ការរុករកថ្មី

ដោយ ប្រាយអិន វិងគ្ល័រ

ទស្សនាវដ្តីសាសនាចក្រ

នេះជាមេរៀនដែលប្រើវត្ថុដ៏សប្បាយមួយដែលអ្នកអាចបង្រៀនគ្រួសារ ឬថ្នាក់រៀនរបស់អ្នកអំឡុងការសិក្សា ចូរមកតាមខ្ញុំ នៅខែនេះ ។

នៅពេលដែលអ្នកសាកល្បងអ្វីមួយថ្មី អ្នកអាចមានអារម្មណ៍ដូចជានីហ្វៃដែលកំពុងស្វែងរកផ្ទាំងលង្ហិនដែរ « ដោយមិនដឹងជាមុនសោះឡើយថា តើ [ អ្នក ] នឹងត្រូវធ្វើអ្វីខ្លះ »( នីហ្វៃទី១ ៤:៦ ) ។ តែសូមចាំថា អ្នកមិននៅតែឯងឡើយ ជាពិសេសពេលអ្នកធ្វើអ្វីមួយដែលព្រះបានបញ្ជា ។

១. ដោយមិនបានដឹងជាមុន

សូមចែកក្រដាសមួយសន្លឹកដល់មនុស្សម្នាក់ៗ ។ ប៉ុន្តែ កុំប្រាប់ពួកគេថាវាសម្រាប់អ្វី ។ ផ្ទុយទៅវិញ សូមនិយាយអំពីរបៀបដែលជាញឹកញាប់យើងទទួលវិវរណៈពីព្រះមួយជំហានម្ដងៗ ដូចជានីហ្វៃទៅយកផ្ទាំងលង្ហិន ( សូមមើល នីហ្វៃទី១ ៣–៤ ) ឬសង់សំពៅដូច្នោះដែរ ( សូមមើល នីហ្វៃទី១ ១៧–១៨ ) ។

២. មួយបន្ទាត់ម្តងៗ

ឥឡូវនេះមកដល់វគ្គដ៏សប្បាយ ! សូមអានការណែនាំទាំងនេះឮៗម្ដងមួយៗដើម្បីជួយក្រុមរបស់អ្នកបត់ស្នាដៃអាថ៌កំបាំងផ្ទាល់ខ្លួនរបស់ពួកគេ ។ ( វាពិបាកដែលគ្មានរូបភាព ! ប្រសិនបើពួកគេត្រូវការជំនួយបន្ថែម សូមឲ្យពួកគេមើលមួយជំហានម្ដងៗ ) ។

៣. វិវរណៈ ៖ ដឹកនាំដោយព្រះវិញ្ញាណ

ឥឡូវនេះ គ្រួសារ ឬថ្នាក់របស់អ្នកគួរតែមានទូកក្រដាសថ្មីស្រឡាងមួយ ! សូមចំណាយពេលពីរបីនាទីដើម្បីនិយាយអំពីពេលវេលាដែលអ្នកទាំងអស់គ្នាត្រូវការការណែនាំរបស់ព្រះ « មួយបន្ទាត់ម្ដងៗ » ។ អ្នកអាចសរសេរ ឬគូរអ្វីមួយនៅលើទូករបស់អ្នកដើម្បីចងចាំគ្រាទាំងនោះ ។

ឥឡូវនេះ ពេលដែលជីវិតជួបរឿងថ្មីៗ សូមកុំភ្លេចស្វែងរកវិវរណៈពីព្រះ ។ សូមចាំថា ទ្រង់នឹងតែងតែរៀបចំផ្លូវមួយសម្រាប់អ្នកដើម្បីធ្វើអ្វីដែលទ្រង់បានសុំ ( សូមមើល នីហ្វៃទី១ ៣:៧ ) ។

សេចក្តីណែនាំ

កាន់ក្រដាសដោយដាក់គែមខ្លីនៅខាងលើ ។ បត់ពាក់កណ្តាល ពីខាងលើទៅខាងក្រោម ។
បត់ពាក់កណ្តាលម្តងទៀតពីឆ្វេងទៅស្តាំ បន្ទាប់មកលាតស្នាមផ្នត់ដែលអ្នកទើបតែបត់នោះ ។
ជាមួយនឹងគែមដែលបានបត់នៅផ្នែកខាងលើ យកជ្រុងកែងពីរនៅខាងលើ ហើយបត់វាចុះទៅស្នាមផ្នត់នៅចំកណ្តាល ។ វាគួរតែមើលទៅដូចជាត្រីកោណដែលមានចតុកោណនៅខាងក្រោម ។
យកសន្ទះក្រដាសតូចនៅផ្នែកខាងក្រោមនៃត្រីកោណរបស់អ្នក ហើយបត់ស្រទាប់ខាងលើឡើង ។ ត្រឡប់វា ហើយធ្វើដូចគ្នាជាមួយនឹងសន្ទះក្រដាសម្ខាងទៀត ។
ទាញបើកផ្នែកខាងក្រោម ដើម្បីឲ្យវាមើលទៅដូចជាមួក ។
សូមបន្តទាញបើករហូតដល់ចុងទាំងពីរជួបគ្នា ហើយរាបស្មើទៅជារូបការ៉ូ ។
ជាមួយនឹងផ្នែកខាងក្រោមបើកចំហរ សូមបត់ស្រទាប់ទីមួយឡើងទៅលើកំពូលរាងការ៉ូនោះ ។ ត្រឡប់ ហើយធ្វើដូចគ្នានៅម្ខាងទៀត ។ វាគួរតែមើលទៅដូចជាត្រីកោណ ។
សូមទាញបើកផ្នែកខាងក្រោម ហើយធ្វើឲ្យវារាបស្មើដូចដែលអ្នកបានធ្វើនៅក្នុងជំហានទី ៥ និងទី ៦ ឲ្យទៅជារាងការ៉ូ ។
ផ្នែកខាងលើនៃការ៉ូរបស់អ្នកគួរតែមានសន្ទះរាងត្រីកោណពីរនៅខាងឆ្វេង និងខាងស្តាំ ។ សូមទាញចំណុចទាំងនោះចេញ ហើយធ្វើឲ្យវារាបស្មើដើម្បីអ្នកមានរាងចតុកោណព្នាយដាំក្បាលចុះ ។ បន្ទាប់មករុញចំហៀងចេញដើម្បីជួយវាឲ្យឈរដោយខ្លួនឯង ។