“Fēfē kapau he ʻikai ke u lava ʻo pehē ʻoku ou ʻilo ʻoku moʻoni ʻa e ongoongoleleí?,” Ki Hono Fakamālohia ʻo e Toʻu Tupú, Siulai 2024.
ʻAi Hangatonu
Fēfē kapau he ʻikai ke u lava ʻo pehē ʻoku ou ʻilo ʻoku moʻoni ʻa e ongoongoleleí?
Kapau ʻoku ʻikai ke ke ongoʻi te ke lava ʻo pehē, “ʻOku ou ʻilo,” ʻoku sai pē ia. Kamata ʻaki e meʻa ʻokú ke tui ki aí. Pea kapau ʻoku ʻikai ke ke fakapapauʻi ia, kamata ʻaki ʻa e meʻa ʻokú ke loto ke tui ki aí. Pea “tuku ʻa e holí ni ke ngāue ʻiate [koe]” (ʻAlamā 32:27) mo tataki koe ke ke ngāue—ke lotu, ako, fakatomala, tokoni. ʻI hoʻo ngāue ʻaki ʻa e tuí, tokanga ki hoʻo ngaahi fakakaukaú mo e ongó. ʻI he fakalau ʻa e taimí, te ke lava leva ʻo lea loto-toʻa, “ʻOku ou tui.”
“Ko e tuí ko ha foʻi lea mahuʻinga, pea ko ha ngāue ia ʻoku mahuʻinga ange, pea ʻoku ʻikai fiemaʻu ke [ke] teitei kole fakamolemole [koeʻuhí ko hoʻo] ‘tui ʻataʻatā peé.’”
Mataʻikoloa ʻaki ʻa e ngaahi moʻoni ʻo e ongoongoleleí ʻokú ke tui ki aí. Ngāueʻi kinautolu. Māteakiʻi kinautolu. ʻI hoʻo fai iá, ʻe tāpuekina ʻaki koe ʻa e Laumālie Māʻoniʻoní. Pea te ke lava ʻo ongoʻi lata ʻi he Siasí neongo pe ko e hā ʻa e faʻahinga fakamoʻoni ʻokú ke maʻú. Hangē ko e lea ʻa Palesiteni Tieta F. ʻUkitofa, ko e Tokoni Ua ʻi he Kau Palesitenisī ʻUluakí he taimi ko iá, “ʻOku ʻikai ha fakaʻilonga ʻi he matapā hotau ʻapisiasí ʻoku pehē, ʻKuo pau ke mālohi peheni hoʻo fakamoʻoní ka ke toki hū ki ai.’”