E Mo’i?

Saunia e David A. Edwards

O Mekasini a le Ekalesia

Ioe. E mo’i. Na aoao mai e le perofeta o Iakopo se ki e malamalama ai i le mea moni silisili.

“Ia mo’i.” “Ia faamaoni.” “Ola i le lalolagi moni.” O nisi taimi e fai mai ai e tagata ni lafoga faapenei pe a latou manatu o se tagata e le iloa se mea pe o loo mo’omo’o foi.

Ma e moni—o le le amanaiaina o le mea moni e mafai ona avea o se faafitauli moni. (E te le manao e mafaufau faapena ia tagata, mo se faataitaiga, o le tulafono o le kalave e le faatatau ia i latou. O lena mea e ono iu leaga lava.)

Ae o le mea moni e telē—e telē atu nai lo le mea e iloa e le toatele o tagata. O le mea moni, o le vaega aupito telē ma sili ona taua o le mea moni e sili atu nai lo na o lenei olaga ma le lalolagi faaletino tatou te vaaia e ala i o tatou sane e lima. E na o le faaleagaga e mafai ona iloa ai.

Na aoao mai e le perofeta o Iakopo i le Tusi a Mamona nisi o upumoni taua e uiga i lenei mea moni e telē atu ma le auala e mafai ai ona tatou iloa ma malamalama i ai.

Aisea e Leai Ai?

Na aoao e Iakopo lona nuu e uiga i le mea moni silisili o loo i ai: O Iesu Keriso ma Lana matafaioi i le fuafuaga a le Tama Faalelagi. Ona faapea mai lea o Iakopo, “Aua tou te ofo i loʼu taʼu atu o nei mea ia te outou; aua aisea tatou te lē tautatala ai e uiga i le togiola a Keriso, ma saili ia maua se malamalama atoatoa e uiga ia te ia, e pei ona tatau ona tatou saili ia maua se malamalama e uiga i le toetutu ma le lalolagi a sau?” (Iakopo 4:12).

I lenei faamatalaga, na aoao mai ai e Iakopo nisi o upumoni taua:

E tele atu isi mea nai lo na o le olaga lenei—e i ai se toetu.
E tele atu isi mea snai lo na o lenei lalolagi—e i ai se “lalolagi o le a oo mai.”
O le mea aupito taua, na faia e Iesu Keriso nei mea uma mo i tatou e ala i Lana taulaga togiola.
E mafai ona tatou maua se malamalama e uiga i nei mea.

O mea moni tetele na. Ma e pei ona fai mai Iakopo, aisea e le tautala ai e uiga ia i latou?

Ona i ai lea o se tala a Iakopo e faatatau i le auala na te iloa manino ai nei mea ma talanoa manino ai e uiga ia i latou.

“O Mea e Pei Ona I Ai”

Sa aoao mai Iakopo: “E folafola mai e le Agaga le upumoni ma e le pepelo lava. O le mea lea, e fetalai mai o ia e uiga i mea e pei ona i ai moni lava, ma e uiga i mea e pei o le a i ai moni lava” (Iakopo 4:13).

E na o le Agaga Paia lava e mafai ai ona tatou iloa le upumoni—“i mea e pei ona i ai moni lava,” o le mea moni atoatoa. E faapefea ona tatou faia lena mea?

O le mea moni e faapea, o le tele o le malamalama o se tagata i le mea moni—faaletino ma le faaleagaga—e faalagolago i le faatuatuaina.

Tatou te faatuatuaina o tatou sane e lima e tuuina mai ia i tatou se aafiaga tuusao i le mea moni faaletino. Tatou te tuu foi lo tatou faatuatuaga i punaoa i fafo atu—matua, faiaoga, tusi, tusiga, uepisaite, ata, faafanua, vitio—o ituaiga mea uma. I le aluga o taimi, tatou te faamaonia ai mea moni e ala i le tatou oo i ai o i tatou lava, pe tatou te vaai foi le faamalosia o mea moni.

E pei lava ona tatou aoao e faatuatuaina o tatou sane e lima, e mafai foi ona tatou aoao e faatuatuaina lo tatou tomai e lagonaina mea faaleagaga.

Ma e manaomia ona tatou aoao e faatuatuaina ni punavai patino i fafo atu i mataupu faaleagaga. E manaomia ona tatou faatuatua i le Tama Faalelagi ma Iesu Keriso ma faatuatuaina i Laua ma lo La alolofa. E manaomia ona tatou faatuatuaina le Agaga Paia. E manaomia ona tatou faatuatuaina perofeta, tusitusiga paia, ma isi punavai o upumoni faaalia. Ma e manaomia ona tatou faatuatua i molimau a isi.

A o tatou faatinoina le faatuatua ma le faatuatuaina, e mafai ona tatou maua e i tatou lava ni aafiaga faaleagaga ma vaai i le faamalosia o upumoni faaleagaga i le aluga o taimi. O le a tatou vaaia le telē atu o le mea moni na talanoa i ai Iakopo:

E moni Iesu Keriso. E moni Lana taulaga togiola. E moni Lona Toetu. E moni foi lo tatou toetutu. E moni lenei olaga. Ma e moni le olaga pe a mavae le oti. E moni le fuafuaga a le Tama Faalelagi. O mea nei e pei ona i ai moni ma o le a i ai moni lava. O le taliaina o lenei mea moni e mafai ona suia ai o tatou olaga e faavavau.