Ko e Ngāue Fakaetauhí
Ngaahi Konga Fakamatala
ʻI heʻetau hoko ko e kau muimui ʻo Sīsū Kalaisí, ʻoku tau ako ke ngāue fakaetauhi ki he niʻihi kehé ʻo hangē ko Iá koeʻuhí he ʻoku tatali mai ha ngaahi moʻui ke liliu. …
ʻOku ou houngaʻia ʻi he feituʻu kotoa pē ʻoku ou ʻalu ki aí, ke ako meiate kinautolu ʻoku ngāue fakaetauhi mo tokanga ʻo hangē ko hotau Fakamoʻuí. …
ʻOku hoko ʻa e ngāue fakaetauhi māʻolunga mo toputapu angé ʻi heʻetau lotu ke maʻu “e ʻofa haohaoa ʻa Kalaisí” [vakai, Molonai 7:47–48] pea muimui ʻi he Laumālié. …
… ʻOku lahi ʻa e ngaahi feituʻu, te tau lava ke fai ai ha tokoni, ʻiloʻi lelei ʻa e feituʻu ʻoku ʻi ai ʻa e niʻihi kehé, mo langa hake ha vā fengāueʻaki ʻi heʻetau toutou ʻaʻahi ki he kāingalotú ʻi honau ngaahi ʻapí. ʻOku liliu moʻui ʻa e ngaahi fakaafe ʻoku tataki fakalaumālié. ʻI he taimi ʻoku tokoniʻi ai kitautolu ʻe he ngaahi fakaafé ke tau fai mo tauhi ʻa e ngaahi fuakava toputapú, ʻoku tau ʻunu ai ʻo ofi ange ki he ʻEikí mo e niʻihi kehé. …
ʻOku tāpuekina ʻe he ngāue fakaetauhi ʻoku tataki fakalaumālié ʻa e ngaahi fāmilí mo e niʻihi fakafoʻituituí; peá ne toe fakamālohia ʻa e ngaahi uōtí mo e koló. …
Ko e Fakamoʻuí ʻa hotau faʻifaʻitakiʻanga haohaoá. Koeʻuhí ko ʻEne angaleleí, ʻokú Ne lava ai ʻo ʻaʻeva holo ʻo fai lelei. Naʻá Ne tāpuekina ʻa e tahá mo e 99. ʻOku mahino mei Heʻene ngāué ʻene finangalo ke ngāue fakaetauhi ki he taha kotoa.
ʻOku ngāue fakaetauhi ʻa Sīsū Kalaisi. ʻOku ngāue fakaetauhi ʻa e kau ʻāngeló. … ʻI heʻetau ngāue fakaetauhi ʻo hangē ko Iá, te tau mātā tonu leva ʻEne ngaahi maná, mo ʻEne ngaahi tāpuakí. …
Tatau ai pē pe ʻoku tau ʻi fē, tuku ke tau ala atu ʻo tokoni mo ʻofa ʻo hangē ko hotau Fakamoʻuí, tautefito kiate kinautolu ʻoku tau faingamālie ke ʻofa mo ngāue fakaetauhi ki aí. ʻI hono fai iá, ʻofa ke tau ofi ange ai kia Sīsū Kalaisi mo e niʻihi kehé, hoko ʻo hangē ange ko Iá mo e [kau muimui ʻo Sīsū Kalaisi ʻokú Ne] finangalo ke tau takitaha aʻusiá.