E rave rahi rāve’a nō te ’apo mai

Nā David Dickson

Te mau ve’a a te ’Ēkālesia

E hina’aro ānei ’oe e fa’ariro i te ao nei e mea maita’i ri’i a’e ? E ha’amata roa te reira nā roto i te ’apora’a mai e nāhea rā.

Fa’ahōho’ara’a nā Dean Macadam

E aha tā te ’apora’a mai nō ni’a i te tāpūra’a i te rouru e tū’ati i nō ni’a i te tāmaumaura’a i te mau mori i ni’a i te tāhua ha’utira’a ?

« Tei roto te tā’ātora’a o te reira i tā’u ’ōpuara’a », tē parau ra Lisa, te hō’ē feiā ’āpī pa’ari i teienei, nō te matahiti mātāmua i te ha’api’ira’a tuatoru.

’Ua ha’amata Lisa i te ha’api’ira’a fa’a’una’unara’a i te 16ra’a o tōna matahiti. ’Ua ’ite-ato’a-hia mai iāna te hō’ē fa’anahora’a ’o tē fa’ati’a iāna ’ia fa’aiti i tāna mau hora i te fare ha’api’ira’a tuarua, nō te haere i te ’āvatea i te fare ha’api’ira’a fa’a’una’unara’a. Nō te mea ē, tei te fare ha’api’ira’a tuatoru ’oia i teienei nō te ha’api’i i te ihi anoa ha’a o te teata ta’ata ora, e ’ere ïa te aura’a ē ’aita te ’ohipa nō te fa’anehenehera’a ato’a i tere maita’i. Te parau mau, tē tere maita’i ra te mau mea ato’a mai tāna i mana’o.

« ’Ua hina’aro vau e fāri’i i te hō’ē ’aravihi ’o tā’u e nehenehe e fa’a’ohipa nō te tauturu i te ’aufau i tā’u ha’api’ira’a », ’ua parau Lisa. « Hau atu, e fa’ati’a te reira iā’u ’ia tāvini ia vetahi ’ē ’e ’ia ha’aputu i te moni nō te tāpūra’a i te rouru o te ’utuāfare, nō te toe’a o tō’u orara’a ! »

Nō te aha tātou e ’apo mai ai

« Tē hina’aro nei te Metua i te ao ra i tāna mau tamāhine ’e mau tamaiti ’ia tāmau noa i te ha’api’i mai ».¹ Teie te tahi o te mau rāve’a e rave rahi, e riro ai te ’apora’a mai ’ei ha’amaita’ira’a rahi i te roara’a o te orara’a nei :

• E nehenehe ’oe e tauturu maita’i a’e ’e e ha’api’i i tō ’oe mau hoa, tō ’oe ’utuāfare ’e ia vetahi ’ē.

• E nehenehe ’oe e tāvini maita’i a’e i roto i te ’Ēkālesia ’e i roto i tō ’oe ’oire.

• E rahi atu ā tō ’oe ’aravihi i te pae tapiho’ora’a nō te fa’arava’ira’a ia ’oe iho.

• E nehenehe ’oe e ’āfa’i atu i tō ’oe ’ite nā muri ia ’oe i tō ’oe pohera’a.

• ’A fa’a’ohipa ’e ’a ha’a tāmau noa ai ’oe i tō ’oe roro, e nehenehe te reira e vai oraora maita’i noa.

Nāhea tātou ’ia ’apo mai

Maoti te mau pāpa’ira’a mo’a, ’ua ’apo mai tātou ē e ti’a ’ia tātou ’ia « ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o » (Te Ha’api’ira’a Tumu ’e te mau Fafaura’a 88:118 ; hi’o ato’a 130:18). I teie mahana, ’ua rahi atu ā te mau rāve’a nō te ’apora’a mai, hau roa atu i tei nā mua a’e ’oia ho’i :

• Te fare ha’api’ira’a tuatahi, tei roto te fare ha’api’ira’a tuarua, te fare ha’api’ira’a tuatoru ’e te mau fare ha’api’ira’a tōro’a.

• ’Imi i te ’ite « i roto i te mau buka maita’i roa a’e » (Te Ha’api’ira’a Tumu ’e te mau Fafaura’a 88:118). E nehenehe ato’a ’oe e tu’u mai, « te mau rāve’a rorouira maita’i roa a’e ».

• ’Apo-’āfaro-ra’a mai nā roto mai i te mau hoa ’e te mau melo o te ’utuāfare.

  Mana’o nō te ’ohipara’a ! ’A fa’anaho i te hō’ē ’ohipara’a nō te ha’api’ira’a e « taui i te mau ’aravihi » i roto i tā ’oe ’āma’a ’aore rā pāroita. ’Ia haere ineine mai te mau ta’ata ato’a nō te ha’api’i i te hō’ē ’ohipa tāna i ’ite i te rave.

• Pure ’e te tai’ora’a i te pāpa’ira’a mo’a.

• Te orara’a mā te ha’apa’o maita’i nō te vai ti’amā noa i te auhoara’a tāmau o te Vārua Maita’i, ’o tē « ha’api’i mai ia ’outou i te mau mea ato’a » (Ioane 14:26).

• Te tāmatamatara’a, te ferurira’a ’e te tauto’ora’a ha’arau. Te mea fa’ahiahia roa nō ni’a i te ’itera’a, ’o te ha’api’i-rahi-ra’a mai ïa i te mau mahana ato’a. E nehenehe ’oe e ’āmui atu i roto i te vaira’a ’ite o te ao nei.

Ahea tātou e ’apo mai ai

I te hope’a, tē ’apora’a mai nō ni’a i te tāpūra’a rouru mai tā Lisa ’aore rā te fa’ananeara’a i te hō’ē rāve’a ’āpī ’ei fa’aitoitora’a nō te u’i a muri mai, ’ua fa’aha’amana’o mai te peresideni Nelson ia tātou ē, tē vai noa ra te hō’ē taime maita’i roa a’e nō te ha’apa’o i te reira mau ’ohipa :

« ’Oia mau, e ti’a ia tātou ’ia ha’api’i mai nō ni’a i te tau nō mūta’a iho ra, ’e ’oia mau, e ti’a ia tātou ’ia fa’aineine nō te tau a muri a’e. ’Ia rave rā i te reira i teienei e ti’a ai. I teienei te taime e nehenehe ai tātou e ha’api’i mai… I teienei te taime e nehenehe ai tātou e ha’amaita’i ia vetahi ’ē ».²

I teienei. E aha tā ’oe e hina’aro e ha’api’i mai i teie mahana ?

E aha te hō’ē mea tā ’oe i ha’api’i mai i te rave ’aita i maoro a’e nei ? ’A fa’a’ite mai i tā ’oe mau ’ā’amu ia mātou i te [e-mail].

Fa’ata’ara’a

1. Nō te pūai o te feiā ’āpī : E arata’i nō te rave i te mau mā’itira’a (2022), 31.

2. Russell M. Nelson, « Teie te taime », ’āmuira’a rahi nō ’Ēperēra 2022 (Liahona, Mē 2022, 126).