“Mei he Humú ki he Ikuná,” Ki Hono Fakamālohia ʻo e Toʻu Tupú, Siulai 2024.
Mei he Humú ki he Ikuná
ʻOku ʻikai totonu ke ke teitei tukulolo, ʻo aʻu ki he taimi te ke tō aí. Tui mai kiate au.
Laʻitā mei he Feʻauhi ʻi Tuʻa ʻa e Toyota USATF 2023 ʻi he ʻaho 8 ʻo Siulai 2023, mei he USATF
ʻI he 2022 naʻá ku kau ʻi he feʻauhi fakafonua lele puna-hētolo mita ʻe 3,000 ʻa e ʻIunaiteti Siteití. ʻOku meimei ke takai ʻe fitu mo e konga ʻa e lová, pea ʻoku ʻi ai ʻa e ʻū hētolo papa ʻe nima kuo pau ke te puna ai he foʻi takai kotoa pē, ʻo kau ai ha hētolo ʻe taha naʻe ʻi muʻa pē ʻi ha foʻi luo ʻoku fonu vai.
ʻI heʻeku takai hono ua ʻi he lová naʻe humu ʻa e tama naʻe ʻi muʻa ʻiate aú, pea ne u meimei kaka au ai. Ka naʻe puna ia ʻo hao he hētoló, ka u tō au.
Naʻá ku tuʻu māmālie hake koeʻuhí he naʻe hangē kuó u ongoʻi loto-siʻí. Naʻá ku fakakaukau, “Te u mālōlō nai ʻo mavahe mei he lová?” Ka naʻá ku ʻosi mateuteu pē. Naʻá ku ʻosi fakapapauʻi pē kimuʻa pea fai e lová te u kei lele pē kapau te u humu, ko ia ai naʻe toe hoko atu pē ʻeku lelé. Naʻá ku kei loto pē ke fai hoku lelei tahá ʻo tatau ai pē kapau he ʻikai ke u ikuna.
Naʻá ku leleʻi ha foʻi takai ʻe ua peá u toki maʻu atu ʻa e tokotaha fakamuimuitaha ʻi he kulupu ʻi muʻá. Ne vave pē ʻa e toe ha foʻi takai ʻe tolu pea holo hifo ki he foʻi takai ʻe uá. Naʻe kamata ke u fakakaukau te u lava pē ʻo kau ʻi he toko tolu tuʻu-ki-muʻá. Ka naʻá ku fuʻu helaʻia ʻaupito, pea naʻe fakalaka hake ha toko ua ʻi he vaeua ʻo e takai fakaʻosí. Naʻá ku fika fā, ka naʻe fuʻu lelei ʻaupito ʻeku puna hētolo he foʻi vai fakaʻosí. Pea naʻá ku fakakaukau, “Tāmani, te u malava pē ʻo ikuna e lová ni.”
ʻI he ʻosi ʻeku leleʻi ʻa e mita ʻe 50 fakaʻosí, naʻá ku ʻiloʻi te u ikuna. Naʻe hangē tofu pē ia ha misí. Naʻá ku fakakaukau, “Mani ē, ʻoku ou ikuna moʻoni nai e lová he taimí ni?” Pea naʻá ku ikuna. Naʻá ku ikuna ʻa e lová hili ʻeku toó.
Naʻá ku toki fakatokangaʻi kimui ange, ʻoku ʻi ai ha ngaahi lēsoni te tau lava ʻo ako mei he meʻa naʻe hokó.
1. Faʻa Kātaki ʻIate Koe Pē
ʻI he taimi naʻá ku tō ai ki laló, naʻá ku loto ke tuliʻi he vave tahá ʻa e niʻihi naʻe ʻi muʻá. Ka naʻe pau ke u kiʻi taitaimi lelei telia naʻá ku fuʻu helaʻia. ʻOku ʻi ai ha folofola ʻoku pehē, “Tau feleleʻi ʻi he fakakukafi ʻa e fakapuepue kuo tofi ʻi hotau ʻaó” (Hepelū 12:1). ʻI he moʻuí, he ʻikai te ke tunu hake pē ʻa e ʻungá pea kula leva. Ko e taimi ʻe niʻihi ʻe pau ke kiʻi fuofuoloa ia.
2.Hokohoko Atu Pē
ʻOku fakanatula pē ke ke ongoʻi loto-foʻi he taimi ʻe niʻihi. ʻI heʻeku tō ki laló, naʻe ʻikai ke u ʻamanaki te u lava ʻo ikuna, ka naʻá ku fili ke u hoko atu pē. ʻOku ʻi ai maʻu pē ʻa e ʻamanaki lelei ʻi he taimi ʻokú ke tō ai ki laló—ʻoku fiemaʻu pē ke ke tuʻu hake ʻo toe feinga pē. ʻE tokoniʻi koe ʻe he Fakamoʻuí ʻi he ngaahi faingataʻa ʻokú ke fekuki mo iá. Piki maʻu ki he meʻa ʻokú ke ʻiloʻi ʻoku moʻoní, peá ke kole tokoni ki he niʻihi kehé. ʻE fakaʻau pē ke lelei ange ʻa e ngaahi tūkungá.
3. Falala kia Sīsū Kalaisi
Naʻe ʻikai mahino te u ikuna ʻa e lová hili ʻeku humú. Ka ʻi he taimi ʻoku tau tō ai ʻi he ongoongoleleí, ʻi he taimi ʻoku tau fai ai ha ngaahi fehalaaki pe angahalá, te tau lava maʻu pē ʻo haʻu kia Kalaisi, fakatomala fakamātoato, pea fakamolemolea kitautolu. Te Ne tokoniʻi kitautolu ke tau tuʻu hake. ʻOku maʻongoʻonga hotau ivi malavá—ʻa e ivi malava ko ia ke aʻusia ha meʻa lelei angé, ke fai ha meʻa lelei angé. Neongo kapau te tau toutou tō mo humu, kapau te tau toutou fakatomala pē mo feinga ke muimui ki he Fakamoʻuí, pea ʻokú Ne talaʻofa mai leva te tau lava ʻo ikuna ʻa e pue ʻo e moʻuí.