E Le Faapea e Tatau ona Faafaigata

Saunia e Natalie U. ma Hannah O.

O Hana e le o se tagata o le Ekalesia. O Natalie [o se tagata o le Ekalesia]. Ma sa la fesoasoani i le tasi ma le isi ia latalata atili ia Iesu Keriso.

tamaitai talavou

Ata na tusia e Gabriele Cracolici

Tala a Hana

Sa ou fetaui ia Natalie i le aso muamua o le vasega ono. Sa ou matauina e le tafao o ia i Aso Sa ma sa ia feaveaia ana tusitusiga paia i le aoga. I se tasi aso sa ou i ai i ni gaoioiga faafiafia ma Natalie, ma sa ou fai atu, “Ou te fia auai i lau Lotu.” Ou te le o mautinoa po o le a le mea na mafaufau i ai Natalie i lena taimi, aua sa le iloa le mea na oso atu ai [lea tala]. Ae mai lava i lena taimi sa amata ai ona ia faasoa mai le tele o mea e uiga i lona faatuatuaga ia te a’u.

Mulimuli ane i lena tausaga, sa matou o ai ma Natalie i se konafesi a le autalavou. O se tasi o gaoioiga mulimuli i le konafesi a le autalavou o se sauniga molimau. Sa faasoa mai e Natalie se molimau faapitoa na faaosofia ai a’u e fia aoao atili.

A o ou suesue i le talalelei, sa ou tatalo i le Tama Faalelagi ia maua se molimau. E lei umi, ae ou iloa e moni mea sa ou aoaoina. I lena taumafanafana, sa avea ai a’u o se tagata O Le Ekalesia a Iesu Keriso o le Au Paia o Aso e Gata Ai.

Mulimuli ane, sa fesili mai se uo ia te a’u po o le a le papatisoga. Sa ou faasoa atu i ai mea ou te fiafia i ai e uiga i le talalelei a Iesu Keriso ma le fiafia ua ou maua i le Faaola. E fiafia la’u uo i le soka, o lea sa matou galulue ai ma le au peresitene o la’u vasega e fuafua se gaoioiga soka e valaaulia ai o ia. Ma sa ma suesueina faatasi ma Natalie le Tusi a Mamona i le FaceTime.

“A o e taumafai malosi e alofa i au uo i le ala e faia ai e le Faaola, ua e valaaulia i latou e o mai ia te Ia.”

I le taimi muamua, o le fesoasoani i la’u uo sa pei o se tiutetauave tele—o le fai atu o mea sa’o ina ia malamalama ai po o le valaaulia ai o ia i gaoioiga sa’o. Ae sa ou iloaina sa le faatatau i le liua ae o le alofa. Afai e i ai ni ou faamoemoega lelei ma ni manaoga amiotonu, o lona uiga o soo se mea e te faia e auai ai i le galuega a le Tama Faalelagi o le a mafaufauina o se tulaga manuia. A o e taumafai e alofa i au uo i le ala e faia ai e le Faaola, ua e valaaulia i latou e o mai ia te Ia.

Tala a Natalie

Ina ua sui la’u aoga i se aoga fou i le vasega ono, sa matou aai faatasi ma se teineitiiti e igoa ia Hana ma sa ia faailoa atu a’u i ni uo fou. Ae ou te lei iloaina, i le taimi lava lena, sa ou fesoasoani e faailoa atu o ia i mataupu faavae o le talalelei.

I se tasi aso sa ma i ai faatasi ma Hana i ni gaoioiga faafiafia. Sa faafuasei lava ona, ia ta’u mai ia te a’u sa manao e auai i le Ekalesia. O le faapea atu sa ou te’i o se manatu faatauvaa. O lo’u manatu muamua lava, “Ou te le o mautinoa pe na te iloa le telē o le tautinoga.”

Sa ou le mautinoa po o le a le mea e fai, ae na fai mai o’u matua, “E fiafia o ia i le talalelei. E tatau ona e valaaulia o ia i le tolauapiga a le uarota.” Sa ou manatu atonu e lofituina ia Hana i le faaaluina o le vaiaso atoa faatasi ma i matou ma feiloai i le toatele o tagata fou. Ae sa ou talia le la fautuaga ma valaaulia o ia i le tolauapiga ma i le konafesi a le autalavou.

I le taimi o se sauniga molimau i le konafesi a le autalavou, sa ou manatu e pei na manaomia e Hana ona faalogo i la’u molimau, e ui lava o le tautala i nofoaga faitele o se tasi lea o o’u popolega tele. Sa iloa e Hana sa ou fefe, ma sa ia fiafia i le tulaga moni lea sa ou naunau e faasoa atu ona sa ou talitonu i le talalelei.

O a’u o se tagata e soona mafaufau lava i mea, o lea, soo se taimi lava ou te mafaufau ai e valaaulia Hana i mea, sa ou mafaufau, “O le a ia mafaufau o loo ou faamalosia o ia e auai i le Ekalesia.” Ae sa ou iloaina o se fefe faigata lenei mea. E fiafia tagata e valaaulia i mea fai. A o faagasolo pea le taimi, sa sili atu ona ou toafimalie i le faasoaina atu o o’u lagona. Sa ou aoaoina o le faasoaina atu o le talalelei e faatatau i le alofa.

“O le malaga a Hana e lei suia ai na o lona olaga; ua suia ai foi lo’u olaga ma faamalosia ai la’u molimau.

E tele naua le olioli i le faasoaina atu o mea e sili ona e alofa ma faapelepele i ai. O le malaga a Hana e lei suia ai na o lona olaga; ua suia ai foi lo’u olaga ma faamalosia ai la’u molimau. Sa ou vaaia le eseesega na faia e le Faaola mo Hana, ma sa fesoasoani ou te iloa ai le eseesega na Ia faia mo a’u.

O tusitala e mai Hawaii, ISA.