ʻOkú Ke ʻIlo Nai ʻa e ʻUhinga ʻoku Ou Tui ai ko ha Kalisitiane kia Kalaisí?
Ngaahi Konga Fakamatala
ʻI ha efiafi ʻe taha ʻi he tuku ʻa e ngāué ʻi he ngaahi taʻu kuo hilí, naʻá ku heka ʻi heʻeku pasi angamahení ke u foki ki ʻapi ki Niu Sēsī mei Niu ʻIoke Siti. Naʻe fakatokangaʻi ʻe he fefine naʻá ma tangutú ʻa e meʻa naʻe tohi ʻi heʻeku komipiutá peá ne fehuʻi mai, “ʻOkú ke tui kia … Kalaisi?” …
… Fānau mo e toʻu tupu: kātaki ʻo fehuʻi ki hoʻomou mātuʻá pe ko ha taki ʻamui ange, “Ko e hā naʻe pau ai ke pekia ʻa Sīsuú?” …
Ko ia, naʻá ku talaange ki hoku kaungāmeʻa foʻoú ʻoku tau maʻu ha laumālie makehe mei he sinó pea ko e ʻOtuá ʻa e Tamai ʻa hotau laumālié. … Koeʻuhí ʻokú Ne ʻofa ʻiate ia mo e kotoa ʻo ʻEne fānaú, naʻá Ne faʻu ai ha palani ke tau maʻu ha sino ʻi he tatau ʻo Hono sino nāunauʻiá, hoko ko ha konga ʻo ha fāmili, pea toe foki ki Hono ʻafioʻanga ʻofá ke fiefia ʻi he moʻui taʻengatá mo hotau ngaahi fāmilí, hangē pē ko Iá. Ka naʻá ku talaange te tau fepaki mo ha fakafeʻātungia lalahi ʻe ua ʻi he māmani hinga ko ʻení: (1) ko e mate fakatuʻasinó—ʻa e mavahevahe hotau sinó mo hotau laumālié. … Pea mo e (2) mate fakalaumālié—ko e fakamavaheʻi kitautolu mei he ʻOtuá koʻeuhí ko ʻetau ngaahi angahalá, fehalaākí, mo e tōnounou ʻi heʻetau hoko ko e kakai matelié ʻo tau mamaʻo ai mei Hono ʻao māʻoniʻoní. …
Naʻá ku fakamoʻoniʻi ki hoku kaungāmeʻá, pea ʻoku ou fakamoʻoni atu kiate kimoutolu, ko Sīsū Kalaisi ʻa e Fakamoʻui ko iá, naʻe pau ke Ne mamahi, pekia, pea toe tuʻu—ʻa ʻEne Fakalelei taʻefakangatangatáke huhuʻi ʻa e faʻahinga kotoa pē ʻo e tangatá mei he mate fakatuʻasinó pea ke foaki ʻa e moʻui taʻengata mo e ʻOtuá mo hotau ngaahi fāmilí ki he kakai kotoa pē ʻe muimui kiate Iá. …
Ko e ngaahi sitepu naʻe fakahā ʻe he ʻOtuá kuo pau ke tau fakahoko ke muimui ai kia Sīsū pea maʻu ʻa e moʻui taʻengatá, ʻoku ui ia ko e tokāteline ʻa Kalaisí. ʻOku kau ai ʻa e “tui kia Sīsū Kalaisi mo ʻEne Fakaleleí, fakatomalá, papitaiso [ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní], maʻu ʻa e meʻa-foaki ʻo e Laumālie Māʻoniʻoní, mo e kātaki ki he ngataʻangá” [Preach My Gospel (2019), 63].