Ko Hono Maʻu ʻo e Melino Fakatāutahá
Ngaahi Konga Fakamatala
Te u lea atu ʻi he ʻahó ni ki he meʻa naʻá ku ako ʻo kau ki he mana ʻo hono maʻu ʻo e melino fakatāutahá, neongo pe ko e hā hotau tūkungá. …
Naʻá ku ako ha foʻi moʻoni ʻe nima mei he akonaki ʻa e Fakamoʻuí.
ʻUluakí, ʻoku foaki mai ʻa e meʻa-foaki ʻo e melinó hili ʻetau maʻu ʻa e tui ke tauhi ʻEne ngaahi fekaú. …
Uá, ʻe haʻu ʻa e Laumālie Māʻoniʻoní ʻo nofo mo kitautolu. …
Tolú, ʻoku palōmesi mai ʻe he Fakamoʻuí te tau lava ʻo ongoʻi ʻa e feʻofaʻaki ʻa e Tamaí mo e ʻAló pea mo kitautolú, ʻi hono tauhi ʻetau ngaahi fuakavá. …
Faá, ʻoku fiemaʻu ha meʻa lahi ange ia ʻi he talangofuá ki hono tauhi ʻa e ngaahi fekau ʻa e ʻEikí. ʻOku fiemaʻu ke tau ʻofa ki he ʻOtuá ʻaki hotau lotó, mālohí, ʻatamaí, mo e lotó kotoa. …
Nimá, ʻoku mahino lelei naʻe feʻunga ʻa e ʻofa ʻa e ʻEikí ʻiate kitautolú ʻo totongi ai ʻetau ngaahi angahalá koeʻuhí ke tau lava ai ʻo maʻu ʻa e meʻa-foaki ʻo e melinó ʻa ia ʻoku “lahi hake ʻaupito ʻi he faʻa ʻiloá,” [Filipai 4:7], ʻi he moʻuí ni pea mo Ia ʻo taʻengata—makatuʻunga ʻi heʻetau tui kiate Iá mo ʻetau fakatomalá—ʻo fakafou ʻi he ngaahi lelei ʻo ʻEne Fakaleleí. …
Kuo ongoʻi ʻe he kāingalotu ʻo e Siasí ʻa e meʻaʻofa melino fakataautaha mei he ʻEikí. ʻOkú Ne fakalotolahiʻi ʻa e taha kotoa ke nau tokoniʻi ʻa e niʻihi kehé ke nau maʻu ʻa e faingamālie ke haʻu kiate Ia ʻo maʻu ʻa e melino tatau ko iá maʻanautolu. Pea te nau fili ke fekumi ki he tataki fakalaumālié ke ʻiloʻi ai ʻa e founga te nau lava ai ʻo ʻoatu ʻa e meʻa-foaki ko iá ki he niʻihi kehé.
Ko e toʻu tangata kei tupu haké te nau tokoniʻi ʻa e toʻu tangata hoko maí. ʻE hoko ha mana mei he ngāue lahi ʻa e toʻu tangata kei tupu haké. ʻE mafola pea tupulaki ʻi ha taimi, pea ʻe maau mo mateuteu ʻa e puleʻanga ʻo e ʻEikí ʻi he māmaní ke talitali lelei Ia ʻaki ʻa e kalanga hōsaná. ʻE maʻu ʻa e melinó ʻi he māmaní.