“Rikaļoor: Ilo Ta im Wāween Rot,” N̄an Kōkajoorļo̧k Jodikdik Ro, Jān. 2024.
Rikaļoor: Ilo Ta im Wāween Rot
N̄an lukkuun jeļā wōn kwe im ta eo kwomaron̄ erom̧, n̄an jim̧or ilo ta im wāween rot n̄an erom̧ juon rikaļooraņ Jisōs Kraist.
“Wōn n̄a?”
Ej juon kajjitōk elōn̄ armej rej kappukot uwaakin. Ilo am̧ eddōkļo̧k im ekkatak im ejaak ilo jekjek eo am̧ make ejenolo̧k, kwoj make ļōmņak kōn ta eo ej kalikkar wōn kwe, ta eo ej lewaj kadkadim̧. Būreejtōn Russell M. Nelson ekar letok jet iaļan tōl ko raorōk kōn kajjitōk in:
“Wōn kwe? M̧oktata im eļaptata, kwoj juon nejin Anij, juon ajri in bujen, im juon rikaļooraņ Jisōs Kraist. Ilo am̧ būki m̧ool kein, Jemedwōj Ilan̄ enaaj jipan̄ eok tōpar kōttōpar eo am̧ ejjeļo̧k jem̧ļo̧kin kōn mour indeeo ilo Im̧aan mejen” (“Choices for Eternity” [worldwide devotional for young adults, May 15, 2022], broadcasts.ChurchofjesusChrist.org).
Būreejtōn Nelson ekar kwaļo̧k bwe ejjeļo̧k bar juon kadkad eļapļo̧k an aorōk n̄an eok jān taitōļ in kadkad kein jilu: (1) nejin Anij, (2) ajri in bujen, im (3) rikaļooraņ Jisōs Kraist.
Kadkadin juon Rikaļoor
Jen kōnono eļapļo̧k jidik kōn men eo kein kajilu, rikaļooraņ Jisōs Kraist. Ekōjkan am̧ lukkuun kaorōk kadkadin im erom̧ juon rikaļoor?
N̄an ļoor Rilo̧mo̧o̧r im erom̧ An rikaļoor, kwoj aikuj mijeļo̧k jim̧or ilo ta eo kwoj kōm̧m̧ane im wāween rot am̧ kōm̧m̧ane.
N̄an waanjon̄ak, Rilo̧mo̧o̧r ekōņaan bwe jen lelo̧k n̄an ro jet im jerbal n̄an er, ak E ej kūr kōj n̄an kōm̧m̧ane ilo ad kōņaan im lem̧ōņōņō ijjelo̧kin ad kūtōtō. N̄e jej kōņaan leļo̧k im jerbal, jej bōk menin nōbar eo eļaptata āinwōt juon rikaļoor eo em̧ool. (Lale 2 Korint 9:7; Moronai 7:8.)
Kōn menin, jen kalimjōk ta eo rikaļoor ro rej kōm̧m̧ane im ekōjkan aer kōm̧m̧ane.
Ta eo juon Rikaļoor ej Kōm̧m̧ane
Erkein jet iaan men ko rellōn̄ me juon rikaļoor an Kraist emaron̄ kōm̧m̧ane n̄an ļoor Rilo̧mo̧o̧r.
-
Kōjerbal tōmak ilo jekjek eo rikaļoor ro rej kōjerbal tōmak.
-
Jerbal ilo jekjek eo rikaļoor ro rej jerbal.
-
Jar ilo jekjek eo rikaļoor ro rej jar.
-
Ekkatak ilo jekjek eo rikaļoor ro rej ekkatak.
-
Ukweļo̧k ilo jekjek eo rikaļoor ro rej ukweļo̧k.
-
Ļōmņak ilo jekjek eo rikaļoor ro rej ļōmņak.
-
Iakwe Anij ilo jekjek eo rikaļoor ro rej iakwe Anij.
-
Iakwe ro jet ilo jekjek eo rikaļoor ro rej iakwe ro jet.
-
Katakin ilo jekjek eo rikaļoor ro rej katakin.
-
Niknik ilo jekjek eo rikaļoor ro rej niknik.
Wāween rot juon Rikaļoor ej Kōm̧m̧ane
Erkein jet iaan kōmeļeļe ko kōn wāween an juon rikaļoor maron̄ kōm̧m̧ane men kein. Elōn iaan kōmeļeļe kein remaron̄ jerbal n̄an elōn̄ iaan men kein. Jet iaer remaron̄ jerbal n̄an aolep.
-
Ilo an Jisōs Kraist pād ioļapļap in bōro ko im ļōmņak ko.
-
Ilo m̧ōņōņō
-
Ettā
-
Lap iakwe
-
Tiljek
-
Aolep iien
-
Kōn aolepen bōro
-
Kijejeto
-
M̧ool
-
Ilo ejjeļo̧k jep
-
Kijenmej
-
Peran
-
Kajoor
-
Pedped ioon aikuj ko an ro jet
-
Pedped ioļapļap in jeje ko rekwojarjar
-
Dim
-
Erreo
-
Obrak kōn kōjatdikdik
-
Kōn juon ikdeelel n̄an erom̧ āinwōt Jemedwōj Ilan̄ im Jisōs Kraist
-
Ilo ejjeļo̧k menin kapo
Kwomaron̄ jeraam̧m̧an jān ļōmņak kōn jim̧ōr ta eo kwoj kōm̧m̧ane n̄an ļoor Rilo̧mo̧o̧r im wāween rot kwoj kōm̧m̧ane. Eļan̄n̄e kwoj en̄jake ke kwoj aikuj kōm̧m̧ane jet oktak ko ralikkar ilo jabdewōt men kein ej elaajrak, eļap an em̧m̧an. Enej bōlen Jetōb eo ej im̧we eok n̄an erom̧ juon rikaļoor eo em̧m̧anļo̧k.
Juon kadkad n̄an Kaorōki im Kōjparoki
Āinwōt an Būreejtōn Nelson kar ba, erom̧ juon rikaļooraņ Jisōs Kraist ej juon m̧ōttan kadkad eo am̧ eaorōk. Ilo am̧ kaorōke im kōjparoke kadkad in, Jem̧ōm̧ Ilan̄ enaaj jipan̄ eok n̄an erom̧ armej eo E ejeļā ke kwomaron̄ erom̧—armej eo me kwe, ilo tum̧wilaļ, kwoj kōņaan.