Fesili ma Tali

“E finau soo o’u matua. O le a se mea e mafai ona ou faia e taumafai ai e faatumau le Agaga i lo matou aiga?”

“I tulaga e maualuga ai le popolevale ma tumu i finauga, ou te valaaulia outou ia manatua Iesu Keriso. Tatalo ia maua le lototele ma le poto e ta’u atu ai pe faia le mea e ono faia e Ia. A o tatou mulimuli i le Aloalii o le Filemu, o le a avea i tatou ma ē e faatupuina le filemu.”

Peresitene Russell M. Nelson, “E Manaomia e Faatupufilemu,” konafesi aoao Ape. 2023 (Liahona, Me 2023, 101).

“Taumafai e fai se tatalo mo le alofa ma le filemu ina ia aumaia i totonu o lou aiga. E avanoa i taimi uma le Tama Faalelagi e aumaia le Agaga, ma ua Ia aoao i tatou i auala ia sili atu ai ona alofa. O le faaali atu i ou matua e i ai sou alofa faamaoni mo i la’ua e mafai ona faafilemuina ai o la’ua loto.”

Ethan D., 17, Texas, ISA

“Pe a tatou taumafai e fai mea e valaaulia ai le Agaga i o tatou lava mafaufauga ma amioga, ua tatou faia se faataitaiga mo isi. E na o le toatasi le tagata e filifili e faia mea lelei e mafai ona faia se eseesega.”

Kelsey L., 17, Misuri, ISA

“Ou te lagonaina le Agaga Paia pe a ou tatalo pe faalogo foi i musika a le autalavou ua saunia e le Ekalesia. Ou te lagonaina foi pe a ou vaai i faamanuiaga patino a le Tama Faalelagi mo a’u. Pe a e lagona e faigata ona faatumau le Agaga i lou aiga, vaavaai mo faamanuiaga a le Atua i lou olaga.”

Beckett V., 13, Florida, ISA

“O le mea na fesoasoani ia te a’u o le taumafai pea lava pea ia ou maua ni taimi faaleagaga na o a’u. O le faitauina o tusitusiga paia, auai i gaoioiga a le Ekalesia, ma le tatalo ma le faamaoni na fesoasoani ia te a’u ia maua le Agaga e faatasi ma a’u.”

Claudia L., 18, Minden, Siamani

“A o i ai Iosefa i Aikupito, o lana faataitaiga lelei ma le agavaa lea na alu ese ai o ia mai le falepuipui ma fesoasoani i lona aiga ma Farao. Afai e te manao e fesoasoani i se tasi e latalata atu ia te oe o loo finau, faaali atu ia i latou le Malamalama o Keriso ma Ana mataupu faavae o le alofa o le tasi i le isi.”

Seth J., 16, Iuta, ISA

O tali ua faamoemoe mo se fesoasoani ma se vaaiga, ae e lē o ni faalauiloaga aloaia o aoaoga faavae o le Ekalesia.

O Le A Sou Manatu?

“Ou te lagona le le to’alelei i le faasoaina atu o o’u talitonuga. “E mafai faapefea ona ou faia ia pei lava o se mea fua?”

Auina mai lau tali ma lou ata ae le‘i oo i le aso 15 o Me, 2024.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Submit Your Work.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.

Saili nisi tali i le polokalama o le Gospel Living i le masina lenei!