« Hōē pairati i roto i te nu’u a te Fatu », Nō te pūai o te feiā ’āpī, Tēnuare 2024.
Hō’ē pairati i roto i te nu’u a te Fatu
E mau fā rarahi tā Lamar F. nō te East Midlands mai i te fenua Peretāne, ’o te fa’ati’a iāna ’ia rere i ni’a, noa atu e mea fifi te mau mea ato’a.
Mau hōho’a tei hōro’ahia mai e Satomi Folkett
« Mea maoro ’ia ha’amana’o ana’e au, ’ua hina’aro noa nā vau e pairati i te mau manureva » ’ua parau Lamar F., 17 matahiti. I te paraura’a mai te hō’ē hoa i terā tau nō te fa’atītīāhemora’a o te mau pārahira’a tūra’ira’i iāna, nō ni’a i te hō’ē pū hāmani maita’i perētane ’o tē tauturu nei i te ta’ata huma ’ia ha’api’i mai i te rere, ’ua hina’aro rahi ’o Lamar e tāmata.
E moemoeā i te ra’i teitei
’Ua tāpa’o ’oia iāna i roto e piti fa’anahora’a a te pū hāmani maita’i. Te hō’ē o te reira, te fa’anahora’a nō te paraiti ’āpī roa a’e (JAPP), tei fa’atupu-ta’a-’ē-hia nō te feiā ’āpī mai te 12 matahiti e tae atu i te 18 matahiti. Tē tūra’i nei te tā’āto’ara’a o teie mau fa’anahora’a ’e te tahi atu mau ha’api’ira’a ta’ata hō’ē iāna, ’ia ha’afātata atu i tāna ’ōpuara’a rahi—te fāri’ira’a i tāna parau ’aravihi tuatoru pairati unuma.
Hō’ē tuha’a o tōna ’ana’anatae mau, nō roto mai ïa i tōna ’utuāfare. ’O te pāpā tīa’i o Lamar, te ta’ata mātāmua tei hōro’a iāna i te hina’aro rahi ’ia rere, ma te ’āfa’i iāna i te mau matahiti ato’a i te mau ha’utira’a rere manureva. I muri a’e, i te fa’a’amura’ahia ’oia e te tahi atu ’utuāfare i te mahara’a o tōna matahiti, ’ua tāmau noa te ana’anatae o Lamar nō te manureva i te tupu i te rahi, ’a hi’o noa ai ’oia i tōna metua tāne fa’a’amu ’ia tītau i te parau ’aravihi tuatoru pairati. « ’Ua riro ’oia ’ei fa’aurura’a nō’u, nō te hina’arora’a ’ia riro ’ei pairati », ’ua parau Lamar. I teienei, e nehenehe te pāpā o Lamar e rātere nā muri iāna, i roto i te mau manureva hō’ē pererau e pae pārahira’a, tā Lamar e ha’api’i nei i te pairati.
Nā metua o Lamar (hōho’a tei patahia i’ō nei i tōna pae tāta’itahi) tei riro ’ei mau pāturu rahi roa nōna.
I te taime nō te rerera’a mātāmua o Lamar i roto i te hō’ē manureva mau, ’ua taiā ri’i ’oia i te mana’ora’a ’ia ha’amana’o i te mau mea ato’a. « ’Ua fa’ahiti ’oi’oi au i te hō’ē pure muhu ’ore, hou ’a pa’uma atu ai i roto, ’e ’ua tupu maita’i », te nā reira ra ’oia. I teienei, ’ia fifi ana’e ’oia ’ia ha’amana’o i te hō’ē ’ohipa i roto i te reva, e tauturu te mau pure muhu ’ore iāna ’ia rave i te mea e ti’a iāna ’ia rave. ’Oia ato’a i te taime ’aita ana’e tōna metua tāne i ni’a i te pārahira’a i muri, ’ua ’ite Lamar tei piha’i iho noa tōna Metua i te ao ra iāna ra.
Te nu’u a te Fatu
Te rerera’a e ’ere ’o terā ana’e te ’ohipa tei ha’amara’a i te ’ana’anatae o Lamar. « ’Ua riro noa nā vau ’ei ta’ata tei fa’ahiahia rahi mau i te nu’u fa’ehau nō Peretāne, te fa’a’ari’ira’ahia i i te taime o te ’ōro’a hunara’a », tē parau ra ’oia.
« Nō tō’u huma, e’ita e ti’a iā’u e tomo atu i roto i te nu’u fa’ehau », te parau ïa a Lamar. Terā rā, ’ua fa’aitoito te hō’ē o tōna feiā fa’atere tahito nō te Feiā ’Āpī Tamāroa tei riro nā ’ei fa’ehau, ia Lamar. Tē parau ra Lamar « ’ua fa’aha’amana’o tāmau noa ’oia iā’u ē, ’aita e tītauhia iā’u ’ia tomo i roto i te hō’ē nu’u nō te ao nei, nō te mea tei roto a’ena vau i te nu’u a te Fatu ». « Te ōra’a i roto i te nu’u a te Fatu, ’ua hōro’a mai te reira iā’u i te mana’o ē, noa atu te ’ohipa tā te orara’a e fa’atupu mai i ni’a iā’u, noa atu te ’ohipa tā te ta’ata e rave i ni’a iā’u, tē vai ra Iesu Mesia i tō’u pae ».
’Ua fa’auru te taea’e Bayliss, te ti’a fa’atere nō te Feiā ’Āpī Tamāroa o Lamar, ’ia ’āmui mai ’oia i « te nu’u a te Fatu ».
I te fare ha’api’ira’a tuatoru nō te mau huma tāna e haere nei, tē tāmata nei Lamar i te tauturu i te tahi mau ta’ata nō tōna matahiti, ’ia tomo mai i roto i te nu’u a te Fatu, ma te fa’a’itera’a ia rātou i te ’evanelia. Tē parau ra ’oia, « i te rahira’a taime, e tau’a-’ore-hia vau, i te tahi rā taime, e fāri’i au i te ’ana’anataera’a. Nō te tahi o tō’u mau hina’aro e vai nei, e ’ere te haere-’oi’oi-ra’a i te misiōni rave tāmau i te hō’ē rāve’a. Tē hi’o nei rā vau mai teie : ’Aita vau e tītau nei i te hō’ē tāreta i’oa nō te riro ’ei misiōnare. »
Ma te ’iti o te feiā ’āpi i roto i tāna pāroita, te rahira’a o te mau hoa o Lamar e ’ere ïa i te melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei. E ’ere noa i te mea ’ōhie i te fare ha’api’ira’a, i te taime iho ā rā, mai tā Lamar e parau nei, tē vai ra « e rave rahi » mau fa’ahemara’a. « E rave rahi pīahi e parau nei i te mau ’ohipa tano ’ore ’e e fa’aro’o nei i te pehe tano ’ore. Te mea faufa’a rā, ’ia tupu ana’e te hō’ē ’ohipa mai te reira, e haere au ’e e tomo vau i roto i te hō’ē piha ’aita te reira ’ohipa e tupu ra. »
Fa’aea pūai noa
’Ia tae ana’e mai te mau fa’ahemara’a ’aore rā ’aita vetahi e ana’anatae ra ’ia fa’aro’o i te parau nō te ’evanelia, e tāpe’a fa’ateitei Lamar i tāna pāpa’ira’a mo’a au-roa-hia : « ’Āre’a vau e tō’u ato’a ra ’utuāfare, e ha’amori ïa mātou ia Iehova » (Iosua 24:15).
« ’Ua tauturu teie pāpa’ira’a mo’a iā’u ’ia fa’aea pūai noa i roto i te fa’aro’o ia Iesu Mesia », tē parau ra ’oia. E mea faufa’a ta’a ’ē mau te reira nō Lamar i roto i tōna iho ’utuāfare. I te 10ra’a o te matahiti o Lamar, ’ua fa’aea tōna metua tāne i te haere i te purera’a. « E mea ’āpī roa vau i terā tau, nō reira ’aita vau i ta’a hope roa », tē nā reira ra ’oia. « ’Ua tāmata vau i te fa’aitoito iāna ’ia ho’i mai. ’Ua ha’api’i mai rā vau ē, e ’ere te reira te tumu. ’Ia hōro’a ’oe i te taime ia rātou. »
’Ua tāmau noa Lamar i te fa’aea piri noa i tōna metua tāne ’e i te fa’a’itera’a i te here iāna i te mau mahana ato’a, mai te fa’ati’ara’a iāna i te ’ohipa i tupu i te fare purera’a ’aore rā te haerera’a nā muri iāna. « ’Ua ha’api’i tāmau noa ’oia iā’u ē, noa atu te ’ohipa tā ’oe e fa’aruru atu, e ti’a ia ’oe ’ia fa’aea pūai noa. » I te feiā ’āpī ato’a, e mau melo nō te ’utuāfare tō rātou ’aita e haere mai nei i te fare purera’a, tē nā ’ō ra ’oia, « ’a fa’aea pūai noa. ’A tāpe’a maite i tō ’outou fa’aro’o. ’Eiaha e fa’aru’e, noa atu te ’ohipa e tupu mai. »
Te mā’imira’a i te Mesia, ’ia fifi ana’e te mau mea
’Ua ’ite-ato’a-hia ia Lamar i te itoito i roto i te Mesia nā roto i te tahi atu mau rāve’a a te ta’ata iho. « Tē māuiui nei au i te tahi taime i te ahoaho rahi mau », tē parau ra Lamar. « Tē mana’o nei au ē, te ta’ata mau nō te hōro’a mai iā’u i te itoito ’ia tāmau noa, ’o Iesu Mesia iho ïa. ’Ua fa’aruru ’oia e rave rahi ’ohipa, ’ua tāmau noa rā ’oia i tāna misiōni. »
’Ia fa’aruru ana’e Lamar i te hō’ē mahana ’ino mau, e feruri pinepine ’oia i te Fa’aora i te fa’aitoitora’a iāna ma te parau ē : « E nehenehe ’oe e rave i te reira. E nehenehe ’oe e fa’aruru i te mau mea ato’a. »
E roa’a ato’a tōna pūai nā roto mai i tōna metua vahine ’e tōna metua tāne, tōna mau hoa ’e te tahi atu mau ta’ata fātata mai iāna. « ’Ua tae na i te hō’ē taime, ’ua arata’ihia vau e au ra i ni’a i te ’ē’a hape », tē parau ra Lamar. Maoti te hō’ē fa’anahora’a pāturura’a maita’i, ’ua ti’a iāna ’ia fa’a’āfaro i tōna haere’a ’e ’ia ha’apūai i tōna ’itera’a pāpū nō te Mesia.
« Tē fa’ananea fa’ahou nei au i tō’u ’itera’a pāpū », tē parau ra ’oia, « e mea fa’ahiahia rā ’ia riro ’ei tuha’a nō te nu’u a te Fatu ’e nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’O te hō’ē ïa ’ohipa tā’u i here. »
E nehenehe tōna rāterera’a ’ei mea teitei ’e ’ei mea ha’eha’a, ’ua ’ite rā Lamar i te mea e fa’arere teitei iāna. « Noa atu te huru o te mau tāmatara’a ’aore rā o te mau fifi tā ’oe e fa’aruru nei, tei pīha’i iho te Metua i te ao ra ia ’oe, nō te mea tē ha’ape’ape’a nei ’oia nō ’oe ’e ’ua here ia ’oe. »