Ako Makahimo sa Tanan nga Butang pinaagi kang Kristo

Ang kabatan-onan nagpaambit kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Kita Makahinulsol

batan-ong lalaki

Bisan kon nabunyagan na ko niadtong otso anyos pa ko, wala ko magbuhat kanunay sa sakto nga mga butang. Sa dihang ten-edyer pa ko, nagsugod ko sa pagkuyog-kuyog sa grupo sa mga lalaki, ug nagsugod kami sa paghimo og mga butang nga kahibalo ko nga dili maayo.

Human sa pagkaminyo sa akong igsoong babaye, gitabangan ko niya nga mabalik sa Simbahan. Nakakat-on ko mahitungod sa kaimportante sa Pulong sa Kaalam ug sa pagtratar og maayo sa akong lawas.

Apan usa ka adlaw, nakahimo ko og laing dako nga sala. Mibati ko nga dili ko makabaton sa Espiritu o gahom sa pagkapari uban kanako. Mibati ko nga dili gayod takos ug naghunahuna nga dili makatuman sa akong mga responsibilidad sa simbahan, sama sa pagpanalangin ug pagpaambit sa sakramento.

Apan ang ebanghelyo nagtudlo kanako nga kita makahinulsol kanunay. Lisod kaayo nga moadto sa akong bishop ug mokompisal sa akong sala. Lisod kaayo nga makahibalo nga ang mga tawo makakita nako nga mosulod sa opisina sa bishop. Apan nagkinahanglan ko og kalinaw sa Ginoo, ug gusto ko nga maghinulsol.

Ang akong bishop nag-ampo uban nako ug miingon nako nga ang Ginoo maloloy-on sa kanunay niadtong nagtinguha sa paghinulsol ug nga ako makabangon ra gikan sa akong sayop. Nagsugod na ko karon sa pagbasa sa mga kasulatan ug pag-ampo, ug nasayod ko nga makatabang kini kanako nga mabuntog ang tentasyon.

Kon ang proseso sa paghinulsol lisod alang nimo, kinahanglan nimong hinumdoman kanunay ang gasa ni Jesukristo ug ang Iyang milagroso nga Pag-ula. Kitang tanan makasala ug makahimo og mga sayop, ug dili nato mabatonan ang pagkahingpit niining kinabuhia. Apan pinaagi sa Pag-ula ni Jesukristo ug sa dugo nga Iyang gipaagas alang kanato, kita makahinulsol kanunay. Uban sa tabang sa Ginoo, kita makapadayon paingon sa pagkahingpit.

Kenneth B., Tonga