proseso mao ang paggamit og mas dakong hugot nga pagtuo diha ni Jesukristo.
Pagkaplag og Kalig-on gikan sa Ginoo
Ang pagpakabuhi uban sa naglambo nga hugot nga pagtuo makahatag og dugang nga gahom ni Kristo nganha sa imong kinabuhi. Sa dihang si Razafimalaza sa Madagascar padulong mahuman sa lisod nga tuig sa pag-eskwela, ang iyang iyaan namatay. Nasagmuyo siya. Nahimong hapit imposible nga makapokus atol sa pag-eskwela. Nangandam siya nga mokuha og kataposan nga mga eksamin nianang tuiga. Siya nag-ampo, “Palihog wagtanga ang akong kaguol ug hatagi ko og kalig-on sa pagtambong sa eksamin ugma.” Human sa pag-ampo, si Razafimalaza mibati nga nalig-on. “Gibati nako nga morag nakalimot sa akong kaguol,” siya miingon. “Ang Dios naghatag nako og kalig-on sa pagbuhat sa tanang butang.”
Importanting hinumdoman nga usahay ang Ginoo mopahunong sa mga unos sa imong kinabuhi, ug usahay Siya hinoon mopakalma ug mohupay nimo samtang ang unos nagpadayon. Kon ikaw adunay hugot nga pagtuo diha Kaniya, ikaw mosalig usab sa Iyang kabubut-on ug tukmang panahon. Motuo ka nga Siya motabang nimo, dili igsapayan kon kanus-a moabot ang imong kalinaw ug kakalma.
Pagsalig sa Iyang Tukmang Panahon
Ang usa ka batan-ong babaye nga ginganlan og Ann pamilyar sa makahadlok nga mga pagbati. “Nagsinati ko og grabe nga kahasol sa hunahuna ug mild ADHD,” siya miingon. “Usahay naghatag kini nako og pagbati nga wala masabti sa uban, ug naglisod nga magpadayon sa mahangtorong panglantaw. Bag-ohay lang nagbasa ko sa Genesis bahin ni Sara, nga naghulat og pipila ka dekada sa wala pa makabaton og anak. Nakaamgo ko nga tingali kinahanglang maghulat usab ako og dugayng panahon aron mamaayo. Nasayod ko nga si Kristo dili mopasagad nako kon nagsinati ko og kahasol sa hunahuna. Siya anaa aron motabang nako nga makasugakod niini.”
Ang pagpili nga mosalig sa Ginoo wala magpasabot nga imong ibaliwala ang grabe nga mga hagit sa imong kinabuhi. Hinoon, nagpasabot kini nga kinahanglan ka nga “motutok sa walay kinutobang kahalangdon, kaayo, ug hingpit nga gahom sa [imong] Dios, mosalig Kaniya … uban sa malipayong kasingkasing.”1 Kon ikaw nag-inusara, naguol, nahasol ang hunahuna, o naghulat sa gisaad nga mga panalangin, hinumdomi kini nga pangutana: Naghulat ka ba og “dakong kalinaw” uban sa mahadlokon nga kasingkasing o uban sa matinud-anong kasingkasing?