Ko Hono Maʻu ʻa e Mālohi ʻo e ʻOtuá ʻi he Ngaahi Fuakavá
Ngaahi Konga Fakamatala
Kimuʻa pea fakatupu ʻa e māmaní, naʻe fokotuʻu ʻe he ʻOtuá ha ngaahi fuakava ko ha founga ia te tau lava ai, ko ʻEne fānaú, ʻo fakatahaʻi ai kitautolu kiate Iá. …
… ʻOku tau toki fai pē ha fuakava ʻi he taimi ʻoku tau tukupā ai ke tau fakahoko moʻoni iá. ʻOku tau hoko ko ha fānau fuakava ʻa e ʻOtuá mo e kau ʻea-hoko ki Hono puleʻangá, tautautefito ʻi he taimi ʻoku tau faifeinga ai ke fokotuʻu ʻetau ngaahi fuakavá ko ha konga mahuʻinga ʻo ʻetau moʻuí.
ʻOku ʻuhinga ʻa e kupuʻi lea ko e hala ʻo e fuakavá ki ha ngaahi fuakava hokohoko ʻa ia ʻoku tau omi ai kia Kalaisi ʻo fehokotaki mo Ia. ʻOku fakafou ʻi he haʻi fakafuakava ko ʻení ʻa ʻetau malava ke maʻu ʻa Hono mālohi taʻengatá. ʻOku kamata ʻa e halá mei he tui kia Sīsū Kalaisí mo e fakatomalá, pea hoko mai ai ʻa e papitaisó mo hono maʻu ʻo e Laumālie Māʻoniʻoní. …
ʻOku fakatau ʻa e hala ʻo e fuakavá ki he ngaahi ouau ʻo e temipalé, hangē ko e ʻenitaumeni ʻi he temipalé. Ko e ʻenitaumení ko e meʻaʻofa ia ʻo e ngaahi fuakava toputapu mei he ʻOtuá ʻokú ne fakafehokotaki fakaʻaufuli kitautolu kiate Ia. …
ʻOku hoko foki ʻa hono tauhi ʻo e ngaahi fuakava ʻoku fakahoko ʻi he faiʻanga papitaisó pea mo e temipalé ke tau maʻu ai ha ivi ke matuʻuaki ʻa e ngaahi ʻahiʻahi mo e loto-mamahi ʻo e moʻui fakamatelié. …
ʻI hoʻo ʻaʻeva ʻi he hala ʻo e fuakavá, mei he papitaisó ki he temipalé pea mo e toenga hoʻo moʻuí, ʻoku ou palōmesi atu ʻa e mālohi ke ke fakafepakiʻi ʻa e ngaahi tōʻonga angamaheni ʻo e māmaní—ʻa e mālohi ke ke ako, mālohi ke ke fakatomala pea fakamaʻa koe, mo e mālohi ke maʻu ʻa e ʻamanaki lelei, nonga, mo e fiefia ʻi hoʻo fehangahangai mo e ngaahi pole ʻo e moʻuí. ʻOku ou palōmesi atu te ke malu mo hoʻo fāmilí mei he ivi tākiekina ʻo e filí, tautautefito ki he taimi ʻokú ke ʻai ai ʻa e temipalé ke fakatefito ai hoʻo moʻuí.