“Mālohi ʻo e Kau Moʻungaʻi Tangatá,” Ki Hono Fakamālohia ʻo e Toʻu Tupú, Siulai 2024.
Mālohi mei he Folofolá
Mālohi ʻo e Kau Moʻungaʻi Tangatá
Naʻe fiemaʻu foki ʻe he kau moʻungaʻi tangata ʻi he Tohi ʻa Molomoná ha mālohi, pea ko Sīsū Kalaisi naʻe maʻu mei aí. Te ke lava fēfē ʻo maʻu Hono mālohí ʻo hangē ko ia naʻe maʻu ʻe he kau moʻungaʻi tangata ko ʻení?
ʻŪ tā fakatātā ʻa Jarom Vogel
Nīfai: Fakahā (1–2 Nīfai)
ʻE lava ke faingataʻa ʻa e mavahe mei ʻapí, fefaʻuhi mo e ngaahi faingataʻa fakafāmilí, pea mo e fehangahangai mo e taʻeʻiloá. Ka ʻi he tui ʻa Nīfai ki he ʻEikí, naʻá ne ako ke fekumi ki he fakahaá pea falala ki he ʻEikí ke tataki ia.
ʻAlamā mo e Ngaahi Foha ʻo Mōsaiá: Fakatomala (Mōsaia 27–28; ʻAlamā 36)
ʻOku fiemaʻu ha mālohi ke fakatomala mo tala moʻoni naʻá ke fehalaaki. Hili hono maʻu ʻe he ngaahi kaungāmeʻa ko ʻení ha ui mālohi ke fakatomalá, naʻa nau tafoki kia Sīsū Kalaisi pea maʻu ha mālohi lahi. Naʻa nau tukuange loto-toʻa ʻenau tōʻonga moʻui motuʻá pea naʻa nau ngāue maʻá e ʻEikí mo tokoniʻi ʻa e niʻihi kehé ke nau fai ʻa e meʻa tatau, ʻi he tuí. Naʻa nau maʻu ha fiefia lahi.
Ko e Kau Tau Kei Talavoú: Ko e Fefaʻuhi mo e Ngaahi Faingataʻa ʻo e Moʻuí (ʻAlamā 53; 56–57)
ʻOku ʻi ai ha ngaahi fetauʻaki kehekehe ʻi he moʻuí. ʻI he fehangahangai ʻa e kau talavou ko ʻení mo e ngaahi fetauʻakí, naʻa nau manatuʻi ʻa e meʻa naʻe akoʻi ange ʻe heʻenau ngaahi faʻeé fekauʻaki mo e ongoongoleleí pea naʻa nau tau “ʻi he māfimafi ʻo e ʻOtuá” (ʻAlamā 56:56).