“Fafaga Lou Agaga i le Tatalo,” Mo Le Malosi o le Autalavou, Ape. 2024.
Sau, Mulimuli Mai ia te A’u
Fafaga Lou Agaga i le Tatalo
O le faamanuiaga o le fesootai atu i lou Tama Faalelagi o loo avanoa mo oe i soo se mea ma taimi uma.
Na e lagonaina muamua le fiaai. O le lagonaina o le fiaai o le ala lea a lou tino e ta’u atu ai ia te oe e manaomia se meaai. Ma a e fiaai, ua e iloa le mea e tatau ona e faia—ai!
O loo i ai foi i lou agaga ni auala e faailoa atu ai ia te oe pe a e manaomia le fafagaina faaleagaga. E pei lava ona tele ituaiga o meaai e mafai ona e taumafaina pe a e fiaai, e tele mea e mafai ona e faia e faatumu ai lou matelaina faaleagaga. E mafai ona e “taumamafa fiafia i afioga a Keriso” i tusitusiga paia ma upu a perofeta (2 Nifae 32:3). E mafai ona e auai soo i le lotu ma ai ma inu i le faamanatuga (tagai i le Mataupu Faavae ma Feagaiga 59:9). E mafai ona e auauna atu i le Atua ma Ana fanau.
Ae e i ai se punavai se tasi o meaai faaleagaga o loo avanoa mo oe i taimi uma, i taimi uma o lou olaga, e tusa lava po o a ou tulaga. E mafai ona e fesootai e le aunoa ma le Tama Faalelagi e ala i le tatalo.
“Sa Matelaina Lo’u Agaga”
A o sailia e Enosa ia manu i le vao, sa ia mafaufau i mea na aoao atu e lona tamā “e uiga i le ola e faavavau, ma le olioli o le au paia.” O nei aoaoga “sa goto loloto ifo i [lona] loto” (Enosa 1:3).
I lenei tulaga faaleagaga o le mafaufau, sa lagona ai e Enosa se manaoga malosi: “Sa matelainalo’u agaga,” sa ia fai mai ai (Enosa 1:4; faaopoopo le faamamafa).
O le a le mea na faia e Enosa ina ua ia lagonaina lenei matelaina faaleagaga? “Sa ou tootuli i lalo i luma o Lē na faia a’u,” sa ia fai mai ai, “ma ou tagi atu ia te ia i le tatalo malosi ma le faatauanau mo loʼu lava agaga” (Enosa 1:4).
Sa maoae tele le matelaina faaleagaga o Enosa lea na ia tatalo ai i le ao atoa ma le po. Mulimuli ane, sa, tali mai le Atua i lana tatalo ma faamagalo ana agasala. Sa lagona e Enosa ua tafi ese lona ta’usalaina ma aoao ai e uiga i le mana o le faatuatua ia Iesu Keriso. Ona ia sasaa atu lea o lona agaga atoa mo lona nuu ma ona fili. Sa ia osia feagaiga ma maua folafolaga mai le Alii ma alu atu i lona nuu ma faasoa atu mea sa ia faalogo i ai ma vaaia (tagai i le Enosa 1:4–19).
E le o tatalo uma o le a taliina i se auala maoae, ae o lou aafiaga i le tatalo e mafai lava ona anoa ma suia ai le olaga. O nisi nei o lesona taua e mafai ona e aoaoina mai le tatalo malosi a Enosa:
-
O le taumafai e ola atoatoa i le talalelei e mafai ona fesoasoani e te lagonaina ai lou matelaina faaleagaga.
-
O lou matelaina faaleagaga e mafai ma e tatau ona e tulivae ai e saili le fesoasoani a le Tama Faalelagi.
-
O le tatalo i le Tama Faalelagi e mafai ona fesoasoani e faamalie ai lou matelaina faaleagaga—ona sosoo ai lea ma nisi!
-
E mafai ona e tatalo i soo se mea, i soo se taimi.
-
O le tatalo e mafai ona fesoasoani ia te oe e salamo.
-
O le tatalo e mafai ona faamalosia ai lou faatuatua ia Iesu Keriso.
-
E mafai ona e maua se molimau patino e faapea, e faafofoga mai lou Tama Faalelagi ia te oe ma silafia oe.
-
O le molimau ma le malosi e te maua e ala i le tatalo e mafai ona fesoasoani ia te oe e auauna atu ai ma faamalosi i isi.
O Lo’u Aafiaga i le Mana o le Tatalo
Ina ua toeitiiti atoa lo’u 16 tausaga, sa fai mai lo’u epikopo musuia ou te a’oa’oa la matou vasega o le Aoga Sa a le autalavou e uiga i le mauaina o se molimau o le talalelei e ala i le tatalo. A o o’u tuputupu a’e, sa ou faaaluina le taimi e suesue ai le Tusi a Mamona ma lagonaina i taimi uma e moni le Ekalesia. Sa ou talitonu lava i taimi uma i le Faaola o Iesu Keriso, ae ou te le’i faatauaina i le loto le folafolaga a Moronae, o loo maua i le Moronae 10:4–5, ma tatalo e uiga i le moni o le talalelei. Ou te manatua lo’u lagonaina afai o le a ou aoao atu e uiga i le auala e maua ai se molimau e ala i le tatalo, e tatau ona ou tatalo mo sa’u lava molimau. Sa matelaina lo’u agaga—atonu i se auala ese mai ia Enosa, ae sa ou lagonaina pea se manaoga faaleagaga.
A o o’u saunia le lesona, sa ou tootuli ma tatalo ma lo’u loto atoa. Ina ua ou fesili atu i le Alii pe moni le talalelei, sa oo mai i lo’u loto se lagona matagofie tele—o lena leo filemu ma le itiiti e faamautu mai ia te a’u e moni ma e tatau ona faaauau pea ona ou faia le mea sa ou faia.
Sa matua malosi lava le lagona ma sa le mafai ai ona ou le amanaiaina lena tali ma faapea atu ou te le’i iloaina. Sa ou lagonaina le fiafia tele! O le Aso Sa na sosoo ai, sa ou tu ai i luma o tagata o la’u vasega ma molimau atu o le a tali mai le Tama Faalelagi i a latou tatalo pe afai latou te faatuatua.
O Elder Soares a o alii talavou
Sa tumau pea lenei molimau ia te a’u. Ua fesoasoani ia te a’u e faia ai faaiuga, aemaise lava i taimi faigata. Ua mafai ai ona ou molimau atu i tagata, ma le talitonuga maumaututu, e mafai ona latou maua tali mai le Tama Faalelagi pe afai latou te tatalo i le faatuatua. E moni lenei mea mo a’u i lo’u tulaga o se faiaoga i lena vasega a le autalavou o le Aoga Sa, o se faifeautalai, ma e oo lava i aso nei o se Aposetolo.
O Le O Afea ma le O Le A o le Tatalo
Ioe, e le na o lou tatalo pe a e lagonaina se manaoga faaleagaga e faapitoa le malosi. O le a la le taimi e tatau ona e tatalo ai? Ma o le a le mea e tatau ona e tatalo ai? O le tali puupuu o le: soo se taimi ma soo se mea lava.
E saunia pea lava pea lou Tama Faalelagi e faafofoga mai ia te oe ma e finagalo ia e tatalo soo atu ia te Ia. E tatau ona e “filifili faatasi ma le Alii i au mea uma e fai” (Alema 37:37) ma tatalo i le taeao, aoauli, ma le po. E tatau ona e tatalo i le fale, i le galuega, i le aoga—soo se mea e te ono i ai ma i soo sau taumafaiga lava (tagai i le Alema 34:17–26). E tatau ona outou tatalo faatasi ma lou aiga (tagai i le 3 Nifae 18:21), i “luma o tagata ma i le na’o oe” (Mataupu Faavae ma Feagaiga 81:3), i lou loto pe a e le tatalo aloaia (tagai i le Alema 34:27), ma i taimi uma i le Tama i le suafa o Iesu Keriso (tagai i le 3 Nifae 18:19–20).
O Le Faalatalata Atu i Lou Tama Faalelagi
O se tasi o mau ou te fiafia lava i ai o loo aoao mai ai le auala e tatau ona tatou faalatalata atu ai i lo tatou Tama Faalelagi pe a tatou tatalo: “Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10). A e lotomaualalo ma usiusitai, o le a faatasi le Tama Faalelagi ma oe. O le a Ia taitai oe i le lima. O le a Ia tali mai i au tatalo e tusa ai ma Lona lava finagalo, ala, taimi, ma le malamalama atoatoa i mea e lelei mo oe.
O au tatalo e le aunoa ma le fai soo e taua i le fafagaina faaleagaga o lou agaga. O fesootaiga ma le Tama Faalelagi e ala i le tatalo o loo avanoa ma talileleia i soo se mea ma taimi uma. Ou te tatalo o le a outou manatuaina lenei, ma faapelepele i avanoa e faalatalata atu ai i le nofoalii o le Atua ma maua faamanuiaga mai ia te Ia.