Ou Te Mafaia Mea Uma ia Keriso

Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).

Feagai ma Popolega i se Misiona

alii talavou

I se vaega o la’u misiona i Arisona, ISA, sa taia ai a’u i la’u osofaiga muamua lava o le atuatuvale. Sa ou talanoa i taitai, talosaga mo se fesoasoani, ma tatalo soo. Ae o le fesoasoani sa ou manaomia sa foliga mai e le oo mai lava. Sa ou lagona le tuuatoatasi ma le fefe. Sa ta’u mai foi ia te a’u atonu e tatau ona ou alu i le fale.

I se tasi aso na valaau mai ai lo’u tina. Sa ia fesili mai, “E mafai ona e faaauau pea?” Sa ou tali atu, “Ou te le iloa. Ou te matua le iloa lava.” Ona fai mai lea o lo’u tina, “E mafai ona e faaauau mo se isi masina se tasi?” Sa ou tali atu, “Ou te le iloa.”

“Ae a se isi vaiaso se tasi?” sa ia fesili ai. Sa ou toe tali atu, “Ou te le iloa.” “Ae a se aso se tasi?” sa ia fesili ai. “Ou te. Le. Iloa,” na ou fai atu ai.

Ona ia fesili mai lea, “E mafai ona e toe faaauau se isi minute se tasi?” Na iu lava ina ou fai atu, “Ia, e mafai.” Sa ia fai mai ia te au, “Ia tau lava o le fai o le mea lena. Alu mai le minute i le minute, seia oo ina mafai ona e oo atu i se itula. Ona tuu lea ia alualu i luma, lemu. Aua le faanatinatia. Tau lava o le tuu atu i le Atua e pulea. Ou te folafola atu o le a lelei mea uma ia te oe.”

Sa ou faatuatuaina ana upu. Ua toeitiiti nei atoa le 21 masina talu ona ou tala’i. O loo ou tauivi pea ma le soifua maloloina faalemafaufau i nisi taimi. Ae ua ou lagonaina foi le tele o le olioli. Ma ou te faatuatua a ou agai mai lea laasaga i lea laasaga, mai lea minute i lea minute, e mafai ona ou faia lenei mea e ala i le mana o le Alii ma Lana Togiola e le iu. O tauiviga ma le soifua maloloina faalemafaufau e moni. Ae a o tatou liliu atu ia Keriso, e mafai ona tatou faia mea faigata.

Elder Rhett Turley, Misiona a Arisona Mesa

Afai o loo e tauivi ma lagona o le popole po o le atuatuvale, saili le fesoasoani mai se tagata matua faatuatuaina.