N̄an Kōkajoorļo̧k Jodikdik ro
Ij juon Rikaļooraņ Jisōs Kraist
Jānwōde 2024


“Ij juon Rikaļooraņ Jisōs Kraist,” N̄an Kōkajoorļo̧k Jodikdik Ro, Jān. 2024.

2024 Unin Tōl eo an Jodikdik Ro

Ij juon Rikaļoor an Jisōs Kraist

Kwomaron̄ ļoor Rilo̧mo̧o̧r im kajeeded naan eo An n̄an ro jet.

Pija
2024 pijain Unin Tōl eo an Jodikdik Ro

Em̧ōj ke am̧ kar ļōmņak etke, ālkin An kōmour armej ro, Jisōs ekar ba n̄an jet iaer bwe ren jab ba n̄an jabdewōt armej (lale Mark 7:36)? Juon un emaron̄ kōn kain rikaļoor rot me E ej aikuji. Kwomaron̄ ļōmņak bwe eļan̄n̄e armej ren kar kōnono kake aer mour jān nan̄inmej ko en kar juon iaļ em̧m̧an n̄an Jisōs n̄an kan̄ōl tok ro rej ļoor E. Ijo wōt ke, Jisōs ekar jab aikuj wōt ro rej ļoor E. E ekar aikuj rikaļoor.

Jisōs ekar ba n̄an Piter im Andrew, “Ļoor Eō” (Matu 4:19). Ukook eo an Josep Smith kōn eoon in ej ba, “I am he of whom it is written by the prophets; follow me” (Joseph Smith Translation, Matthew 4:18 [ilo Matthew 4:19, footnote a]). Kūr eo ekar jab wōt n̄an pād Ippān ilo jidik wōt iien. E ekar kōņaan bwe ren An rikaļoor n̄an indeeo.

Ekar jab kōņaan wōt bwe ren lale An katakin armej, iakwe armej, im kōm̧m̧ani kabwilōn̄lōn̄ ko. E ekar kōņaan bwe ren kōm̧m̧an ejja wāween kein. E ekar kōņaan bwe jerbal eo An en erom̧ jerbal eo aer. Kāālet Kraist ej meļeļein renaaj kar aikuj ekkatak n̄an jerbal āinwōt An kar jerbal im ļōmņak āinwōt An kar ļōmņak. Renaaj aikuj kar kōmālmel mour āinwōt An kar mour, im E enaaj kar katakin er im leļo̧k n̄an er jipan̄ eo renaaj kar aikuji n̄an erom̧ eļapļo̧k āinwōt E.

Pija
Jisōs Kraist

Naan in Greek eo n̄an rikaļoor ej rikkatak. Ej meļeļein eļapļo̧k jān juon riļoor ak juon rijikuuļ. Ekkā ukote āinwōt eo katakini. Ilo raan ko an Kraist, rikaļoor ro rekōn kāālet m̧aajta eo jān eo rekōņaan ekkatak ippān kōttōpar eo n̄an erom̧ m̧aajta ro make. Kraist ekar jab ļoor imminene in. Ijjeļo̧kin, Ekar ukote im kappukot rikaļoor ro An. Rainin, Kraist ej kūr kōj aolep n̄an itok n̄an E. Ej kūr kōj n̄an erom̧ rikaļoor ro An im kwaļok naan eo An ilubwilijin armej ro An bwe ren maron̄ mour indeeo (lale 3 Nipai 5:13).

Juon jiron̄ jān Haiti ilo Carribean ekar kwaļo̧k ikdeelel eo an n̄an erom̧ juon rikaļooraņ Kraist jān an karuwaineneik eo m̧ōttan eo ekar jab uwaan Kabun̄ in n̄an itok ippāņtok n̄an juon FSY kweilo̧k. M̧okta jemān eo m̧ōttan ekar jab kōņaan kōmālim leddik eo nejin n̄an etal. Ritōl ro an Kabun̄ in rekar kōmeļeļe kōn en̄jake ko rem̧m̧an rej kōttare leddik eo im rikōkapilōklōk ro an ro rum̧m̧an ded ro renaaj kar lale. Eo jemān ekar leļo̧k mālim n̄an leddik eo nejin n̄an kobaļo̧k, im ālkin an loe oktak eo ekar waļo̧k ilo mour eo an leddik eo, ekar barāinwōt kōmālim an etal n̄an kweilo̧k ko an Kabun̄ in—jiljino allōn̄ ko tokaļik—n̄an an peptaij.

Juon likao eo jān Argentina ilo South America ekar kwaļo̧k an ikdeelel n̄an erom̧ juon rikaļooraņ Kraist jān an ajije tōn̄al ko kijen ippān juon m̧ōttan ke rekar iuwe ilo baj eo n̄an jikin jikuuļ. Ke ekar bōk juon tōn̄al lemen ko̧pe, ekar kōmeļeļeik bwe ejjan̄in kar edjon̄e lemen eo kōnke ejjeļo̧k juon iaan baam̧le eo an rej draak ko̧pe. Men eo ekar tōlļo̧k n̄an juon ekōnono kōn Kabun̄ in, eo ekar tōl n̄an juon kūr n̄an itok n̄an kweilo̧k ko, āļiktata ekar tōl eo m̧ōttan n̄an kobatok ilo Kabun̄ in im etal im mijen ilo Chile.

Ejjab aolep ro kwoj ekōnonoļo̧k kōn Kabun̄ in ak kūr er n̄an juon m̧akūtkūt an Kabun̄ in renaaj kōņaan kobawaj ippam̧. Ej em̧m̧an wōt. Ejjab aolep armej Kraist ekar ekōnono ippāer ilo iien jerbal in karejar eo An ilo laļ in rekar bar kobaļo̧k. Ak jekdoon, ilo ad kāālet n̄an erom̧ rikaļooraņ Jisōs Kraist im kwaļo̧k naan eo An, E enaaj letok n̄an kōj peran im jipan̄ ekwojarjar. Jenaaj ekkatak wāween eo n̄an erom̧ eļapļo̧k āinwōt E, im en̄in ej ta eo rikaļoor ro rej kōm̧m̧ane.

Būriin