Mga Tanong at mga Sagot

“Kailangan ko ng payo sa pagpaplano ng mga aktibidad para sa mga kabataan. Ano ang ilang magagandang ideya?”

“Magtuon sa mga pangangailangan ng iyong klase [o korum] at magplano ng iba’t ibang paglilingkod at aktibidad para pagkaisahin at palakasin ang mga miyembro ng klase, patatagin ang mga patotoo, pagpalain ang iba, at magsaya.”

“What Should I Focus On?,” My Calling as a Young Women Class Presidency Member, Gospel Library.

Maghalinhinan at Sama-samang Magplano

“Naghahalinhinan kami bawat linggo sa pagpaplano ng mga aktibidad. Nakakaalis ito ng stress sa isang tao, at nakakakuha kami ng iba’t ibang mga ideya. Makakatulong din ang pagkakaroon ng isang aktibidad kung saan nagpaplano kayong lahat. Gustung-gusto naming maglaro ng games, magtawanan, at maglingkod.”

Adelynne S., 17, Utah, USA

Dalhin ang Iba sa Tagapagligtas

“Itanong sa mga miyembro ng iyong klase o korum kung ano ang ikinasisiya nilang gawin. Pumili ng mga aktibidad na mas maglalapit sa mga kabataan sa isa’t isa at sa Tagapagligtas, at sama-samang magsaya! Noon pa man ay isa na sa mga paborito ko ang mga aktibidad sa paglilingkod. Lagi akong may mga bagong kaibigan!”

Katie G., 18, Washington, USA

Subukang Isama ang Lahat

“Ang mga aktibidad na maaaring makilahok ang lahat ay maaaring magpadama sa iba na mas tanggap sila. Ang pagtatanong sa inyong grupo kung anong mga libangan o iba pang mga bagay na ikinasisiya nila ay napakalaking tulong.”

Lily D., 13, Arizona, USA

Tatlong Tanong

“Madalas magplano ng mga aktibidad ang klase ko batay sa tatlong tanong: Ano ang kailangan nating pagbutihin pa? Sino ang kailangan nating suportahan? Oras na ba para sa isang aktibidad na mas kaunting oras at lakas ang iuukol kumpara sa iba pang mga aktibidad? Nasasaisip ang mga bagay na ito, manalangin, magnilay-nilay, at mag-usap-usap. Kaya ninyo ito!”

Isabella R., 14, Oregon, USA

Espirituwal na Kuwadro

“Kakailanganin mo ng ilang magasin ng Simbahan para magupit mo ang mga espirituwal na larawan o mensahe na nagbibigay-inspirasyon sa iyo. Pagkatapos ay ilagay sa isang kuwadro ang ginupit mo na kakaiba ang pagkakaayos. Maaari mo itong ilagay sa isang lugar na matitingnan mo ito.”

Florence M., 14, British Columbia, Canada

Ang mga sagot ay nilayong makatulong at magbigay ng pananaw, hindi bilang mga opisyal na pahayag ng doktrina ng Simbahan.

Ano sa Palagay Mo?

“Paano ko malalaman na ang binabasa ko sa Aklat ni Mormon ay totoo?”

Ipadala ang iyong sagot at larawan bago sumapit ang Pebrero 15, 2024.

Mag-email sa amin sa [e-mail]. O pumunta sa ftsoy.ChurchofJesusChrist.org at i-klik ang “Submit Your Work.” Mag-sign in gamit ang iyong Account sa Simbahan at pagkatapos ay piliin ang “For the Strength of Youth” sa ilalim ng “Choose Magazine.” I-klik ang “Add File” para piliin ang iyong file at mga larawan, at pagkatapos ay i-klik ang “Submit” para i-upload at ipadala sa amin ang iyong file.

Ang mga sagot ay maaaring i-edit para paikliin o gawing mas malinaw.