Taha ʻia Kalaisi
Ngaahi Konga Fakamatala
Ko Sīsū Kalaisi toko taha pē te tau lava ʻo taha aí.
Ko e hoko ʻo taha ʻia Kalaisí ʻoku hoko taha taha ia—ʻoku tau takitaha kamata pē ʻiate kitautolu. Ko ha kakai kitautolu ʻo e kakano mo e laumālie pea ʻoku tau faʻa fefaʻuhi pē mo kitautolu. …
Naʻe maʻu foki ʻe Sīsū ha sino ʻo e kakano mo e laumālie. Naʻe ʻahiʻahiʻi Ia; ʻokú Ne afioʻi; te Ne lava ʻo tokoniʻi kitautolu ke tau maʻu ʻa e uouangatahá ʻi loto. …
… ʻOku kau moʻoni ʻi he “ʻai [kiate kitautolu] ʻa Kalaisí” ʻa hono fakahoko ʻEne “ʻuluaki pea ko e lahi ʻo e fekaú” [vakai, Mātiu 22:37–38] ko ʻetau tukupā ʻuluaki mo maʻongoʻonga tahá, pea kapau ʻoku tau ʻofa ʻi he ʻOtuá, te tau tauhi ʻEne ngaahi fekaú.
ʻOku tupulaki ʻa e uouangataha mo hotau kāingá ʻi he sino ʻo Kalaisí ʻi heʻetau tokanga ki he fekau hono uá—ʻa ia ʻoku fekauʻaki tonu mo e ʻuluakí—ke ʻofa ki he niʻihi kehé ʻo hangē pē ko kitautolú. …
ʻI he ʻetau “ʻai [kiate kitautolu] ʻa Kalaisí,” ʻoku malava leva ke fakaleleiʻi pe siʻaki ʻa e ngaahi faikehekehé, taʻefemahinoʻakí, mo e fakakikihí. …
ʻOku ʻikai fiemaʻu ʻe he uouangatahá ke tatau ʻa e meʻa kotoa pē, ka ʻoku fiemaʻu ʻa e fāitahá. Te tau lava ʻo ʻai hotau ngaahi lotó ke fāitaha ʻi he ʻofa, taha ʻi he tui mo e tokāteline, pea kei poupou ki ha ngaahi timi kehekehe, taʻefiemālie pē ʻi he ngaahi meʻa fakapolitikalé, fakakikihi kau ki ha ngaahi taumuʻa mo e founga totonu ke aʻusia ai kinautolú, pea mo ha ngaahi meʻa kehe lahi. Ka he ʻikai ke tau teitei lava ʻo taʻeloto pe fefakakikihiʻaki ʻi he ʻita pe femanukiʻaki. …
Te u toe fakaongo atu, ʻoku fakafou ʻi heʻetau mateakiʻi fakafoʻituitui mo ʻofa ʻia Sīsū Kalaisí ʻa ʻetau ʻamanaki ke tau tahá—taha ʻi hotau lotó, taha ʻi ʻapi, taha ʻi he Siasí, pea faifai ʻo tau taha ʻi Saione, pea mahulu hake aí, ke tau taha mo e Tamaí mo e ʻAló pea mo e Laumālie Māʻoniʻoní.