« តើខ្ញុំអាចជួយមិត្តភក្ដិរបស់ខ្ញុំ ដែលមិនសកម្មនៅក្នុងព្រះវិហារ ឲ្យពង្រឹងទីបន្ទាល់របស់ពួកគេបានយ៉ាងដូចម្តេច ? » ដើម្បីកម្លាំងនៃយុវជន ខែ មីនា ឆ្នាំ ២០២៣ ។
សំណួរ និង ចម្លើយ
« តើខ្ញុំអាចជួយមិត្តភក្ដិរបស់ខ្ញុំ ដែលមិនសកម្មនៅក្នុងព្រះវិហារ ឲ្យពង្រឹងទីបន្ទាល់របស់ពួកគេបានយ៉ាងដូចម្តេច ? »
ធ្វើជាពរជ័យដល់អ្នកដទៃ
« ពេលខ្ញុំព្យាយាមជួយមិត្តម្នាក់ឲ្យពង្រឹងទីបន្ទាល់ផ្ទាល់ខ្លួនរបស់គាត់ ខ្ញុំព្យាយាមធ្វើជាពរជ័យ និងការគាំទ្រមួយក្នុងជីវិតរបស់គាត់ ។ ខ្ញុំព្យាយាមធ្វើជាគំរូ និងបង្ហាញគាត់ថា ដំណឹងល្អរបស់ព្រះគ្រីស្ទអាចពង្រឹងមិត្តភាព និងទំនាក់ទំនងនៅក្នុងគ្រួសាររបស់គាត់បាន ប្រសិនបើគាត់ខិតខំគោរពប្រតិបត្តិ និងធ្វើជាមនុស្សសុចរិត ។ ខ្ញុំចូលចិត្តជួយគាត់ឲ្យមានអារម្មណ៍ថាគេស្រឡាញ់គាត់ » ។
សេលីណា អូ អាយុ ១៩ ឆ្នាំ ប្រទេសបូលីវី
អញ្ជើញជានិច្ច
« បងប្អូនអាចបង្រៀនមិត្តភក្ដិរបស់បងប្អូនអំពីសេចក្ដីស្រឡាញ់ និងសេចក្ដីមេត្តាករុណារបស់ព្រះយេស៊ូវគ្រីស្ទ និងរបៀបដែលទ្រង់អាចជួយពួកគេបាន ។ សូមអញ្ជើញពួកគេឲ្យទៅព្រះវិហារ និងចូលរួមក្នុងថ្នាក់យុវវ័យជាមួយបងប្អូន ។ ការណ៍នេះអាចជួយពួកគេឲ្យអភិវឌ្ឍទីបន្ទាល់ដ៏រឹងមាំមួយអំពីព្រះយេស៊ូវគ្រីស្ទបាន » ។
ស្សារ៉ា អរ អាយុ ១២ ឆ្នាំ ប្រទេសកូឡុំប៊ី
ធ្វើជាមិត្តភក្ដិរបស់ពួកគេជាមុនសិន
« ខ្ញុំតែងតែខំរាប់អាន និងធ្វើឲ្យប្រាកដថា មិត្តភក្ដិរបស់ខ្ញុំដឹងថា ខ្ញុំកំពុងគិតពីពួកគេ ។ ខ្ញុំដឹងថា ខ្ញុំអាចធ្វើជាពន្លឺមួយសម្រាប់ពួកគេបាន ពេលខ្ញុំរក្សាមិត្តភាព និងសេចក្ដីស្រឡាញ់របស់យើង ។ ខ្ញុំអាចអញ្ជើញមិត្តរបស់ខ្ញុំឲ្យមកសកម្មភាពក្នុងព្រះវិហារបាន ប៉ុន្ដែខ្ញុំតែងតែធ្វើជាមិត្តដ៏ពិតរបស់ពួកគេជាមុនសិនជានិច្ច ។ មិត្តរបស់បងប្អូននឹងពង្រឹងទីបន្ទាល់របស់ពួកគេ នៅពេលពួកគេឃើញគំរូពេញដោយក្ដីស្រឡាញ់ និងមិត្តភាពដ៏រឹងមាំរបស់បងប្អូន » ។
មៀអា ឌី អាយុ ១៩ ឆ្នាំ រដ្ឋផ្លរីដា ស.រ.អា.
ព្រះគ្រីស្ទនឹងជួយបងប្អូន
« វាអាចពិបាកដែលមានមិត្តភក្ដិដែលមិនសូវសកម្ម ប៉ុន្ដែខ្ញុំចូលចិត្តអញ្ជើញមិត្តខ្ញុំឲ្យមកសកម្មភាពយុវវ័យសប្បាយៗ ឬទៅព្រះវិហារពេលខ្ញុំឡើងនិយាយ ។ ប្រសិនបើពួកគេបង្ហាញចំណាប់អារម្មណ៍ នោះខ្ញុំឲ្យព្រះគម្ពីរមរមនទៅពួកគេ ដោយប្រាប់ពីទីបន្ទាល់របស់ខ្ញុំ និងគូសចំណាំខគម្ពីរ ដែលសំខាន់សម្រាប់ខ្ញុំ ។ សូមចាំថា ព្រះគ្រីស្ទនឹងជួយបងប្អូននៅក្នុងគ្រប់ស្ថានភាពទាំងអស់ » ។
អេលីហ្សាបែត ប៊ី អាយុ ១៥ ឆ្នាំ រដ្ឋផ្លរីដា ស.រ.អា.
គ្រាន់តែមានចិត្តល្អទៅបានហើយ
« ខ្ញុំបានសួរសំណួរនេះទៅកាន់គ្រូបង្រៀនថ្នាក់សិក្ខាសាលារបស់ខ្ញុំ ។ គាត់ឆ្លើយថា ‹ គ្រាន់តែមានចិត្តល្អទៅបានហើយ យ័រដាន់ ។ ប្អូនកំពុងធ្វើរឿងត្រឹមត្រូវហើយ › ។ ដំបូងខ្ញុំគិតថា ‹ ការគ្រាន់តែមានចិត្តល្អមិនគ្រប់គ្រាន់នោះទេ › ។ ប៉ុន្ដែក្រោយមក ខ្ញុំគិតដល់មិត្តរបស់ខ្ញុំ ដែលត្រូវការមិត្តភាព និងគំរូរបស់ខ្ញុំ ។ ព្រះវិញ្ញាណបានជួយខ្ញុំឲ្យមានចិត្តល្អ និងដឹងពីអ្វីដែលត្រូវនិយាយ ។ ឥឡូវ នាងចង់ជ្រមុជទឹកនៅថ្ងៃណាមួយ ! »
យ័រដាន់ អេស អាយុ ១៧ ឆ្នាំ រដ្ឋយូថាហ៍ ស.រ.អា.