« E ti’i i te māramarama ! », Nō te pūai o te feiā ’āpī, Tēnuare 2024.
Mai, pe’e mai
’Api upo’o parau o te Buka a Moromona ; ’Ōmuara’a o te Buka a Moromona
E ti’i i te māramarama !
E ’āfa’i mai te Buka a Moromona i te māramarama ’e te mana i roto i tō ’outou orara’a nō te arata’i ia ’outou i te mau mahana fifi ’e te fa’ahiahia tei tupu i muri mai.
Fa’ahōho’ara’a nā Gabriele Cracolici
I tō’u tamari’ira’a, ’ua au roa vau i te ā’amu nō te taea’e o Iareda i roto i te Buka a Moromona. ’Ua ’ite au i te mea i orahia e ana mai te hō’ē hōho’a teata i roto i to’u feruriraa. Mai te huru ra ē, tē tupu ato’a ra te reira ’a tai’o ai au.
’Ua fa’auehia te taea’e o Iareda e te Fatu ’ia hāmani i te mau pahī ’ia nehenehe ’ōna ’e tōna ’utuāfare ’ia tere nā ni’a i te moana i te « fenua fafauhia » (Etera 2:9). E mea pōiri rā i roto i te pahī. Nō tōna au ’ore e tere nā roto i te pōiri, ’ua ’imi te taea’e o Iareda i te tauturu a te Fatu. ’Ua ui te Fatu iāna : « E aha tā ’oe i hina’aro iā’u ’ia rave ? » (Etera 2:23).
Ma te fa’aro’o rahi, ’ua rave te taea’e o Iareda 16 ’ōfa’i i ni’a i te hō’ē mou’a ’e ’ua pure. ’Ua ani ’oia i te Fatu ’ia toro mai i tōna rima i ni’a i te mau ’ōfa’i, ’ia « ’ana’ana i roto i te pōiri » (Etera 3:4). ’Ua toro maira te Fatu i tōna rima ma te fa’a’ū i tōna manimani rima i ni’a i te ’ōfa’i tāta’itahi nō te hōro’a i te mōrī nō rātou. I tō’u orara’a tā’āto’a, ’ua fa’aiho vau te hōho’a o te Fatu i te tu’ura’a i tōna manimani rima i ni’a i teie mau ’ōfa’i.
Mai te taea’e o Iareda i te fāri’ira’a i te māramarama, e hōro’a ato’a mai te Fatu ’o Iesu Mesia i te māramarama nō ’outou na. ’O ’oia « te māramarama ’e te ora ’o teie nei ao » (3 Nephi 11:10–11). Tē ani nei au ia ’outou ’ia haere e ti’i i te māramarama ! Te tuatāpapara’a i te Buka a Moromona e ha’apūai te reira i tō ’outou fa’aro’o ia Iesu Mesia ’e e tauturu ho’i ia ’outou ’ia tūhono tāmau noa i tōna ra māramarama.
E arata’i ’e e māramarama
’Ua tai’o vau i te Buka a Moromona ’e ’ua ’ite au e rave rahi taime, ma te pāpū, e parau mau te reira. ’Aita roa atu vau i fē’a’a i te reira. ’Ia ’ore ana’e te Vārua e iho mai, ’ia paruparu ana’e au, e iho mai te tahi mana’o pōiri. ’Ia tai’o ana’e rā vau i te Buka a Moromona, e ho’i mai te māramarama. I te tahi taime, te tai’o-noa-ra’a i te hō’ē ’īrava ’ua iho fa’ahou mai te māramarama, terā rā, i te mau taime ato’a e putapū mai iho ā te māramarama ’ia tai’o vau.
Te upo’oti’ara’a te māramarama i ni’a i te pōiri e parau mau te reira nō’u. ’Ua parau mai peresideni Russell M. Nelson ē : « ’Ia tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i roa—i te mau mahana ato’a. »1 Te tumu, nō te mea e fa’arahi te Buka a Moromona i tō ’outou fa’aro’o ia Iesu Mesia. E ’āfa’i mai te reira i te māramarama ’e te mana. E arata’i tāna mau ha’api’ira’a ia ’outou nā roto i te mau tau arora’a ’e te ’ana’anatae i muri nei.
Putapū i te māramarama
E ha’amaita’ira’a nō’u te tāvinira’a i te pae ’o peresideni Nelson. ’Ia tomo mai te peropheta i roto i te hō’ē piha, i reira ra ’ua putapūhia te māramarama rahi a’e i roto i te piha. Tei ni’a iāna te māramarama o te Mesia.
I te tahi taime, mea rave ’atā ’ia ’ite tē putapū nei ’outou i te māramarama o te Mesia. ’Aita ’outou e ’ite nei nā roto i tō ’outou mata tahuti. E tupu mai te reira, mai te putapūra’a pae varua. ’O te aura’a ïa nō te maita’i ’e te ’ino ’e nō te parau mau ’e te ha’avare (hi’o Moroni 7:13–19).
I te mau taime ato’a e mā’iti ai ’outou ’ia hau atu ā mai ia Iesu Mesia ra, e haere ’outou nā roto i te māramarama o te Mesia. Te tai’ora’a i te Buka a Moromona, e ha’apūai te reira i taua māramarama ra.
« ’Oia iho ā, e parau mau te reira ! »
Te ti’aturi pāpū nei au ē, ’ia parau ana’e te mau papa’iraa mo’a ē, « ’A ha’amana’o, ’a ha’amana’o » (Helamana 5:12), te aura’a ra, e’ita te ha’amana’ora’a ia Iesu Mesia ’e ’aore rā te ha’amana’ora’a ē, e ’ua nioa mai na tōna māramarama i te tahi taime ra. Tītau-roa-hia ’ia putapū i tōna māramarama i teienei, ’e fa’ahou ’e fa’ahou ā. ’O terā ïa tā Eric, te hō’ē taure’are’a tamāroa ’āpi, i ’ite i tōna tai’o mātāmuara’a i te Buka a Moromona.
I muri a’e i tōna nohora’a i te tahi vahi ’āpī ’e i te ’ōmuara’a i te ha’api’ira’a tuarua, ’ua fifi Eric i roto i tāna mau piha ’e tē ’ite ra ho’i e mea fifi ato’a te fa’anioara’a e ’ō rātou. ’Ua ha’amata ato’a ’oia i te uiui ē, e ’itera’a pāpū ānei tōna.
Nā ’ō a’e ra ’o Eric ē, « ’Ua ha’amata vau i te tai’o pāpū i te Buka a Moromona nō te taime mātāmua ’o tō’u orara’a ». « ’Ua tai’o ’e ’ua pure au i te mau mahana ato’a. »
’A pure ai Eric nō te ani i te Atua e parau mau ānei te Buka a Moromona, ’ua pāpū iāna ē, e fāri’i ’oia i te hō’ē pāhonora’a, ’aita ra i tupu.
Tau taime i muri mai, ’a haere ai ’oia nā te uru rā’au i muri mai i ’ō na ra, ani fa’ahou atu ra Eric. I taua taime ra, nioa mai nei te mana’o, mai te huru ra ē, ’ua ui mai te Atua iāna, « Eric, e aha iho ra tō ’oe orara’a mai tō ha’amatara’a i te tai’o i te Buka a Moromona ’e i te purera’a i te mau mahana ato’a ? »
’Ua feruri Eric e mea nāhea tōna fa’ahoara’a i te hoa maitata’i ’e tē haere noa atura tāna ha’api’ira’a i te maita’ira’a. Ma te ’ite ore i te reira, nā roto mai i te Buka a Moromona, ’ua fāri’i ’oia i te māramarama ’e te pūai i roto i tōna orara’a.
I muri iho ra ’ua tupu ïa te reira.
’Ua parau Eric, « ’Aita vau i fa’aro’o i te hō’ē reo, ’ua ī rā tō’u ā’au i te Vārua ’a nioa mai ai teie mau parau i tō’u ferurira’a : ‘’Oia mau, e parau mau !’« »’Ua putapū mai ra te hau ’ū’ana, te ’oa’oa ’e te hāro’aro’a rahi i ni’a iā’u.« »«’Ite a’e nei au i tā’u pāhonora’a. »2
’A nu’u i roto i te māramarama
Mai te ’api mātāmua ē tae roa atu i te hope’a, tē fa’a’ite pāpū nei te Buka a Moromona ē « ’o Iesu te Mesia »3 ’e tē ha’api’i nei te reira ia tātou « e aha tā [tātou] e rave nō te fāri’i i te hau i roto i teie orara’a nei ’e te fa’aorara’a mure ’ore i roto i te orara’a a muri atu. »4
’A tuatāpapa ai ’outou i te Buka a Moromona, tē ti’aturi nei au ē, e ’ite ’outou ē, ’ua pāpa’ihia te reira nō ’outou. Te mau ha’api’ira’a tumu i roto i te Buka a Moromona ’e te mau hi’ora’a itoito ’o Nephi, ’o Lehi ’e ’o Saria, ’o Abinadi, ’o Alama, ’o Amuleka, ’o Abisa, te mau tamari’i tamāroa a Mosia, ē rave rau o te vetahi ’o te fa’ateitei, te arata’i ’e te ha’apūai ia ’outou ’ia riro ’ei pipi maita’i roa nā Iesu Mesia ’e tei arata’i ia ’outou ’ia haere ma te ti’aturi i tōna ra māramarama.
Tē fa’a’ite pāpū nei au ē, e te Buka a Moromona o te hō’ē ïa ’ite tao’a rahi ’e te pāpū e, tē ora nei Iesu Mesia ’e ’o ’oia tō tātou ha’apūra’a ’ia tāmāhanahanahia, nō te tīa’ira’a, te hau, te ’oa’oa ’e te māramarama. Tē pure nei au ma tō’u ’ā’au ato’a, ’ia ti’a ia ’outou ’ia ti’i i te māramarama e ’itehia i roto i te Buka a Moromona, ’ia ha’afātata atu ā ia Iesu Mesia, ’e ’ia putapū i te māhanahana o tōna māramarama ’e o tōna aroha, hau atu i tā ’outou i fāri’i nā mua a’e nei.