“Faasoaina Atu o le Malamalama o le Faaola: I Tua o Faatinoga e Le Vaaia,” Mo Le Malosi o le Autalavou, Ape. 2024.
Faasoaina Atu o le Malamalama o le Faaola: I Tua o Faatinoga e Le Vaaia
Faalogo i tala o le avea ma soo i tua atu o le vitio musika o le Autu a le Autalavou mo le 2024!
O le vitio musika o le autu a le autalavou i lenei tausaga e faatatau uma lava i le avea ai ma se soo o Keriso (tagai i le 3 Nifae 5:13). Ma o le autalavou sa auai sa le na ona i ai iina e faatino; sa latou aoaoina foi le uiga o le avea ma se soo. O le auala lenei ua vaai ma faasoa atu ai e nisi o i latou le malamalama o le Faaola i aso uma.
Jordan, 18 tausaga, Siamani
O lenei vitio sa o se avanoa sili lea e faasoa atu ai le talalelei e ala i musika. Ou te fiafia lava i musika, ma sa ou faaaluina ni vaiaso se lua e faataitai ai le pese “O Se Soo o Keriso” i le kitara. Ou taina, ma e le mafai ona ou taofia.
Ou te faamoemoe o tagata e matamata i le vitio o le a aveina atu le savali i le loto ma taumafai ia avea ma soo moni o Keriso. E mautinoa lava e le faigofie, ae e mafai ona avea oe o se soo o Keriso i mea e te faia, au amioga. O le mea lena ua ou aoaoina mai lenei aafiaga—e tatau ona ou avea atili e faapei o Keriso ma mulimuli ia te Ia.
E i ai sa’u molimau malosi o Iesu Keriso o lo tatou Faaola ma sa Ia togiolaina a tatou agasala. Ou te matua faafetai lava mo Lana Togiola. Ua Ia tuuina mai ia te a’u le avanoa e salamo ai, faamagaloina, ma iu ai ina toe foi atu ia te Ia ma le Tama Faalelagi. O le meaalofa silisili lea ua tuuina mai e le Atua ia i tatou.
Ark, 16 tausaga, Finelani
A matamata tagata i lenei vitio, ou te faamoemoe latou te manatua le alofa o Iesu Keriso ma Lona alofa mutimutivale tele. O le avea ai ma se soo o Keriso e taua, aemaise lava mo le autalavou e pei o i matou, aua e mafai ona aumaia ia i tatou se manao e auauna atu i se misiona. O le auauna atu i se misiona o se avanoa sili lea e faasoa atu ai le malamalama o le Faaola o loo ia i tatou i isi tagata. Tatou te faamalolosia i tatou lava ma aoao ai i le faagasologa.
Carolina, 15 tausaga, Suetena
Ina ua amata ona matou pueina le vitio, sa ou faapea, “O le a le mea o le a ou faia? E le mafai ona ou faatinoa.” Ae sa o se aafiaga malie tele. Sa ou lagonaina moni lava le alofa o le Atua i le taimi o le pueina o le vitio. I le vitio, ou te faatinoina se teineitiiti o loo i ai i se taimi faigata ae na ia maua le fesoasoani mai se uo fou.
Sa i ai foi ou taimi faigata i le olaga moni lava. I le 2021, na masae ai lo’u (ACL) i tagafiti. Sa matua ou faanoanoa lava, ma le’i iloa po o le a la’u mea o le a fai.
Ou te manatua lo’u nofo ai i le lotu a o le’i faia lo’u taotoga. Sa saunoa se tasi, ae ou te le’i faalogo seia oo ina latou fai mai se fuaiupu se tasi: “Ou te mafaia mea uma lava i le faamalosi mai o Keriso ia te a’u” (Filipi 4:13). O lena taimi na fesoasoani ia te a’u aua sa ou iloa e tatau ona ou tatalo ma latalata atu i le Tama Faalelagi ma Iesu Keriso ina ia mafai ona ou maua lo Laua malosi.
E faatasi pea le Atua ma oe e oo lava i taimi faigata. O nisi taimi e tau lava o le aapa atu o lou lima, ma o le a Ia uuina. Tau lava o lou saili atu ia te Ia.
Meleah, 16 tausaga, Suetena
I le vitio, ou te vaai i se teineitiiti o saofai na o ia i luga o se nofoa umi ma lagona le faanoanoa ma le tuuatoatasi, ma ou te taumafai e faafiafia o ia. E tele taimi, aemaise lava i tausaga o lou talavou, lea e mafai ona e lagona ai le tuuatoatasi ma lagona ai e leai se tasi e malamalama moni ia te oe.
Ae e malamalama le Atua. E mafai ona fesoasoani o Ia ia te oe i na taimi ma o le a auina atu tagata e fesoasoani ia te oe ia e sao mai ai. Ua Ia faamanuiaina a’u i lo’u aiga ma a’u uo. Tau lava o lou faatuatuaina o tagata lelei o siomia oe ma faalagolago i le Atua, aua o le a lelei mea uma.
Ou te manatu o se savali taua o lenei vitio e faapea, e tatau ona tatou lototetele ma ia i ai iina mo le tasi ma le isi pe a tatou feagai ma taimi faigata. Ina ia avea ma se soo o Iesu Keriso, ou te manao e fesoasoani i tagata o siomia a’u ma faasoa atu le malamalama o loo i totonu ia te a’u ia i latou.
Patricia, 11 tausaga, Suetena
E manaia le lagona o le avea ma se vaega o se mea e sili atu nai lo lo’u faia o lenei vitio. O le avea ai ma se soo o Iesu Keriso o se mea e sili ona telē e aafia ai. O loo e auauna atu i le Atua, ma o mea uma na ou te manao ai. O le mea sili lea ua ou iloa.
Aatos, 18 tausaga, Finelani
E ese le manaia o le vaaia o mea uma e tupu i tua atu o lenei vitio, e pei o le, “Oi, e faapena ona e faaminoia solo le mea pueata.” Pe a oo mai i le avea ai ma se soo o Iesu Keriso, sa aoao mai i tatou e Peresitene Russell M. Nelson e tatau ona avea i tatou ma e faatupuina le filemu ma ia mautinoa o a tatou faatinoga e faapei o Keriso.1 Afai e te vaai atu i se tasi o i ai ni lagona le lelei, alu e fesoasoani ia i latou. O se vaega lena o le avea ai ma se soo o Iesu Keriso.