“Ia Avea ma Uo E te Manaomia,” Mo Le Malosi o le Autalavou, Ape. 2024.
Ia Avea ma Uo E te Manaomia
E mafai ona e aapa atu ma laveai se tasi.
Ata na tusia e Uran Duo
Pe na e savali atu ea i se patī, siva, po o se isi gaoioiga ma saili ma le naunautai mo se tasi e te iloaina? Sa e manao ia latou maua oe ma laveai oe mai lou tuuatoatasi. I se isi itu, pe na e savali atu ea i totonu o se potu tumutumu ma matauina se isi tagata o tutu na o ia? Pe latou te le o faatalitali foi mo se tasi e laveai i latou?
Faatino, Aua le Faatali
E manaomia e i tatou taitoatasi se uo. O lona uiga e i ai isi tagata o loo faatalitali mai ia oe e avea ma a latou uo.
Na saunoa mai Peresitene Henry B. Eyring, Fesoasoani Lua i le Au Peresitene Sili, “Tatou te manaomia uma lava ni uo moni e alolofa ia i tatou, e faalogo mai ia i tatou, e faaali mai ia i tatou le ala, ma molimau mai i le upumoni ia i tatou ina ia mafai ai ona tatou faatumauina le mafutaga a le Agaga Paia.”1 Afai tatou te manaomia uma se uo moni, ona manaomia lea ona avea i tatou ma se uo moni.
Afai e avea oe o le uo lelei o loo sailia e isi tagata, e le manaomia ona e faatali mo i latou e sue oe. E mafai ona e sailia isi o e manaomia se uo ma alu muamua e laveai i latou!
O Mea e Fai e Uo Moni
O nisi taimi e manatu ai tagata o le avea ma se uo lelei o lona uiga o le lagolagoina o faaiuga a au uo—e tusa lava po o le a le sese po o le matautia o na faaiuga. Ae e pei ona aoao mai Peresitene Eyring, e faaali mai e se uo lelei le ala e faatumauina ai le Agaga Paia ia i tatou.
Ina ia avea ma se uo lelei, o lona uiga la, o nisi taimi e manaomia ai ona tatou taialaina lemu a tatou uo i le ala o le avea ma soo. O le vaai maualalo i a tatou uo ma le faamasinosino o le a le fesoasoani lea. Ae afai tatou te alolofa moni ia i latou, o le a tatou mananao e alolofa ia i latou i le saogalemu o le ala o feagaiga e pei ona faia e le Faaola. E le afaina po o le a lava le umi e alu ai.
O ai o manaomia oe ia faaloaloa atu le lima o le faauoga e laveai i latou i le asō?