“Jab Keidi eok Make! Komm̧an,” N̄an Kōkajoorļo̧k Jodikdik Ro, Jān. 2024.
Itok, Ļoor Eō
Jab Keidi eok Make! Komm̧an
Erkein emān men ko jej ekkatak jān juon iaan ļōm̧aro rōrūtto jein Nipai.
Kōmeļeļe ko jān Corey Egbert
Ewōr juon rijikuuļ ilo kūlaaj eo aolep iien ejeļā uwaak eo ejim̧we. Ajri eo ilo tiim in basketball eo aolep iien rej kadeļo̧n̄ ball jān eok. Armej eo me aolep rekōņaan m̧ōttā ippān. Ilo juon laļ eo eļap kampeer ie, āinwōt aolep iien ewōr juon eo em̧m̧anļo̧k.
Kampeer ko remaron̄ pen eļaptata n̄e ej itok n̄an mour kōn gospel eo. Kwomaron̄ ļōmņak bwe ro jet reweppenļo̧k, ewōr juon aer kam̧ool ekajoor, ak alikkarļo̧k aer en̄jake Jetōb jān eok. Bōtaab keidi eok make ilo jekjek in eban jipan̄.
Jān Bok in Mormon, kwomaron̄ jeļā bwe Nipai ekar juon ritōl im rikanaan em̧m̧an. Bōtaab ewi jon̄an am̧ jeļā kōn ritōmak eo jein Nipai, Sam? Ekar jab wōt juon ritōl ak rikanaan āinwōt Nipai, ak ekar jab aikuj in āinwōt Nipai bwe en em̧m̧an.
1. Sam Ekar Tōmak
Nipai ekar jar im bōk juon uwaak n̄an e make bwe Irooj ekar kakien baam̧le eo aer n̄an em̧m̧akūt n̄an āne jem̧aden. Im Sam “eaar tōmak ilo naan ko [an Nipai’]” (lale 1 Nipai 2:16–17). Sam ekar bōlen jab lukkuun weppān naan in kam̧ool eo an. Emaron̄ kar bōlen wōr an kajjitōk. Bōtaab ekar kāālet n̄an tōmak ilo naan ko an ļeo jatin, innām kōjerbal tōmak eo an. Jab keidi tōmak eo am̧ ak naan in kam̧ool eo am̧ n̄an armej ro jet. Ilo am̧ kōjerbal tōmak āinwōt eo kar an Sam, naan in kam̧ool eo am̧ kōn Rilo̧mo̧o̧r enaaj eddōk jidik kōn jidik. (Bar lale Katak im Bujen Ko 46:13–14; Alma 32.)
2. Sam Ekar Ettā
Leman im Lamuel rekar jab m̧ōņōņō bwe ļaddik eo jatier, Nipai, ekar erom̧ juon ritōl n̄an er. Ak Sam, eo ekar barāinwōt jein Nipai, ekar bōlen ettā būruon. Ekar ron̄jake Nipai im ļoor kapilōk ko an (lale 2 Nipai 5:3–6). N̄e ro jet ipeļaakum̧ rej kajitōk bwe ren tōl eok im kwojjab, kwon ettā, im jab keidi eok. Jipan̄ er, ekkatak jān er, im kōm̧m̧ane ijo koņaam̧ em̧m̧antata n̄an kāālet jim̧we eo.
3. Sam Ekar Kijenmej
Emaron̄ āinwōt ke aolep ro ipeļaakum̧ rej mour juon mour eweppān, ak aolep rej ioon iien ko reppen. Sam ekar ejjeļo̧k oktak. Leman im Lemuel rekar jum̧aik Sam, āinwōt aer kar jum̧aik Nipai. Em̧ool rekar den̄ļo̧ke Sam kōn juon aen, āinwōt aer kar den̄ļo̧ke Nipai! (Lale 1 Nipai 3:28; 1 Nipai 7:6.) Ak Sam ekar kijenmej ilo apan̄ ko an. Dipuk iien ko reppen ejjab meļeļein kwoj kōm̧mane juon men ebōd. Jab keidi apan̄ ko am̧ n̄an apan̄ ko an ro jet. Kwon kijenmej, im lōke ilo Irooj. E enaaj jipan̄ eok kaki.
4. Sam Ekar Jeram̧m̧an
Jemān Sam, Liai, ekar ba n̄an Sam “kwōnaaj jeraam̧m̧an ilo aolepān raan ko am̧” (2 Nipai 4:11). Sam emaron̄ kar jab juon ritōl ak rikanaan, bōtaab ekar tiljek wōt in ļoore Jisōs Kraist, im ekar jeraam̧m̧an kake. Kōn jipan̄ eo an Rilo̧mo̧o̧r, ekar bwe jon̄an em̧m̧an eo an. Im kwomaron̄ barāinwōt.