“Kāālet Meram eo!,” N̄an Kōkajoorļo̧k Jodikdik Ro, Jān. 2024.
Itok, Ļoor Eō
Bok in Mormon taitōl peij eo; Kadkad in Bok in Mormon
Kāālet Meram eo!
Bok in Mormon ej boktok meram im kajoor n̄an mour eo am̧ n̄an tōl eok ilo raan ko reppen im rekaitoktok limo im̧aan.
Kōmeļeļe ko jān Gabriele Cracolici
Āinwōt juon ļaddik edik ikar iakwe bwebwenato in brother eo an Jared ilo Bok in Mormon. Imaron̄ loe en̄jake eo an āinwōt juon pijaan alooj ilo kōļmenļo̧kijeņ eo aō. Ej āinwōt n̄e ej bōk jikin ilo aō riit kake.
Ļeo jein im jatin Jared em̧ōj kar kakien e jān Irooj n̄an kalōke baaj ko bwe e im baam̧le eo an ren maron̄ kijoone lom̧aļo eo n̄an “juon āneen kallim̧ur” (Ether 2:9). Ak baaj ko rekar marok. Kar jab kōņaan etal ilo marok, ļeo jein im jatin Jared ekar pukot jipan̄ eo an Irooj. Irooj ekar kajjitōk ippān, “Ta kwo kōņaan bwe in kōm̧man?” (Ether 2:23).
Kōn tōmak eļap, ļeo jein im jatin Jared ekar bōk 16 dekā n̄an ioon juon tōl im kar jar. Ekar kajjitōk ippān Irooj n̄an jibwi dekā ko “bwe ren maron̄ romaakļo̧k ilo maroklep” (Ether 3:4). Irooj ekar leļo̧k Pein im jibwe kajjojo iaan dekā ko kōn addiin Pein, leļo̧k n̄an er meram. Aolepen mour eo aō, ikar pijaik an Irooj jibwe dekā ko.
Āinwōt kar leļo̧k meram n̄an brother eo an Jared, Irooj Jisōs Kraist enaaj boktok meram n̄an eok. E ej “meram eo im mour eo an laļ” (3 Nipai 1:11). Ij karuwaineneik eok n̄an kāālet meram eo! Ekkatak Bok in Mormon eo emaron̄ kōkajoorļo̧k tōmak eo am̧ ilo Jisōs Kraist im jipan̄ eok ekkeijel wōt ilo meram eo An.
Juon Tōl im juon Meram.
Em̧ōj aō riiti Bok in Mormon im kar en̄jake juon kam̧ool elōn̄ kattōn bwe ej m̧ool. Ijjanin̄ de pere. N̄e ijjab en̄jake Jetōb, n̄e ijjab jejjōt ilo jetōb, ij en̄jake an marok. Ak n̄e ij riiti Bok in Mormon, meram ej bar romaak. Jet iien ebōk wōt riiti juon eoon n̄an aō bar en̄jake meram, ak ij aolep iien en̄jake meram n̄e ij riiti.
An meram anjo̧ ioon marok em̧ool ippa. Būreejtōn Russell M. Nelson ekar ba “Ilo am̧ jar im lukkuun ekkatak jān Bok in Mormon eo aolep raan, kwonaaj kōm̧m̧ani kālet ko rem̧m̧antata—aolep raan.”1 Menin ej kōnke Bok in Mormon eo ej kōļapļo̧k tōmak eo am̧ ilo Jisōs Kraist. Ej boktok meram im kajoor. Katak ko ie renaaj tōl eok ilo aolep raan ko reppen im rekaitoktok limo im̧aan.
En̄jaake Meram
Ikar bōk kōjeraam̧m̧an eo n̄an jerbal itūrin Būreejtōn Nelson. N̄e rikanaan eo ej deļo̧n̄e tok juon ruum̧, ruum̧ eo em̧ōkaj an meramļo̧k. Ej ineek Meram eo an Kraist ippān.
Jet iien ej pen n̄an lukkuun jeļā ke kwoj en̄jake Meram eo an Kraist. Kwojjab loe kōn mej ko mejam̧. Ej itok ilo en̄jake ko an jetōb. Ej en̄jake eo kōn ta eo ejim̧we im ebōd im ta eo em̧ool im eriab (lale Moronai 7:13–19).
Jabdewōt iien kwoj kāālet n̄an erom̧ eļapļo̧k āinwōt Jisōs Kraist, kwoj etetal ilo Meram eo an Kraist. Riiti Bok in Mormon eo ej kōkajoorļo̧k meram eo.
“Aaet, Ej Mool!”
Ij lukkuun tōmak bwe n̄e jeje ko rekwojarjar rej ba, “Keememej, keememej” (Hilamōn 5:12, rej meļeļein bwe jej aikuj jab baj keememej wōt Jisōs Kraist ak keememej bwe em̧ōj ad kar en̄jake meram eo An juon kattōn. Jej aikuj en̄jake Meram eo An kiiō im bar en̄jake im bar en̄jake. En̄in ej ta eo juon likao, Eric, ekar ekkatak kake ke ekar jino riiti Bok in Mormon.
Ālkin an kar em̧m̧akūtļo̧k n̄an juon jikin ekāāl, im jinoe high school ie, Eric ekar apan̄ n̄an e ilo kūlaaj ko an im loe bwe ekar pen an koņ an ie. Ekar barāinwōt jinoe ļōmņak eļan̄n̄e ewōr juon an naan in kam̧ool.
“Ikar jinoe m̧oolin riiti Bok in Mormon ej kab kar jinointata ilo mour e aō,” Eric ekar ba. “Ikar riit im jar aolep raan.”
Ke Eric ekar jar im kajjitōk ippān Jemedwōj Ilan̄ eļan̄n̄e Bok in Mormon ej m̧ool, ekar jeļā bwe enaaj bōk juon uwaak, bōtaab ejjeļo̧k men eo ekar waļo̧k.
Jet iien tokāļik, ke ekar etetal ilo ibuļōņ wōjke ko itulikin m̧weo im̧ōn, Erick ekar bar kajjitōk. Iien in, ekar wōr juon an en̄jake, āinwōt n̄e Jemedwōj Ilan̄ ej kajjitōk ippān, “Eric, ta eo em̧ōj an waļo̧k ilo mour eo am̧ jān ke kwaar jinoe riiti Bok in Mormon e?”
Eric ekar ļōmņak kōn wāween an kar kōm̧m̧an ro m̧ōttan rem̧m̧an im ekar em̧m̧anļo̧k ilo jikin jikuuļ. Ilo an jab kile, Bok in Mormon ekar boktok meram im kajoor n̄an mour eo an.
Innem ekar waļo̧k.
“Ikar jab ron̄ juon ainikien,” Eric ekar ba, “bōtaab Jetōb ekar kobrak būruo ilo an naan kein itok n̄an kōļmenļo̧kijeņ eo aō: ‘Aaet, ej m̧ool!’ Juon en̄jake eļap in aeņōm̧m̧an, lan̄lōn̄, im meļeļe ekar jiktok ippa. Ikar jeļā bwe em̧ōj kiiō aō loe uwaak eo aō.”2
Bun̄m̧aanļo̧k ilo Meram
Jān peij eo jinointata n̄an eo āļiktata, Bok in Mormon ej kam̧ool bwe “Jisōs ej RiKraist eo”3 im ej katakin kōj “ta eo [jej] aikuj kōm̧m̧ane n̄an bōk aenōm̧m̧an ilo mour in im mour indeeo ilo mour eo ej itok.”4
Ilo am̧ ekkatak kōn Bok in Mormon, j kōjatdikdik bwe kwonaaj en̄jake bwe kar jeiki n̄an eok. Katak ko ilo Bok in Mormon im waanjon̄ak ko rekajoor an Nipai, Liai, Saraia, Abinadai, Alma, Amulek, Abij, ļaddik ro nejin Mosaia, im elōn̄ ro jet enaaj ļōn̄aj, tōl, im kōkajoor eok n̄an erom̧ juon rikaļooraņ Jisōs Kraist em̧manļo̧k im tōl eok n̄an etetal ilo peran ilo Meram eo An.
Ij kam̧ool bwe Bok in Mormon ej juon kam̧ool aorōk im kam̧ool bwe Jisōs Kraist ej mour im ej jikin bōk kaanōm̧m̧an, kōjatdikdik, aenōm̧m̧an, lan̄lōn̄, im meram. Ij jar kōn aolepen būruō bwe kwonaaj kāālet Meram eo! loe ilo Bok in Mormon, epaakeļo̧k Jisōs Kraist, im en̄jake okmeenen in meram eo An im iakwe eļapļo̧k jān kar m̧okta.