“Nofo ʻiate Au, pea mo Au ʻiate Koe; Ko Ia Ke Ke ʻAʻeva mo Au”
Ngaahi Konga Fakamatala
“Naʻe folofola ʻa e ʻEikí kia ʻĪnoke: …
“… Te ke nofo ʻiate au, pea mo au ʻiate koe; ko ia ke ke ʻaʻeva mo au” [Mōsese 6:32, 34; tānaki atu hono fakamamafaʻí]. …
ʻOku fakahoko mai ʻe he ʻEiki ko Sīsū Kalaisí ha fakaafe kiate kitautolu takitaha ke nofo ʻiate Ia. Ka ʻoku founga fēfē nai ʻetau ako pea haʻu ʻo nofo ʻiate Iá?
ʻOku ʻuhinga ʻa e foʻi lea nofó ki he taʻefeliliuaki pe tuʻu maʻu mo kātaki kae ʻikai tukuloló. … Ko ia, ʻoku tau nofo ʻia Kalaisi ʻi heʻetau taʻefeliliuaki mo tuʻu maʻu ʻi heʻetau līʻoa ki he Huhuʻí mo ʻEne ngaahi taumuʻa māʻoniʻoní, ʻi he ngaahi taimi leleí mo ʻikai leleí fakatouʻosi.
ʻOku kamata ke tau nofo ʻi he ʻEikí ʻi hono fakaʻaongaʻi ʻetau tauʻatāina ke filí ke toʻo kiate kitautolu ʻEne haʻamongáʻo fakafou ʻi he ngaahi fuakava mo e ngaahi ouau ʻo e ongoongolelei kuo fakafoki maí. …
ʻOku tau nofo ʻiate Ia ʻi heʻetau keinanga moʻoni ʻi he ngaahi folofola ʻa Kalaisí. …
ʻOku tau nofo ʻiate Ia ʻaki ʻetau teuteu fakamātoato ke kau ʻi he ouau ʻo e sākalamēnití. …
ʻOku liunga ua e talaʻofa ʻa e Fakamoʻuí ki Hono kau muimuí: kapau te tau nofo ʻiate Ia, te Ne nofo ʻiate kitautolu. Ka ʻoku malava moʻoni nai ʻa Kalaisi ʻo nofo ʻiate koe mo au—fakafoʻituitui mo fakataautaha? ʻOku ʻikai toe fehuʻia ʻa e tali ʻio ki he fehuʻi ko ʻení! …
… Ko e fetuʻutaki fakafuakava ʻoku tau maʻu mo ʻetau Tamai Hēvaní pea mo Hono ʻAlo toetuʻu mo moʻuí, ko e maʻuʻanga tokoni fakalangi ia ʻo e fakakaukaú, ʻamanaki leleí, mālohí, melinó, mo e fiefia tuʻuloá …
… ʻOku ou fakamoʻoni ko e talaʻofa ko ia ʻa e Fakamoʻuí ke nofo ʻiate kitautolú ʻoku moʻoni pea ʻatā ia ki he mēmipa tauhi fuakava kotoa pē ʻo Hono Siasi kuo fakafoki maí. …
… Kapau te tau nofo ʻiate Ia, te Ne nofo ʻiate kitautolu.