Ngaahi Tāpuaki Fakapēteliaké
ʻEkuatoa
Ko Hoʻo Tāpuaki Fakapēteliaké—Fakahinohino Fakalaumālie mei he Tamai Hēvaní
Naʻe fuʻu mahuʻinga kiate au hoku tāpuaki fakapēteliaké ʻi heʻeku kei siʻí ʻi ha ngaahi ʻuhinga lahi. ʻUluakí, ʻi he mālohi ʻo e Laumālie Māʻoniʻoní, naʻe tokoni hoku tāpuaki fakapēteliaké ke mahino kiate au hoku tuʻunga totonu taʻengatá—ko hai au pea mo e tuʻunga te u lava ʻo aʻusiá. … Naʻá ku ʻilo naʻe ʻafioʻi mo ʻofaʻi au ʻe heʻeku Tamai Hēvaní mo hoku Fakamoʻuí pea naʻá Na tokoni moʻoni ʻi heʻeku moʻuí. Naʻe tokoni ʻeni ke u ofi ange kiate Kinaua pea fakatupulaki ʻeku tui mo e falala kiate Kinauá. …
Naʻe tokoni ʻa ʻeku ʻiloʻi ko hai aú ke u maʻu ha mahino peá u holi ke fai ʻa e meʻa ʻoku ʻamanaki mai ʻe he ʻOtuá ke u faí.
Naʻe hoko ʻeni ke u ako ai ʻa e ngaahi fuakava naʻá ku fakahokó pea mo e ngaahi tāpuaki kuo talaʻofa mai ʻi he fuakava ʻa e ʻOtuá mo ʻĒpalahamé. Naʻá ne ʻomi ha fakakaukau ʻoku taʻengatá ʻa ia naʻe fakalotoa ai au ke u tauhi kakato ange ʻeku ngaahi fuakavá. …
Naʻe mahuʻinga kiate au ke u maʻu hoku tāpuaki fakapēteliaké lolotonga ʻeku kei siʻí pea lolotonga ʻa e kei fakatupulaki ʻeku fakamoʻoní. …
… Naʻe hoko ʻeku mahuʻingaʻia ʻi hoku tāpuaki fakapēteliaké ke tāpuekina ʻaki au ʻa e loto-toʻa ʻi he taimi naʻá ku loto-foʻi aí, fiemālie ʻi he taimi naʻá ku manavahē aí, nonga ʻi he taimi naʻá ku loto-hohaʻa aí, ʻamanaki lelei ʻi he taimi naʻá ku ongoʻi kuo siva ai ʻa e ʻamanakí, pea fiefia ʻi he taimi naʻe fuʻu fiemaʻu ai ʻe hoku laumālié ke fiefiá. Naʻe tokoni hoku tāpuaki fakapēteliaké ke fakatupulaki ʻeku tui mo e falala ki heʻeku Tamai Hēvaní mo hoku Fakamoʻuí. ʻOkú ne fakatupulaki foki mo ʻeku ʻofa kiate Kinauá—pea ʻoku kei pehē pē.
Taimi ke Maʻu Ai Hoʻo Tāpuaki Fakapēteliaké
Siʻi kau talavou, kau finemui, mātuʻa, mo e kau pīsope ʻofeina, ʻoku ʻikai toki maʻu pē ʻa e tāpuaki fakapēteliaké ʻi he teuteu ke ngāue fakafaifekaú. ʻE lava ke maʻu ʻe he kāingalotu moʻui taau kuo papitaisó honau tāpuaki fakapēteliaké ʻi he taimi ʻoku tonu kiate kinautolú. …
ʻE kāinga, ʻoku ou fakamoʻoni ʻoku moʻui ʻa e Tamai Hēvaní mo Hono ʻAlo ʻOfaʻanga pē Taha naʻe Fakatupú, ʻa e ʻEiki ko Sīsū Kalaisí. ʻOkú Na ʻofa ʻiate kitautolu. Ko e ngaahi tāpuaki fakapēteliaké ko ha meʻa-foaki toputapu ia meiate Kinaua. ʻI he taimi te ke maʻu ai hoʻo tāpuakí, te ke ʻilo mo ongoʻi ai ʻa ʻEna ʻofa ʻiate koé mo e anga ʻEna tokanga taha fakafoʻituitui kiate koé.