“Juon Baiļat ilo Jarin Tariņae eo An Irooj,” N̄an Kōkajoorļo̧k Jodikdik Ro, Jān. 2024.
Juon Baiļat ilo Jarin Tariņae eo An Irooj
Lamar F. jān East Midlands ilo England ekar wōr an kōttōpar ko reļļap me rekar kōkajoore ikdeelel eo an, men̄e men ko rekar tal im apan̄.
Pija ko kar litok jān Satomi Folkett
“Eto aō kōņaan ekkāke kōn baļuun toon wōt aō maron̄ kemeemej,” 17 iiō dettan Lamar F. ej ba. Ke juon m̧ōttan jān iien iaikwoj wiljia ekar jiron̄ eō kōn juon jāān in jipan̄ an British me ej jipan̄ armej ro ewōr ippāer nan̄inmej ilo ānbwin ekkatak n̄an ekkāke, Lamar ekar kijooror n̄an kajjieon̄.
Ettōņak ko Ilan̄ Routiej
Ekar likūt etan ilo ruo burokuraam̧ in jipan̄ ko. Juon iaer, ej Junior Aspiring Pilots Program (JAPP) eo, kar ejaake eļaptata n̄an jodikdik ro ikōtaan iiō ko 12 im 18. Būrookuraam̧ kein im katak ko jet an juon make rekar un e m̧aanļo̧k bar juon ne epaakeļok n̄an kōttōpar eo an eļap—n̄an bōk Private Pilot License eo an.
Mōttan kōttōpar in an ej itok jān baam̧le eo an. Jemān Lamar ekar armej eo m̧oktata n̄an kaikdeelel e ilo ekkāke, bōke n̄an jikin kaloojoj baļuun ko aolep iien. Tokālik, ālkin an juon bar baam̧le kōkajiririki ke ej emen an iiō, kōņaan eo an Lamar ilo jikin ekkāke ekar ļapļo̧k wōt ilo an alooje an jemen eo ekar kōkajiririik e bōk license in kattōr baļuun eo an. “E ej juon aō waanjon̄o̧k em̧m̧an n̄an erom̧ juon rikattōr baļuun,” Lamar ej ba. Kiiō jemān Lamar emaron̄ uwe ippān ilo baļuun eo juon wōt pikpikin, baļuun ko ļalem jeia ie Lamar ej ekkatak n̄an kattōri.
Ro jinen im jemān Lamar (pijaik er ijin ilo jim̧ōr tūrin) rej jet iaan jipan̄ ko an reļlaptata.
Ilo tūreep eo jinointata an Lamar ilo juon m̧oolin baļuun, ekar ikūm̧kūm̧ ilo an kajjieon̄ keememej aolep men. “Ikar m̧ōkaj kōm̧m̧an jidik, jar ekadu m̧okta jān aō etal n̄an ijo m̧aan, im ekar em̧m̧an aolep men,” ej ba. Kiiō ke ej apan̄ n̄an an kemeemej juon men ilo mejatoto, jar ko reddik rekar jipan̄ e kōm̧m̧ane ta eo aikujin kar kōm̧m̧ane. Men̄e jemān ekar jab pād ilo jeia eo ļokan, Lamar ejeļā ke Jemen Ilan̄ ej ped ippān iien otemjej.
Jariņ Tariņae eo an Irooj
Ekkāke ejjab men eo wōt ekar kattōr jetōb eo an Lamar. “Ekar baj wōt em̧m̧an ippa ritariņae in British, aolep men jān iien kōjeraam̧m̧an an irooj ro n̄an iien mej ko,” ej ba.
“Kōn wōt nan̄inmej ko ilo ānbwinnū, ikar jab maron̄ pād ilo kumi in tariņe eo,” Lamar ej ba. Ak juon iaan kar ritōl ro an ilo Doulul eo an Likao ro eo ekar juon ritariņae ekar rojan̄ Lamar. “Aolep iien ej kakeemeemej eō bwe ijjab aikuj in pād ilo kumi in tariņae eo an laļ in kōnke ikadede ilo jariņ tariņae eo an Irooj” Lamar ej ba. “Pād ilo jariņ tariņae eo an Irooj ej kōm̧m̧an aō en̄jake bwe jekdoon ta e mour in ej jotok, jekdoon ta eo jabdewōt ej kōm̧m̧ane n̄an n̄a, Jisōs Kraist ej pād ippa.”
Brother Bayliss, ritōl eo an Lamar ilo Doulul eo an Likao ro, ekar kipel e n̄an kobaļo̧k ilo “Jariņ Tariņae eo an Irooj.”
Ilo college eo an ro ewōr utam̧we ilo ānbwinier im ekar etal n̄ane, Lamar ekar kajjieon̄ jipan̄ armej ro jet ilo iiō e an n̄an kobaļo̧k ilo jariņ tariņae eo an Irooj ilo an kwaļo̧k gospel eo ippāer. “Elōn̄ kattōn, rejjab ron̄jake eō,” ej ba, “bōtaab jet iien, ewōr rekōņaan. Kōnke jet iaan aikuj ko aō ilo iien eo, etal im mijen ekar jab juon kāālet. Bōtaab ij kalimjōke āinwōt in: ijjab aikuji juon nametag n̄an erom̧ juon mijinede.”
Kōn jejjo̧ wōt jodikdik ro ilo ward eo an, eiten aolepen ro m̧ōttan Lamar rekar jab membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Eaar jab aolep iien pidodo ilo jikin jikuuļ, eļaptata n̄e ewōr, āinwōt an Lamar ba, “eļap eddodo” in kapo ko. “Elōn̄ im lōn̄ rijikuuļ ro rej kōnono kōn men ko ejjab ekkar im ron̄jake al ko rejjab ekkar. Aaet, jabdewōt iien juon men rōt eo ej waļo̧k, ij em̧m̧akūt im etal n̄an juon ruum̧ ijo ejjeļo̧k men eo ie.”’
Kajoor Wōt
N̄e kapo ko rej itok im ro jet rejjab kōņaan ron̄jak kōn gospel eo, Lamar ej jibwe jeje ko rekwojarjar ilo lōn̄: “A kōn n̄a im ro nukū, kōm naaj jerbal n̄an Irooj” (Joshua 24:15).
“Jeje ko rekwojarjar rej jipan̄ eō kajoor wōt ilo tōmak eo aō ilo Jisōs Kraist,” ej ba. Menin eļaptata an aorōk n̄an Lamar ilo baam̧le eo an make. Ke Lamar ekar 10, jemān ekar bōjrak an itok n̄an jar. “Ikar dik tōre eo, im ikar jab lukkuun meļeļe,” ej ba. “Ikar kipel e bwe en bar ro̧o̧ltok. Ak em̧ōj aō ekkatak bwe ejjab men eo in. Kwoj leļo̧k aer iien.”
Lamar ekar epaake wōt jemān im ekar kwaļo̧k iakwe n̄an e aolep raan, āinwōt kwaļo̧k n̄an e ta eo eaar waļo̧k ilo m̧ōnjar eo ak joļo̧k eļap iien. “Aolep iien ekar katakin n̄bwe jekdoon ta eo kwoj ioone, kwoj aikuj kajoor wōt.” N̄an jabdewōt jodikdik ro me baam̧le ko aer rejjab niknik ilo Kabun̄ in, ej ba, “kajoor wōt. Dāpij wōt tōmak eo am̧. Jab ebbweer, jekdoon ta.”
Kappukot Kraist ilo Iien ko Reppen
Lamar ekar barāinwōt lo peran ilo Kraist ilo wāween ko an make. “Ikar en̄taan jet iien kōn inepata kōn aer in kōļmenļo̧kijeņ,” Lamar ej ba. “Ijeļā bwe lukkuun armej eo wōt n̄an letok n̄an eō peran n̄an etal wōt ej Jisōs Kraist Make. Ekar ioon etar jān jon̄an, ak e ekar wōnm̧aanļo̧k kōn mijen eo An.”
N̄e Lamar ejjab em̧m̧an an mour, ekkā an pijaikļo̧k an Rilo̧mo̧o̧r rojan̄ e, im ba, “Komaron̄e menin. Komaron̄ eļļā ioon jabdewōt men.”
Ej barāinwōt bōk kajoor jān jinen im jemān, ro m̧ōttan, im armej ro jet rej epaake. “Ekar wōr juon iien kar tōl eō ilo iaļ eo ebōd,” Lamar ej ba. Ak kom̧m̧ool kōn jikin bōk jipan̄ eo aō em̧m̧an, ikar maron̄ kajim̧we iaļ eo aō im kōkajoorļo̧k naan in kam̧ool eo aō kōn Kraist.
“N̄aij kaļapļo̧k wōt naan in kam̧ool eo aō,” ej ba, “ak eļap an em̧m̧an n̄an erom̧ juon m̧ōttan jariņ tariņae eo an Irooj im pād ilo Kabun̄ eo an Jisōs Kraist im Armej ro Rekwōjarjar ilo Raan Ko Āliktata. Ej juon men me ij iakwe.”
Iaļ in jibadbad eo an emaron̄ wōr em̧m̧an im nana ko ie, ak Lamar ejeļā ta eo ej kōm̧m̧ane bwe en weak lōn̄ļo̧k wōt. “Jekdoon ta māllijon̄ ko ak jorrāān ko kwoj iooni, Jemedwōj Ilan̄ enaaj pād iturum̧ kōnke E ej kea kake eok im iakwe eok.”