មានវិធីជាច្រើន ដើម្បីរៀន

ដោយ ដេវីឌ ឌីកសុន

ទស្សនាវដ្តីសាសនាចក្រ

តើចង់ធ្វើអោយពិភពលោកកាន់តែល្អប្រសើរជាងនេះដែរឬទេ ? វាចាប់ផ្ដើមដោយការរៀនពីរបៀប ។

រូបភាព

យុវនារីដែលកំពុងសម្លឹងមើលកញ្ចក់

រចនារូបភាពដោយ ឌីន ម៉ាក់អាដាម

តើការរៀនពីរបៀបកាត់សក់ទាក់ទងគ្នាយ៉ាងដូចម្ដេចជាមួយនឹងការរៀបចំពន្លឺឆាក ?

លីសាដែលជាយុវមជ្ឈិមវ័យម្នាក់ ដែលឥឡូវនេះរៀនឆ្នាំដំបូងនៅមហាវិទ្យាល័យរបស់នាងនិយាយថា « ទាំងអស់ជាផ្នែកនៃផែនការរបស់ខ្ញុំ » ។

លីសាបានចាប់ផ្តើមសាលាសម្អាងនៅអាយុ ១៦ ឆ្នាំ ។ នាងថែមទាំងបានរកឃើញកម្មវិធីមួយដែលអនុញ្ញាតឲ្យនាងរៀនរយៈពេលខ្លីនៅវិទ្យាល័យដើម្បីឲ្យនាងអាចទៅហ្វឹកហាត់នៅសាលាសម្អាងនៅពេលរសៀលទៀតផង ។ ការពិតដែលថាឥឡូវនេះនាងកំពុងសិក្សានៅមហាវិទ្យាល័យផ្នែកបច្ចេកវិទ្យាមហោស្រព មិនមានន័យថាផ្នែកសម្អាងទាំងមូលមិនដំណើរការនោះទេ ។ តាមពិត អ្វីៗគ្រប់យ៉ាងកំពុងលាតត្រដាងយ៉ាងច្បាស់តាមរបៀបដែលនាងបានសង្ឃឹមទុក ។

លីសានិយាយថា « ខ្ញុំចង់មានជំនាញមួយដែលខ្ញុំអាចប្រើដើម្បីជួយបង់ថ្លៃមហាវិទ្យាល័យ » ។ « លើសពីនេះទៀត វាអនុញ្ញាតឲ្យខ្ញុំបម្រើមនុស្សដទៃ ហើយសន្សំប្រាក់លើការកាត់សក់របស់គ្រួសារអស់មួយជីវិតខ្ញុំ ! »

មូលហេតុ ដែលយើងរៀន

« ព្រះវរបិតាសួគ៌មានព្រះទ័យចង់ឲ្យបុត្រី និងបុត្រារបស់ទ្រង់រៀនសូត្រជានិច្ច » ។^១ នេះគ្រាន់តែជាវិធីមួយចំនួនដែលការរៀនពេញមួយជីវិតគឺជាពរជ័យដ៏ធំធេងមួយ ៖

អ្នកអាចជួយ និងបង្រៀនមិត្តភក្តិ គ្រួសាររបស់អ្នក និងអ្នកដទៃទៀតបានប្រសើរជាងមុន ។
អ្នកអាចបម្រើនៅក្នុងសាសនាចក្រ និងក្នុងសហគមន៍របស់អ្នកកាន់តែប្រសើរឡើង ។
អ្នកនឹងមានជំនាញដែលទីផ្សារចង់បានកាន់តែច្រើនសម្រាប់ភាពខ្លួនទីពឹងខ្លួន ។
អ្នកនឹងអាចយកចំណេះដឹងរបស់អ្នកទៅជាមួយអ្នកបន្ទាប់ពីអ្នកស្លាប់ទៅ ។
ពេលដែលប្អូនហាត់ និងធ្វើការខួរក្បាលរបស់អ្នកយ៉ាងសកម្ម នោះវាអាចបន្តមានសុខភាពកាន់តែល្អប្រសើរឡើយ ។

របៀប ដែលយើងរៀន

តាមរយៈព្រះគម្ពីរ យើងរៀនថាយើងគប្បី « ស្វែងរកការរៀនសូត្រ គឺដោយសារការសិក្សា និងដោយសារសេចក្ដីជំនឿផង » ( គោលលទ្ធិ និងសេចក្ដីសញ្ញា ៨៨:១១៨ សូមមើលផងដែរ ១៣០:១៨ ) ។ បច្ចប្បន្ននេះមានឳកាសកាន់តែច្រើនសម្រាប់ការរៀនដូចជា ៖

ការសិក្សាជាផ្លូវការ រួមមានមហាវិទ្យាល័យ សាកលវិទ្យាល័យ និងសាលាវិជ្ជាជីវៈ ។
ការស្វែងរកចំណេះដឹង « សៀវភៅដ៏ល្អៗបំផុត » ( គោលលទ្ធិ និងសេចក្ដីសញ្ញា ៨៨:១១៨ ) ។ អ្នកក៏អាចបន្ថែម « ប្រភពឌីជីថលដ៏ល្អៗបំផុត » ផងដែរ ។
ការរៀនដោយផ្ទាល់ពីមិត្តភក្តិ និងសមាជិកគ្រួសារ ។

គំនិតសម្រាប់សកម្មភាព ! រៀបចំសកម្មភាពបង្រៀន « ផ្លាស់ប្ដូរជំនាញ » នៅក្នុងសាខា ឬវួដរបស់អ្នក ។ មនុស្សគ្រប់គ្នាបង្ហាញខ្លួនដោយត្រៀមជាស្រេចដើម្បីបង្រៀនអ្វីមួយដែលពួកគេដឹងពីរបៀបធ្វើ ។
ការអធិស្ឋាន និងការសិក្សាព្រះគម្ពីរ ។
រស់នៅដោយស្មោះត្រង់ដើម្បីមានភាពសក្តិសមនឹងភាពជាដៃគូដ៏ខ្ជាប់ខ្ជួននៃព្រះវិញ្ញាណបរិសុទ្ធដែល « នឹងបង្រៀនអ្នករាល់គ្នាពីគ្រប់សេចក្ដីទាំងអស់ » ( យ៉ូហាន ១៤:២៦ ) ។
ការពិសោធន៍ គំនិតច្នៃប្រឌិត និងកិច្ចខិតខំ ។ រឿងដ៏អស្ចារ្យអំពីចំណេះដឹងគឺថា យើងរៀនបន្ថែមជារៀងរាល់ថ្ងៃ ។ អ្នកអាចបន្ថែមទៅកាន់ចំណេះដឹងដែលមនុស្សក្នុងពិភពលោកមាន ។

ពេល ដែលយើងរៀន

ទីបំផុត មិនថាអ្នកកំពុងរៀនពីរបៀបកាត់សក់ដូចលីសា ឬរៀនពីរបៀបបង្កើតបច្ចេកវិទ្យាថាមពលជំនាន់ក្រោយនោះទេ ប្រធាន ណិលសុន រំឭកយើងថា តែងតែមានពេលវេលាដ៏ល្អបំផុតដើម្បីបំពេញកិច្ចការបែបនេះ ៖

លោកបានបង្រៀនថា « មែនហើយ យើងគួរតែរៀនពីអតីតកាលហើយមែនហើយយើងគួរតែរៀបចំសម្រាប់អនាគត » ។ « ប៉ុន្តែយើងអាចធ្វើវាបានតែ ឥឡូវ ប៉ុណ្ណោះ ។ ឥឡូវ គឺជាពេលដែលយើងអាចរៀន ។ … ឥឡូវ គឺជាពេលដែលយើងអាចផ្ដល់ពរដល់អ្នកដទៃ » ។^២

ឥឡូវ បន្ទាប់មក ។ តើអ្នកចង់រៀនពីអ្វីថ្ងៃនេះ ?