« ’A fa’aea na i te fa’aau ! ’Ua nava’i noa ’oe », Nō te pūai o te feiā ’āpī Tēnuare 2024.
Mai, pe’e mai
’A fa’aea na i te fa’aau ! ’Ua nava’i noa ’oe
Teie e maha ’ohipa tā tātou e ha’api’i mai nā roto mai i te hō’ē o te mau tua’ana o Nephi.
Fa’ahōho’ara’a nā Corey Egbert
Tē vai ra teie pīahi i roto i te piha ha’api’ira’a tei ’ite tāmau noa i te pāhonora’a tano. Te tamari’i i roto i te pupu tāorara’a pōpō tei ni’a noa a’e ia ’oe. Te ta’ata tā te tā’āto’ara’a e hina’aro ’ia riro ’ei hoa. I roto i te ao nō te fa’aaura’a, e au ra ē, tē vai ra iho ā te hō’ē ta’ata maita’i a’e.
E nehenehe te mau fa’aaura’a e riro ’ei mea fifi ta’a ’ē mau, nō ni’a i te parau ’ia ora i te ’evanelia. Tē mana’o ra paha ’oe ē, e mea parauti’a a’e vetahi, e ’itera’a pāpū pūai a’e tō rātou, ’aore rā e fāri’i pāpū a’e rātou i te Vārua ma te māramarama a’e ia ’oe. Terā rā, te fa’aaura’a ia ’oe mai te reira ’aita e faufa’a.
I roto i te Buka a Moromona, ’ua ’ite pāpu ’oe ē, e ta’ata fa’atere rahi ’o Nephi ’e e peropheta. E aha rā te mea tā ’oe i ’ite nō te tua’ana ha’apa’o maita’i o Nephi, ’o Samu ? E ’ere ’oia i te ta’ata fa’atere ’aore rā e peropheta mai ia Nephi, ’aita rā i tītauhia iāna ’ia riro mai ia Nephi te huru, nō te riro ’ei mea maita’i roa a’e.
1. ’Ua ti’aturi Samu
’Ua pure Nephi ’e ’ua fāri’i i te hō’ē pāhonora’a nōna iho ē, ’ua fa’aue te Fatu i tō rātou ’utuāfare ’ia haere i roto i te medebara. ’E « ’ua ti’aturi ihora [Samu] i tā [Nephi] mau parau » (hi’o 1 Nephi 2:16–17). ’Aita paha Samu i fāri’i i te hō’ē ’itera’a pāpū maita’i roa. E mau uira’a paha tāna. ’Ua mā’iti rā ’oia e ti’aturi i te mau parau a tōna taea’e, i muri iho ’ua rave mai te au i tōna mau ti’aturira’a. ’Eiaha e fa’aau i tō ’oe fa’aro’o ’aore rā i tō ’oe ’itera’a pāpū i tō vetahi ’ē. Mai te mea e rave ’oe ma te fa’aro’o mai tā Samu i rave, e tupu ri’i ri’i noa i te rahi tō ’oe ’itera’a pāpū nō te Fa’aora. (Hi’o ato’a Te Ha’api’ira’a Tumu ’e te mau Fafaura’a 46:13–14 ; Alama 32.)
2. ’Ua fa’aha’eha’a Samu iāna
’Aita ’o Lamana ’e ’o Lemuela i ’oa’oa ’ia riro tō rāua teina ’o Nephi ’ei fa’atere nō rāua. ’O Samu rā, e tua’ana ato’a nō Nephi, ’ua ti’a iāna ’ia fa’aha’eha’a. ’Ua fa’aro’o ’oia ia Nephi ’e ’ua pe’e i tāna mau a’o (hi’o 2 Nephi 5:3–6). Mai te mea ’ua anihia vetahi ’ē ati a’e ia ’oe ’ia arata’i ’e ’aita ’oe, ’a fa’aha’eha’a ia ’oe ’e ’eiaha e fa’aau. ’A pāturu ia rātou, ’a ha’api’i mai nā roto mai ia rātou ’e ’a rave maita’i a’e nō te mā’iti i te maita’i.
3. ’Ua fa’a’oroma’i Samu
E au ra ē, tē ora nei te mau ta’ata ato’a ’ati a’e ia ’oe i te hō’ē orara’a maita’i roa, tē fa’aruru nei rā te mau ta’ata ato’a i te mau taime fifi. ’Aita ’o Samu i fa’a’erehia. ’Ua riri Lamana ’e ’o Lemuela ia Samu, mai tā rāua i riri ia Nephi. ’Ua tā’iri ato’a rāua ia Samu i te rā’au, mai tā rāua i tā’iri ia Nephi ! (Hi’o 1 Nephi 3:28 ; 1 Nephi 7:6.) ’Ua fa’a’oroma’i rā Samu i tōna mau tāmatara’a. Te fa’arurura’a i te mau taime fifi, e ’ere roa te aura’a ē, ’ua rave ’oe i te hō’ē ’ohipa ’ino. ’Eiaha e fa’aau i tō ’oe mau tāmatara’a i tō vetahi ’ē. ’A fa’a’oroma’i ’e ’a ti’aturi i te Fatu. E tauturu mai ’oia ia ’oe ’ia fa’aruru i te reira.
4. ’Ua ha’amaita’ihia Samu
’Ua parau te metua tāne o Samu, ’o Lehi, ia Samu, « e ha’amaita’ihia ’oe i tō ’oe ato’a ra mau mahana » (2 Nephi 4:11). ’Aita paha Samu i riro ’ei ta’ata fa’atere ’aore rā, ’ei peropheta, ’ua pe’e ha’apa’o maita’i rā ’oia ia Iesu Mesia ’e ’ua ha’amaita’ihia ’oia nō te reira. Nā roto i te tauturu a te Fa’aora, ’ua maita’i a’e ’oia. ’E e nehenehe ato’a ’oe.