“Valaauina e le Atua,” Mo le Malosi o le Autalavou, Oke. 2023.

Valaauina e le Atua

Saunia e Stephanie E. Jensen ma Jessica Zoey Strong

Mekasini a le Ekalesia

Sa aoaoina e nei tagata mo i latou lava o perofeta ma aposetolo ua valaauina e le Atua. E mafai foi ona e aoaoina!

Ata

faatalofa

Ina ua amata e Iesu Lana galuega i le olaga nei, sa Ia valaauina Aposetolo e toasefululua. Ma ina ua Ia toefuatai mai Lana Ekalesia, sa Ia filifilia aposetolo ma perofeta e taitai i tatou i o tatou aso. O le mulimuli i a latou fautuaga, e mafai ai ona tatou maua ni molimau ua valaauina i latou e le Atua.

Feiloai i Aposetolo

Pe ua e feiloai ea i se Aposetolo? O nisi nei o tala e uiga i tagata na feiloai i ai.

Sa Ou Lauga i le Konafesi Aoao—o se Talavou

O le talosagaina e tuuina atu se savali i le faitau miliona o tagata i le konafesi aoao ia Aperila 2020 na faailoa mai ai ia te a’u se tulaga fou atoa o le lagona lofituina. Ae sa ou lagona le mafanafana i le iloaina o le a fesoasoani mai le Alii ia te a’u.

A o ou saunia la’u savali, sa ou mafaufau pe faapefea ona maua faaaliga. Sa fesoasoani lenei mea ou te talisapaia ai le tuuto o i latou o e lauga i konafesi aoao.

Ina ua taunuu mai le konafesi, sa ou lagona le popole, ae o le feiloai ai ma Elder Gerrit W. Gong ma isi Pulega Aoao na fesoasoani ou te lagona ai le filemu. Ona ou feiloai lea ia Peresitene Russell M. Nelson. Sa ia saunoa mai ia te a’u e peiseai sa iloaina e le tasi le isi i o ma olaga atoa. Sa ou lagonaina le alofa mama o Keriso a o ou talanoa i le perofeta.

Laudy K.

Ata

tamaitai talavou i le pulelaa

Talimalo i se Talanoaga Faafesagai ma Elder Soares

Ina ua ou iloaina o le a avea a’u ma se vaega o se Talanoaga Faafesagai, o le mea sa sili ona ou fiafia i ai o le avanoa lea e galulue ai ma se Aposetolo.

Sa ou popole a o lei faia le faasalalauga ona sa manaomia ona ou fai atu nisi o mea i le faaPotukale. Sa ou fai atu ia Elder Soares, “Ou te popole o le a lagona lo’u siuleo faaAmerika.” Sa tali mai o ia ma se ataata ma faaivi le mata, ma fai mai, “Max, o siuleo e matagofie!”

Sa ou lagonaina le malosi tele o le Agaga ina ua ou faalogo atu ia te ia o molimau mai o loo soifua le Faaola ma e alofa ia i tatou uma taitoatasi.

Max A.

Ata

ata o tagata faatasi ma Elder ma Sister Soares

Ina ua Fesoasoani Elder Holland ia te A’u i A’u Meaaoga o le Matematika

Ina ua 12 o’u tausaga, sa avea lo’u tama ma se peresitene o le misiona i Chile. A o i ai iina, sa la galulue vavalalata ma Elder Holland. I se tasi aso sa ou fai atu ai, “Tama, o Elder Holland o loo i totonu o la’u tusi matematika.”

“O ananafi na alu ai le itula e 1 o Jeff Holland e malaga i le galuega. O le taeao nei, sa tietie atu ai Jeff i le nofoaga o nofoaafi mo le 20 minute, faatali mo le nofoaafi mo le 7 minute, tietie i le nofoaafi mo le 12 minute, ona savali lea mo le 15 minute i le galuega. O le a le umi na alu ai Jeff e faigaluega i lenei taeao?”

O se tala tausua malie, sa auina atu ai e o’u matua se ata o le meaaoga matematika ia Elder Holland ma se faamatalaga: “Elder Holland, e mafai ona e fesoasoani faamolemole ia Whit i ana meaaoga o le matematika?”

Sa toe tali atu Elder Holland i se tusi.

“Whitney pele—sa ou fiafia ua e mauaina la’u galuega ao. Ou te auina atu e le aunoa meaaoga o le matematika mo tusiaoga ma o nisi taimi ou te le iloa po o ai le igoa e faaaoga. Ou te manatu o le a ou faaaogaina lou igoa i le isi meaaoga. (’Afai e toa 5 uo tama a Whitney Wilcox i Provo ma maua le 1 i le aso mo le 14 aso i Chile, e toafia i latou o le a papatisoina, o i misiona, ma mananao e faaipoipo ia te ia?’) Faafetai mo lou i ai iinei! E ese lo’u mimita ia te oe! Jeff Holland.”

Ata
tusi

Na manino lava le tausua o Elder Holland e uiga i lona tusia o meaaoga o le matematika (ma le i ai o ni uo tama se toatele!). Ae o lana tusi agalelei na ou lagona ai e pei sa ou taua.

Ina ua aoaoina e Elder Holland tagata o le ekalesia i Chile e faitau le Tusi a Mamona i aso uma, sa amata ona ou faitau na o a’u lava, a o 12 o’u tausaga. O le taimi lena na amata ai ona ou atiina ae la’u molimau.

Whitney L.

Ata

ata o se aiga faatasi ma Elder ma Sister Holland

Feiloaiga ma Elder Soares i Farani

I le 2021, na valaauina ai o’u matua o ni taitai misiona i le Misiona a Farani Lyon. I le 2022, na sau ai Elder Soares e asiasi mai. I lana lauga i faifeautalai, sa ia ta’ua ai o lana ato na leiloa i se tasi o ana malaga.

O lenei mea sa pei o se valaau e ala mai mo a’u. E faigofie ona vaai i aposetolo ma perofeta i luga o a tatou lau ma mafaufau e faigofie le olaga mo i latou. Ae e le o talosaga o tatou taitai faia lenei mea—ua valaauina i latou e fai. Latou te filifili e mulimuli i le Alii, ma o lona uiga o le tuua o a latou fuafuaga mo le lumanai.

Na aoao mai e Elder Soares ia te a’u le uiga o le avea ma se soo o Keriso. E ui lava sa pisi o ia ma sa i ai ana lava tauiviga, ae sa ia taumafai lava e talanoa atu i le toatele o tagata o le ekalesia i le mea e mafai ai. Sa ou iloaina o le Au Pulega Aoao o tagata e pei o oe ma a’u o e ua filifilia Keriso ma galulue e faaali atu Lona alofa.

Lydie L.

Ata

Iesu Keriso

Ata

ata pue o se aiga ma Elder Soares

E ala i le Tatalo ma le Faatuatua

Afai e te lei feiloai i se Aposetolo, e le afaina lena mea! O le toatele o i tatou e leai. E mafai ona e maua se molimau ua valaauina i latou e le Atua e ala i le faalogo, mulimuli, ma tatalo e uiga i a latou aoaoga.

Faataitai Mea Latou te Aoao Atu

Sa ou feiloai i taitai o le Ekalesia ina ua ou talimalo i se talanoaga Faafesagai, ae e le o le taimi lena na ou maua ai se molimau ua valaauina i latou e le Atua.

Pe a ou faalogo i a latou upu, faataitai mea latou te aoao mai, ma vaai ia te a’u lava ia ua suia i se tagata e sili atu le faapei o Keriso, o le taimi lena ou te lagona ai le faamautu mai e le Atua ia te a’u o i latou o molimau faapitoa a Keriso.

Aaron K.

Ata

alii talavou

Mulimuli i Valaaulia a le Perofeta

Ou te tulimatai atu lava i taimi uma i le konafesi aoao. Ou te manatua le lagonaina o le fiafia tele ina ua matou faia ma a’u uo se lisi o mea na saunoa i ai le perofeta ma faamanatu atu e le tasi i le isi e fai na mea. O le tasi o le alu i le malumalu, ma sa matou o faatasi ma a’u uo. Sa matuai malie lava, ma sa ou lagonaina le tele o le filemu. O le faia o le mea na fai mai ai le perofeta na fesoasoani ou te iloa ai le tele o le alofa o Iesu Keriso ia te a’u.

Leticia F.

Ata

tamaitai talavou

Pe tou te feiloai ma se Aposetolo pe leai, e mafai ona e iloa le upumoni: E molimau aposetolo i le upumoni ma e leai se isi mea e manao i ai ae na o le mea sili mo oe. A o e mulimuli ai, o le a faailoa atu e le Agaga Paia ia te oe ua valaauina i latou e le Atua.