“Ang akong mga higala mosugal. Ako nasayod nga sayop kini. Unsaon man nako pagpasabot niini ngadto nila?,” Alang sa Kalig-on sa mga Kabatan-onan, Mar. 2023.
Direkta sa Punto
Ang akong mga higala mosugal. Ako nasayod nga sayop kini. Unsaon man nako pagpasabot niini ngadto nila?
Ang pagsugal nagpasabot nga isugal ang kwarta sa mga dula nga walay kasiguroan o pustaanay sa mahimong mga resulta. “Ang Simbahan supak ug nagtambag batok sa sugal sa bisan unsa nga matang. Kini naglakip sa pustaanay sa mga sport ug loteriya nga gipasiugdahan sa gobyerno” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.8.17, ChurchofJesusChrist.org).
Kita molikay sa sugal tungod sa daghang rason. Dili lang kini pag-usik-usik sa panahon ug sa kwarta, apan makaguba usab kini sa kinabuhi sa mga tawo. Mahimo kining obsesyon, gani adiksiyon.
Usab, ang pagsugal nagtudlo nga makakuha ka og butang nga walay paghago. Usa kana ka makuyaw ug sayop nga pagtuo. Ang pagdaog sa sugal dili lagmit mahitabo ug dili kasaligan. Ang kalamposan nga imong gipaningkamotan mas makapatagbaw, masaligan, ug malungtaron gayod.
Kon ikaw adunay mga higala nga mosugal, ikaw mahimong mosulay sa pagtabang nila. Mahimo nimo silang sultihan—ug, labing importante, ipakita nila—nga adunay mas maayong paagi sa paggahin sa imong oras ug sa imong kwarta. Mahimo nimong ipakita nila nga ang kinabuhi mas maayo kon dili nimo isugal ang imong kwarta ug pagkatawo diha sa kalingawan nga nagdala og kawalay kasiguroan ug kaalaotan ngadto sa daghan kaayo nga mga tawo.