“Vaifofo i Mafutaga Oona,” Mo Le Malosi o le Autalavou, Ape. 2024.
Vaifofo i Mafutaga Oona
O mea nei e faaaoga e tetee atu ai i mea e afaoma ai a tatou mafutaga.
O se vaifofo o se vailaau e feteenai ma se mea faaoona po o se mea oona. I se tulaga faafaatusa, o se vaifofo o se mea e “faamalolo” ai se lagona po o se tulaga leaga. Mo se faataitaiga, na saunoa Russell M. Nelson Peresitene, “O le alofa mama o le vaifofo lea i finauga.”1
E le o mea oona uma faaletino e i ai ni vaifofo. Ae e ala mai i le Faaola, e mafai ai ona tatou maua fofo mo o tatou aafiaga oona faaletagata lava ia—e aofia ai ma aafiaga oona i a tatou mafutaga ma isi.
Aua Ne’i [E] Faa’ona!
E leai se isi e atoatoa. E tofu uma i tatou ma o tatou taimi (po o itula, po o aso … ) lea tatou te le pei ai o Keriso e pei ona tatou iloa e tatau ona tatou faapei ai. E manaomia ona tatou mata’ituina i tatou lava ma ia mautinoa tatou te le o faa’onaina tagata o siomia i tatou.
O nisi nei o vaifofo i nisi o mea oona masani:
Mea oona: Lotoleaga
Aisea e foliga mai ai e sili atu le fiafia/maua e isi tagata ia meatotino/mauaina faamanuiaga e tele atu nai lo a’u?
O ata na tusia e Corey Egbert
O se vaifofo: Lotofaafetai.
Ia faafetai mo mea ua tuuina atu e le Alii ia te oe. Taumafai e mulimuli i le fautuaga o se viiga tuai e sili ona fiafia i ai: faitau moni ou manuia! Faitau, ta’i tasi. E te ofo tele i mea ua fai e le Alii mo oe.2
Mea oona: Ita.
Ma le loto i ai pe leai, ua faaita a’u e se tasi.
O se vaifofo: Faamagalo atu.
O le faamagalo atu o le tasi i le isi o se poloaiga moni lava (tagai i le Mataupu Faavae ma Feagaiga 64:10). O le faamanuiaga faaopoopo o le, a tatou faamagalo atu i isi, e faamagalo i tatou e le Atua (tagai i le Mataupu Faavae ma Feagaiga 82:1). Ma le isi, e masani ona faaitiitia lo tatou ita pe a uma ona tatou faamagalo atu i isi.
Mea oona: Faamaualuga.
Ou te le fia tautino sa ou sese. Ou te le manao e faataunuu se tofiga ona ou te manatu e maualalo ia te a’u. Ou te le fia tafafao ma na tamaiti ona e le o i ai i la’u au fegalegalea’i.
O se vaifofo: Lotomaualalo.
O le mea taua lava: ia e pulea oe lava. O i tatou o fanau a le Atua, ma e alofa o Ia ia i tatou—ae i le taimi lava lea, o i tatou uma o tagata soifua sese o e e le “tusa ma le efuefu o le eleele” (Mosaea 2:25). Ua tuuina mai e le Alii ia i tatou—uma lava—vaivaiga ina ia tatou lotomaualalo ai (tagai i le Eteru 12:27). Ma e sili atu i taimi uma le filifili o le lotomaualalo e oe lava nai lo le faatali seia faamalosia oe e le Atua ina ia lotomaualalo (tagai Alema 32:15–16).
Ae Faapefea Pe Afai e Oona se Isi Tagata?
O le alofa mama o le vaifofo lea i le tele o mea, ae le na o finauga. “Ma o le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava mea, e le faaitaitagofie, e le mafaufau i se mea leaga” (Moronae 7:45). E tatau ona tatou tatalo mo le alofa mama (tagai Moronae 7:48) e fesoasoani ia i tatou e faamagalo atu ai i vaivaiga o isi tagata—e pei lava ona tatou faamoemoe o le a latou tatalo mo le alofa mama ina ia mafai ona latou onosaia o tatou vaivaiga. E le tatau foi ona tatou fefefe e faatulaga ni tuaoi. O le faamagalo atu e le faapea o le tumau ai i se mafutaga oona po o se tulaga leaga.3