O Se Ituaiga Faamalologa Ese

Sa ma’i lo’u tina talu mai le fa o o’u tausaga. I le taimi muamua, sa leai se tasi na iloa po o le a, ae sa i ai o matou aiga ma uo e tatalo ma anapopogi mo lo matou aiga ina ia iloa tonu po o le a. I le mavae ai o le tele o tausaga o taotoga ma suesuega, sa matou iloa ai sa ia te ia le gasegase o le Chiari malformation [patu o le atigipoo agai i le alatuasivi], o le kanesa o le toto, ma nai isi ma’i e leai se vaifofo.

O le vaai atu i lo’u tina o ma’i tigaina, sa amata ai ona ou le fiafia i le Atua. Sa ou iloa sa ia te Ia le mana e faamalolo ai o ia, o lea sa le mafai ai ona ou malamalama pe aisea na Ia le faia aie. Sa ou manatu o tatalo uma, sailiga tupe, ma anapogi na ma’umau uma.

Ae a o o’u matamata i le konafesi aoao ia Oketopa 2021 faatasi ma lo’u aiga, sa ou faalogo ia Elder Brent H. Nielson o le Fitugafulu o faapea mai, “O le mana faamalolo o le Faaola [ua] le na o Lona gafatia e faamalolo ai o tatou tino ae, atonu o le mea e sili atu ona taua, o Lona gafatia e faamalolo ai o tatou loto.” Ina ua valaaulia e le Faaola toetu ia tagata i le Tusi a Mamona ina ia faamaloloina, sa Ia “le’i faasino i se faamalologa faaletino ae o se faamalologa faaleagaga o o latou agaga” (Liahona, Nov. 2021, 57).

O nei upu na fesoasoani ou te iloa ai sa le’i le amanaiaina a’u e le Atua. Ou te le’i vaai pe na faapefea ona Ia faamaloloina lo’u tina i se auala e sili atu ona taua nai lo le aveesea o ona ma’i.

E le’i faamaloloina lava lo’u tina, ae sa i ai iina le Tama Faalelagi mo ia i ona taimi aupito maualalo. E fesoasoani o Ia ia te ia pe a ona lagona moni le leaga e sili ona oo i ai lona olaga. O lenei la pe a ou mafaufau i lenei aafiaga, ou te iloa e silafia lelei e le Tama Faalelagi ma Iesu Keriso le mea o loo ou lagonaina ma oo i ai.

Cara C., 13, Rhode Island, ISA

E fiafia e tafafao faatasi ma uo ma valaaulia i latou e taaalo i taaloga.