“Mealilo e 7 o se Olaga Tutoatasi—Ua Faaalia,” Mo le Malosi o le Autalavou, Oke. 2023.
Fesoasoani o le Olaga
Mealilo e 7 o se Olaga Tutoatasi—Ua Faaalia
O se suiga sologa lelei i se olaga tutoatasi e mafai ona fai mo oe. O nisi nei o mea e mafai ona fesoasoani.
Ata na tusia e le Guev Design
O tagata e matutua e ola i se olaga ese mai ia te oe. Ma o le mea moni, o le a e ola i se olaga matua i se aso. O se vaega o se olaga matua o le tutoatasi—tausia o oe lava, mauaina o tupe, ma isi mea faapena. O mealilo nei e fitu i le mauaina o se olaga tutoatasi.
Mealilo 1: E mafai ona e faaaogaina ni punavai se tolu o le mana faaleagaga i lau malaga.
Ua e maua le avanoa i punavai e tolu o le mana faaleagaga i lou ala:
Faatuatua ia Iesu Keriso—i taimi uma ma i mea uma. Talitonu i le Faaola. Saili e tausi Ana poloaiga ma faamamalu i feagaiga e te osia. Tatalo i aso uma i le Tama Faalelagi i le suafa o Iesu Keriso. Ona mafai lea ona faamanuiaina oe i vaega uma o lou olaga. Aua lava nei masalosalo i lena mea. (Tagai i le Mosaea 2:41.)
Faitalia—o le mana e filifili ma faatino ai. Ua ia te oe le faitalia. E mafai ona e filifili e mulimuli i aoaoga a Iesu Keriso. E finagalo le Tama Faalelagi ia e galue mo oe lava ae le na o le tau galueaiina e malosiaga mai fafo (tagai 2 Nifae 2:14, 16). Po o a lava ou tulaga, e i ai lava se mea lelei e mafai ona e faia.
Manaoga amiotonu—iloaina o mea e te manao ai ma pe aisea. Afai e te manao i ni mea lelei mo ni mafuaaga lelei, e mafai ona avea oe ma se tagata lelei. E pei ona faamalamalama mai e Peresitene Dallin H. Oaks, Fesoasoani Muamua i le Au Peresitene Sili: “O manaoga e faatonua mai mea tatou te faamuamuaina, o mea e faamuamua e mamanu ai a tatou filifiliga, ma o filifiliga e fuafua ai a tatou faatinoga. E le gata i lea, o a tatou faatinoga ma o tatou manaoga e afua ai ona avea i tatou ma se mea” (Ape. 2011 konafesi aoao [Ensign po o le Liahona, Me 2011, 45]).
Mealilo 2: Totogi muamua le sefuluai—e tusa lava po o le a.
Pe a e maua se tupe, totogi ai le sefuluai. Aua nei faia ni tuusaunoaga, ma aua le tuua se i afea. A o e tausia lenei tautinoga, o le a “tatala … e le Alii pupuni o le lagi” mo oe (Malaki 3:10). E mafai ona aofia ai ituaiga uma o faamanuiaga—faaleagaga, faaletino, faalelagona, ma isi.
Mealilo 3: E sili atu ma le tasi le ala i se olaga tutoatasi.
O au filifiliga e le faatapulaaina i se tomai se tasi, tasi le a’oga, tasi le tikeri, tasi le galuega. Talitonu i lenei mea, ma o le a e vaaia ni papupuni laiti ma isi faitotoa e tatala mai.
Afai e te le iloa au filifiliga, saili ni tagata e i ai le poto masani ma le malamalama e mafai ona tuuina atu ia te oe ni fautuaga lelei. O i latou ia o matua, o faufautua i le aoga, taitai o le Ekalesia, po o se tagata o lou nuu o loo faia se mea e te manao e fai. Fesili atu ia i latou pe faapefea ona latou oo atu i le mea o i ai i latou ma po o a punaoa o loo avanoa mo oe.
Mealilo 4: Atonu ua i ai ia te oe mea e mananao ai tagata.
Mo le tutoatasi i mea tautupe, e te manaomia “tomai tau maketi”—o mea e mafai ona e faia o le a totogi ai oe e tagata. O le mealilo lenei: ua i ai nisi o na mea ia te oe. Mo se faataitaiga, matematika, suisui, malosi faaletino, otiina o lauulu, tusi ata, aveina o taavale, faatulagaina o mea, foiaina o faafitauli, faaaogaina o komepiuta, mafai ona talanoa i tagata ma maua lo latou faatuatuaga, faatuatuaina, ma le anoanoai o isi.
Afai e te le iloa ou tomai, fai atu i se tagata matua e ta’u atu ia te oe mea e te lelei ai. Ma afai e te manao e atiina ae se tomai faapitoa e te le o mauaina, e mafai ona e aoaoina.
Mealilo 5: Faitau!
O le faitau o se ki lea i aoaoga sili atu, galuega sili atu, ma se malamalama sili atu i le auala e galue ai le lalolagi. E tusa lava pe e te lelei i le faitau, faitau atili. Faitau tusitusiga paia. Faitau mea ua tofia oe e faitau i ai i le aoga. Ona sue lea o mea e te fiafia e faitau na o oe.
O le faitau e fesoasoani ia te oe e maua ai le malamalama ma ia mafaufau ma fesootai manino atili ai. O le a aoga tele lenei mea ia te oe e tusa lava po o a mea e te filifili e fai i le lumanai.
Mealilo 6: O mea e te le mataala i ai e mafai ona mou ese atu.
Afai e te le mataala pe o faapefea ona e faaaluina au tupe, e i ai se aso e te ono iloa ai ua toeitiiti uma. O se paketi o se fuafuaga e tulitatao ai le tele o tupe o loo sau i totonu, o le a le tele o tupe o loo faaalu i fafo, ma le tele o loo e sefeina. E fesoasoani foi ia te oe e faatulaga ai ni tapulaa i au tupe faaalu i mea eseese.
E eseese ituaiga o polokalama mo le paketiina: o tusi e i ai koluma, polokalama faakomepiuta, teutusi o tinoitupe e i ai vaega o loo tusia ai. Saili se auala e aoga lelei mo oe.
(E ui i lea, o le i ai o se paketi e le faapea e te le faaaluina lava se tupe i mea malie. Tau lava o lou siakiina o au tupe ma faaalu ma le atamai.)
Mealilo 7: O le aitalafu o se pu e te le manao e eli pea.
O leaitalafu o le taimi lea e tatau ai ona e toe totogia se tupe na e nonoina mai. E masani lava e te toe totogia sina tupe nono mai i lea taimi i lea taimi ma i le aluga o taimi ma se tupe tului—o se aofaiga faaopoopo o se pasene o le aofaiga na e nonoina mai.
O aitalafu e le mafai ona pulea pe a tele atu tupe e te nonoina mai nai lo le mea e mafai ona e toe totogia ma faaauau pea ona faaopoopo i ai tupe tului e tatau ona e totogia.
Atonu e manaomia ona e nofo aitalafu ina ia maua ai ni mea patino e le lava ni au tupe e totogi ai, e pei o aoga, anaina o le fale, po o se taavale. Ae ia faaeteete. Vaavaai mo filifiliga o le a fesoasoani ia te oe e aloese ai mai aitalafu i le tele e mafai ai.
O kata faifaatau faaaitalafu e faataga ai oe e faatau ni mea i le taimi nei ma totogi i se taimi mulimuli ane. O le aitalafu foi lenei—ma le tele o tupe tului. Afai e te lagonaina le manaomia ona maua se kata faifaatau faaaitalafu, ia totogi atoa i taimi uma e faagata ai se pili. Afai e te totogia i taimi uma na o le peimeni aupito maualalo, e sili atu ona faigata ona aluese mai le aitalafu.