Sau, Mulimuli Mai ia te A’u
O le Faavae o le Ekalesia Moni a Keriso
Ua faavaeina le Ekalesia a le Alii i luga o aposetolo ma perofeta, ma o Iesu Keriso o le maatulimanu autu.
Ua faafeiloai e Peresitene Dallin H. Oaks le autalavou matutua i Rockford, Ilinoi, ISA, i le aso 12 Fepuari, 2023
I le tautotogo o le 2020, sa tatou faamanatuina ai le 200 tausaga o le Uluai Faaaliga a Iosefa Samita, lea na amatalia ai le Toefuataiga o le talalelei a Iesu Keriso. Ina ia faailoga lenei mea taua na tupu, sa saunia ai e le Au Peresitene Sili ma le Korama a Aposetolo e Toasefululua se folafolaga, “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi.” Sa matou tautino atu O Le Ekalesia a Iesu Keriso o le Au Paia o Aso e Gata Ai o le Ekalesia toefuataiina a le Faaola.
O Faanaunauga o Lo’u Loto, saunia e Walter Rane
Sa matou molimau atu o lenei Ekalesia ua “taula i le soifuaga atoatoa o lona maatulimanu autu, o Iesu Keriso, ma i Lana Togiola e le iu ma le Toetu moni,” ma “ua toe valaauina foi e Iesu Keriso ia Aposetolo ma ua tuuina atu ia i latou le pule o le perisitua.”1 O le faavae lena ua fausia ai le Ekalesia moni a Keriso.
O Le Maatulimanu Autu o Lo Tatou Faatuatuaga
I aso ua mavae, o faavae mo fale sa tele ina faataatia i maa tetele, lea na tuuina atu ai le lagolago i se fale. O le maa muamua ma le sili ona taua o nei maa o le maatulimanu. O le taimi lava na tuu ai i lalo, na fuafua ai e le maatulimanu le tulaga o isi maa faavae uma.
Na aoao mai le Aposetolo o Paulo o le Ekalesia moni a Keriso o loo “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). O le Alii o Iesu Keriso o le faavae mo lo tatou faatuatua ma mo le Ekalesia o loo tauaveina Lona suafa.
E ala i le soifuaga le mafaatusalia o le Faaola ma le Togiola, o i latou uma na soifua mai o le a toetutu mai le oti. E sili atu i lo lena, sa Ia tatalaina le faitotoa mo tagata uma ina ia faamagaloina ai a latou agasala e ala i le salamo, papatisoga, ma le faapaiaina e le Agaga Paia. I lenei auala, e ala i le usiusitai i le talalelei a Iesu Keriso, e mafai ai ona tatou toe foi atu ma le le pona i le afioaga o le Atua.2
O le Leoleo Mamoe Lelei, saunia e Michael Malm
Ou te molimau atu o Iesu Keriso ua na o le pau lea o le Ala i le tino ola pea ma le ola e faavavau. Ou te olioli ona e mafai ona ou faaaluina le vaega o totoe o lo’u olaga e folafola atu ai lenei upumoni sili ona taua i le lalolagi atoa.
O Le A Le Uiga o le Faavaeina Foi o le Ekalesia i Luga o Aposetolo ma Perofeta?
O Aposetolo na muai valaauina e Iesu Keriso i Lana galuega i le olaga nei e pulefaamalumalu i Lana Ekalesia. Ina ua toefuatai mai Lana Ekalesia e ala i le Perofeta o Iosefa Samita, sa Ia toe valaauina aposetolo e pulefaamalumalu. O tagata uma e valaauina i le tofi o le aposetolo—pe i le Au Peresitene Sili po o le Korama a le Toasefululua—ua lagolagoina o ni “perofeta, tagatavaai, ma talifaaaliga,” ae ua na o le sili ona sinia ua ta’ua o le perofeta aua e pulefaamalumalu o ia i le Ekalesia atoa ma ua faatagaina tulaga ese e saunoa mo le Alii.3
Ua Filifilia Perofeta ma Aposetolo e Taitaia le Ekalesia
E filifili e le Faaola po o ai e taitaia Lana Ekalesia ma tuu atu ia i latou le pule ma le mana e tatau ai. O le taimi nei ua taitaia le Ekalesia e Iesu Keriso e ala mai i Lana perofeta ma aposetolo, o Russell M. Nelson, ma ona fesoasoani i le Au Peresitene Sili, ma e ala mai i le Korama a Aposetolo e Toasefululua, o e ua i ai tiutetauave paia o le molimauina “o le suafa o Keriso i le lalolagi atoa” ma le atiina ae ma le taitaiga o le Ekalesia (Mataupu Faavae ma Feagaiga107:23, 33).
O le Au Peresitene Sili ma le Korama a Aposetolo e Toasefululua i le Nofoaga Autu mo Tagata Asiasi mai i le Malumalu o Roma Italia, faatasi ai ma faatagata o Iesu Keriso ma Ana uluai Aposetolo e Toasefululua i tua atu o i latou
Faatasi ai ma o’u uso i le Au Peresitene Sili ma le Korama a Aposetolo e Toasefululua, ou te molimau atu o Iesu Keriso o le Alo o le Atua. O Ia o le Malamalama o le Lalolagi. O Ia o lo tatou Faaola mai le agasala ma le oti. Ua aoao atu e Ona taitai filifilia le aoaoga faavae a Keriso4 ma isi upumoni le masuia o le talalelei e pei ona faatonuina ai e le Agaga Paia. E leai so tatou manao e ese mai le aoao atu o le mea moni ma ia uunaia tagata uma ia mulimuli i le “fuafuaga tele o le fiafia a le Atua” (Alema 42:8).
E mafai ona e iloa mo oe lava. Ole atu i lou Tama Faalelagi pe o i tatou moni lava o aposetolo ma perofeta a le Alii, ona faaaoga lea o aoaoga a lo tatou Faaola i lou olaga. O le ala lena i faamanuiaga o le olaga faitino ma le ola e faavavau, ou te molimau atu ai i le suafa o Iesu Keriso, lo tatou Faaola ma le Togiola.