“Talitonu ia Keriso A o Leʼi Toe Afio Mai o Ia,” Mo Le Malosi o le Autalavou, Ape. 2024.
Sau, Mulimuli Mai ia te A’u
Talitonu ia Keriso A o Leʼi ToeAfio Mai o Ia
Sa faatuatua sa Nifae a o leʼi afio mai le Faaola, ma e mafai ona tatou faatuatua a o leʼi toe afio mai o Ia.
Pe na i ai se taimi na e mafaufau ai pe faapeʼi le talitonu i le Faaola a o leʼi afio mai o Ia i le lalolagi? Sa tatau i sa Nifae anamua ona faia le mea tonu lava lena—“tepa taulai i luma i le Mesia, ma talitonu o le a afio mai o ia e peiseai ua uma ona afio mai o ia” (Iaroma 1:11).
O aso nei, ua ia i tatou talafaamaumau faatusi paia ma talafaasolopito o loo molimau mai ai sa soifua Iesu Keriso, maliu, ma toetu mai. Tatou te talitonu i se Faaola ua uma ona afio mai. Ae tatou te talitonu foi i se Faaola o le a toeafio mai.
A o Leʼi Afio Mai Iesu Keriso, sa I Ai le Faatuatua o sa Nifae e:
Ia faamagaloina i a latou agasala.
“Ia mafai e soo se tasi o i latou e talitonu o le a afio mai Keriso, ona maua le faamagaloga o a latou agasala, ma olioli i le olioli tele, e pei lava ua uma ona afio mai o ia i totonu o i latou.” (Mosaea 3:13; ua faaopopo le faamamafa).
Faamagalo i latou lava.
“Ma sa oo mai se siufofoga ia te aʼu, ua fetalai mai: Enosa e, ua faamagaloina au agasala. … O le mea lea, sa tafi esea ai o’u lagona tausalaina. Ma sa ou fai atu: Le Alii e, ua faapefea ea ona faia lenei mea? Ma sa fetalai mai o ia ia te aʼu: Ona o lou faatuatua ia Keriso, o lē e te lei faalogo lava pe na e vaai muamua i ai. Ma e tele tausaga e mavae atu ae lei faaali mai e ia o ia lava i le tino; … ua faamamāina oe i lou faatuatua” (Enosa 1:5–8; ua faaopoopo le faamamafa).
Faatino vavega.
“Sa matou iloa e uiga ia Keriso, ma sa i ai ia te i matou se faamoemoe i lona mamalu i le tele o selau o tausaga a o le i afio mai o ia. … Ua oo ina mafai lava ona matou poloai atu i le suafa o Iesu ma usiusitai ai laau ia te i matou, po o mauga, po o galu o le sami” (Iakopo 4:4, 6; ua faaopoopo le faamamafa).
Mauaina o faaaliga
“Sa i ai le toatele o ē sa matuā malosi tele lava lo latou faatuatua, i le taimi ae le’i afio mai Keriso, o ē sa le mafai ona taofia mai totonu o le veli, ae sa latou vaai moni o latou mata” (Eteru 12:19; ua faaopoopo le faamamafa).
A o Le’i Toe Afio Mai Iesu Keriso, E mafai Ona Tatou Maua le Faatuatua Ia:
Faamagaloina, faamagalo i tatou lava, faatino vavega, ma maua faaaliga (e pei o sa Nifae).
Saunia i tatou lava mo Lona afio mai.
A o tatou taumafai e tausia a tatou feagaiga, ua tatou saunia e ola i le malo selesitila. “Auā faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega” (Alema 34:32).
Saunia le lalolagi mo Lona afio mai.
Ua valaaulia i tatou e Peresitene Russell M. Nelson ia avea ma se vaega “o le galuega aupito silisili i le lalolagi”—o le faapotopotoina o Isaraelu. “Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou!”1
Ia i ai le faamoemoe i taimi faigata.
A toe afio mai le Faaola, o le a ola e amiotonu i le filemu. O le a nofotupu le Faaola, ma o le a faasaʼoina le le talafeagai. “Ona o le a i ai le Alii i lo latou lotolotoi, ma o le a i ai lona mamalu i luga o i latou, ma o le a avea o ia ma o latou tupu ma o latou faitulafono” (Mataupu Faavae ma Feagaiga 45:59).
Talitonu i le Toetu.
O le a toetutu tagata uma. O le a tatou maua ni tino atoatoa, ma ola pea. E mafai ona tatou toe vaai i e pele ua maliliu. “O le a toe faatasia le agaga ma le tino i ona foliga atoatoa; o lima ma vae ma soogaoivi o le a toefuata’iina i ona tulaga e tatau ai, e pei lava ona tatou i ai nei i le taimi nei” (Alema 11:43).
Sa faatuatua sa Nifae anamua i le Faaola a o lei afio mai o Ia. E mafai ona tatou faatuatua o le a toeafio mai le Faaola—pe a “[tatou] vaaia [o Ia] i ao o le lagi, ua faaofuina i le mana ma le mamalu tele” (Mataupu Faavae ma Feagaiga 45:44; tagai foi i le Galuega 1:11). E faapefea e le iloa o le a toe afio mai o Ia ona suia mea o le a e faia i le asō?