Te Nati ae Bakatae ao te Kawai n Oki Rikaaki nakon te Mweenga
Te Rongorongo ae Kaeweaki
Okin te Nati ae Bakatae, iroun Richard Burde
Antai mai ibuakora ae e tuai man tibanako man te kawai ae tabu, N aki iangoia raoi bwa ti kona n karekei kukurei iroura n oin kawaira?
Antai mai ibuakora ae e aki namakina te taotaonakinano, uruakinnano, ao n kainanoa te kabwarabure ao te nanoanga?
Tao tabeman a tia ni iangoia, “Ti bon kona naba n manga karairaki? Ke n nang kakeaki n aki toki, ao n katukaki ma arou irouia raoraou ngkoa? E tamaroa riki bwa N na tiku ni bua? Ke tera ana namakin te Atua ngkana I kataia n oki rikaaki?”
[Te] taetae ni kaikonaki [ibukin te nati ae bua] e anganiira te kaeka.
E na biri nakoira Tamara are i Karawa, E onrake nanona n te tangira ao te nanoanga. …
E na kimwareirei karawa n okira. …
Ngkana e a tia ni uotiko ni kararoako am rinerine mai iroun te tia Kamaiu ao Ana Ekaretia, E tei ni butimwaaiko te tia Katoki Aoraki n te kawai are e kairiko nakon mwengam, ni butimwaaiko. Ao ngkai ngaira kaain ana Ekaretia Iesu Kristo ti ukoria n iriira Ana banna ni katooto ao ni butimwaai ngkami bwa tarira ao mwaanera ao raoraora ngkami. Ti kakatonga ao ni bukamaru ma ngkoe. …
I aki bakan iangoia bwa E aki bebete te oki. I kona n kakoauaa anne. Ngaia are, karaoa am rinerine ae te kabanea ni matoatoa ae ko tuai karaoia i nanon maium.
Ma I kaota au koaua bwa man te tai are ko kataua bwa ko na karairaki iai nakon kawain ara tia Kamaiu ao te Tia Kabooi Maiura, E na rin mwaakana ni maium ao ni bitia.