Fakaʻilekitulōnika Pē
Ko e ʻUhinga ʻOku Ou ʻOfa ai ʻi he Tohi ʻa Molomoná
Ko e Tohi ʻa Molomoná ko e fakavaʻe ia ʻo ʻeku tui mo e fakamoʻoni kia Sīsū Kalaisí.
Mei ha lea naʻe fai ʻi ha seminā maʻá e kau taki fakamisiona foʻoú ʻi he ʻaho 23 ʻo Sune, 2023.
ʻOku ou loto ke toutou lea ʻaki, “ʻOku Ou ʻOfa ʻi he Tohi ʻa Molomoná.” Ko e meʻangāue ia ʻa e ʻEikí ki he fakauluí ʻi he ngaahi ʻaho kimui ní. ʻOku hoko hono pulusí ko e fakaʻilonga ko e kikite mei fuoloa ki hono tānaki ʻo ʻIsilelí ʻoku fakahoko ia ʻi he taimí ni. Ko e meʻangāué ʻa e Tohi ʻa Molomoná, ko e “hele tuʻusí,” kapau te ke loto ki ai, ke tau “ʻai” hotau mālohí ʻi he ngoue lahi ko iá he kuo “hina ʻa e ngoué ki he ututaʻú.”
Ko ia ai, ʻoku hoko ʻa e Tohi ʻa Molomoná ko e fakaʻilonga mo e ʻuhinga fakatouʻosi ki hono tānaki fakataha ʻo e kakai fuakava ʻa e ʻEikí ʻi he kuonga fakakosipeli fakaʻosi ko ʻení. Hangē ko e fakamatala ʻa Palesiteni Nalesoní, “Ko e tohi ʻeni ʻe tokoni ki hono teuteuʻi ʻo e māmaní ki he Hāʻele ʻAnga Ua Mai ʻa e ʻEikí.”
ʻOku taʻe-hano-tatau ʻa ʻeku houngaʻia ʻi he Palōfita ko Siosefa Sāmitá pea mo ʻene lavameʻa taʻe-mafakatataua ʻi hono liliu mo pulusi ʻo e Tohi ʻa Molomoná. ʻOku ʻi ai ʻeku fakamoʻoni naʻe fai ia ʻe he talavou ko ʻení, ko ha tamaioʻeiki faivelenga “ʻi he foaki mo e māfimafi ʻo e ʻOtuá,” ʻo hangē pē ko ʻene fakamatalá.
Founga ʻoku Tokoni ai ʻa e Tohi ʻa Molomoná ke Fakaului ʻa e Kakaí
Ko e mālohi ʻo e Tohi ʻa Molomoná ʻoku ʻi he fakamoʻoni ʻa e Laumālie Māʻoniʻoní ʻoku ʻalu fakataha mo iá—ko e fakamoʻoni ʻa e Laumālie Māʻoniʻoní ʻoku moʻoni ʻa e tohí pea ko ha fakamoʻoni mālohi ia ki hono Fakafoki Mai ʻo e Ongoongoleleí ʻi he ngaahi ʻaho kimui ní, ko e fakamoʻoni ʻa e Laumālie Māʻoniʻoní ki hono moʻoni ʻo e tokāteline ʻokú ne akoʻí, pea mo e fakamoʻoni ʻa e Laumālie Māʻoniʻoní ʻoku moʻoni ʻene fakamoʻoni kia Sīsū Kalaisí.
ʻOku hoko ʻa e Tohi ʻa Molomoná ko ha meʻangāue mālohi ʻi hono tali ʻo e ngaahi fehuʻi ʻo e lotó, hangē ko e “ʻOku ʻafioʻi pe tokanga mai nai ʻa e ʻOtuá kiate au?” “Ko e hā ʻa e taumuʻa ʻo e moʻuí?” “Te u lava fēfē nai ke hoko ko ha taha lelei ange?” “Te u lava fēfē nai ʻo ongoʻi ʻa e fakamolemole ʻa e ʻOtuá?” “Ko e hā ʻoku hoko ʻi he hili ʻeku maté?”
ʻOku fakatupulaki mo fakamālohia ʻe he Tohi ʻa Molomoná ʻa e ngaahi akonaki mo e fakamoʻoni ʻa e Tohi Tapú fekauʻaki mo Sīsū Kalaisí. ʻOku tau fakatokangaʻi totonu ko e “Ko ha Fakamoʻoni ʻe Taha ʻo Sīsū Kalaisi,” ka ʻi ha ngaahi founga lahi, ko e Tohi ʻa Molomoná ko e fakamoʻoni mahuʻinga taha ia ʻo Sīsū Kalaisí.
Kiate au fakafoʻituitui, naʻe ʻikai ke u teitei houngaʻia kakato ʻi he Tohi Tapú kae tālunga ʻeku hoko ko ha tokotaha ako ʻo e Tohi ʻa Molomoná.
ʻOku ʻai ʻe he Tohi ʻa Molomoná mo ʻene fakamoʻoni makehe kia Sīsū Kalaisi mo Hono misioná ke hoko ʻa e ongoongolelei kuo fakafoki maí ki he tuʻunga ʻoku ʻi aí. Naʻe pehē ʻe Siosefa Sāmita, “Toʻo ʻa e Tohi ʻa Molomoná mo e [ngaahi fakahaá], pea ʻe ʻi fē ʻa ʻetau tui fakalotú? ʻE halaʻatā ha meʻa ke tau maʻu.”
Ko ʻEku Fakamoʻoni ki he Tohi ʻa Molomoná
Kuo hoko ʻa e Tohi ʻa Molomoná ko ha meʻangāue ʻi heʻeku uluí. ʻOku anga fēfē ke ʻikai kaunga ki ai? Ko e “tohi totonu taha ia … ʻi he māmaní.” Naʻe fakamoʻoni Tonu ʻa Sīsū Kalaisi naʻe liliu ʻa e Tohi ʻa Molomoná ʻi Heʻene fakahinohinó ʻaki Hono mālohí, peá Ne fakahā ʻi Hono huafa ʻoʻoná “pea hangē ʻoku moʻui ʻa homou ʻEikí mo homou ʻOtuá ʻoku moʻoni ia.”
Kuo akoʻi mai ʻe he Tohi ʻa Molomoná ha konga lahi ʻo e meʻa ʻoku ou ʻilo fekauʻaki mo Sīsū Kalaisí. Ko e fakavaʻe ia ʻo ʻeku tui mo ʻeku fakamoʻoni kiate Iá. Kuó ne ʻai au ke u ofi kiate Ia. Ko e tefitoʻi maʻuʻanga tokoni ia ʻo ʻeku mahino ki he palani lahi ʻo e huhuʻí. Ko e fakavaʻe ia ʻo ʻeku fakamoʻoni ki hono Fakafoki Mai ʻo e Ongoongoleleí.
Ako mo lotua ke ʻiloʻi ʻoku moʻoni ʻa e fakamoʻoni ʻo e Tohi ʻa Molomoná fekauʻaki mo Sīsū Kalaisí—ko hai Ia pea mo e meʻa kuó Ne fai mo hokohoko atu hono fakahokó. Kuó u fai ia, pea ʻoku ou ʻiloʻi ʻoku moʻoni ʻa e fakamoʻoni ʻo e Tohi ʻa Molomoná fekauʻaki mo Sīsū Kalaisí—ko hai Ia, meʻa naʻá Ne akoʻí, mo e meʻa naʻá Ne faí. Kuó u ului.