Fakaʻaongaʻi ʻa e Faingamālie Kotoa Pē ke Fakamoʻoniʻi ai ʻa Kalaisi
Ngaahi Konga Fakamatala
Neongo he ʻikai ke tau maʻu ʻa e fiefia fakatuʻasino tatau naʻe maʻu ʻe kinautolu naʻe ofi mo ʻaʻeva mo Kalaisi lolotonga ʻEne ngāue ʻi he māmaní, ka te tau lava ke aʻusia Hono mālohí ʻo fakafou ʻi he Laumālie Māʻoniʻoní ʻi he ʻaho kotoa pē! Te tau lava ʻo aʻusia ʻi he lahi taha ʻoku tau fiemaʻu ai Hono mālohí ʻi he ʻaho kotoa pē! …
… ʻOku tupulaki ʻetau ofi ange kia Kalaisí ʻi he moihū hokohoko ʻi he temipalé, fakatomala fakaʻahó, ako ʻa e ngaahi folofolá, ʻalu ki he lotú mo e seminelí, fakalaulauloto ki hotau tāpuaki fakapēteliaké, feʻunga mo taau ʻi hono maʻu ʻa e ngaahi ouaú, mo tauhi ʻa e ngaahi fuakava toputapú. ʻOku hanga ʻe he ngaahi meʻá ni kotoa ʻo fakaafeʻi mai ʻa e Laumālié ke ne fakamaama hotau ʻatamaí, pea ʻomi ha malu mo e hao lahi ange. Ka ʻoku tau tauhi nai kinautolu ko ha ngaahi faingamālie toputapu ke fakamoʻoniʻi ai ʻa Kalaisi? …
ʻOku ʻi ai ʻa e mālohi ʻi hono ngaohi ʻa e ngaahi tōʻonga toputapú ni ke ʻoua naʻa hangē pē ha lisi vakaiʻí, kae lahi ange ʻene hoko ko ha fakamoʻoní. Ko e ngāué ʻe fakahoko māmālie, ka ʻe tupulaki ia ʻi he fie kau atu fakaʻahó pea mo e ngaahi aʻusia mahuʻinga mo Kalaisí. ʻI heʻetau toutou fakaʻaongaʻi ʻEne akonakí, ʻoku tau maʻu leva ha fakamoʻoni kiate Ia; ʻoku tau fakatupulaki ha vā fetuʻutaki mo Ia mo ʻetau Tamai ʻi Hēvaní. ʻOku kamata leva ke tau hangē ko Kinauá.
ʻOku fokotuʻu ʻe he filí ha fakafeʻātungia lahi ke ne fakafaingataʻaʻiaʻi ʻa e fanongo ki he leʻo ʻo e ʻEikí. … ʻOku fiemaʻu ke tau maʻu ha ʻulungaanga fakaākonga mo ha fakamoʻoni ʻoku mahino moʻoni ai ʻa ʻetau falala ki hotau Fakamoʻuí ʻi he ʻaho takitaha.
… Kumi kia Kalaisi ʻi he feituʻu kotoa pē―pea ʻoku ou palōmesi atu ʻokú Ne ʻi ai! ʻOku makatuʻunga ʻa e fiefia moʻoní ʻi heʻetau loto-fiemālie ke ʻunu ʻo ofi ange kia Kalaisi pea mamata tonu.