Ngaahi Fehuʻí mo e Talí

“ʻOku ʻikai ha taha ʻi he akó te ma vahevahe ʻa e ngaahi tuʻunga moʻui tatau. ʻE founga fēfē nai haʻaku maʻu ha ngaahi kaungāmeʻa lelei aí?”

“ʻOku tau ongoʻi kotoa ha fiemaʻu ke ʻi ai hatau kaungāmeʻa. ʻOku tau fekumi kotoa ki ha fakamoʻoni ʻoku ʻi ai hotau mahuʻinga. ʻOku tau fai ʻetau filí ʻo makatuʻunga mei he ngaahi holi ko iá. ʻE ʻi ai ha niʻihi te nau taki kitautolu ke tau mamaʻo mei he maama ʻa e ʻOtuá ʻa ia ʻokú Ne ʻomi ko hotau tatakí. ʻE ʻi ai ha niʻihi te nau fakatupulaki ʻa e maama ko ia ʻoku tau ʻilo ai hotau halá.”

Palesiteni Henry B. Eyring ʻo e Kau Palesitenisī ʻUluakí, “ʻAʻeva ʻi he Māmá,” konifelenisi lahi ʻo ʻEpeleli 2008 (Ensign pe Liahona, Mē 2008, 124).

finemui

“Talanoa ʻo kau ki he ngaahi meʻa ʻoku mou saiʻia fakataha aí. ʻOku ʻikai fiemaʻu ia ke ke fufuuʻi hoʻo māmá. ʻAi ke ke hangē pē ko e toʻu tupu angamahení ʻo kau ʻi he niʻihi ʻo e ngaahi meʻa fakafiefia ʻoku fiefia ai ʻa e toʻu tupu kehé. Muimui ki he ngaahi tuʻunga moʻui ʻa Sīsū Kalaisí, pea ʻai ke mahino lelei ki hoʻo kaungāakó ʻa e ngaahi tuʻunga moʻui ʻokú ke muimui aí.”

Seimi Ane B., 18, Nikulosi ʻOkisitenitolo, Filipaini

finemui

“Kumi ʻa e kakai ʻoku tatau homou tuʻungá, ngaahi meʻa ʻoku tokanga ki aí, ngaahi talēnití, pe ngaahi meʻa ʻoku saiʻia aí. ʻOku ʻi ai ha kakai lelei ʻi he ngaahi tui fakalotu kehé, kae pehē foki ki ha kakai fakaofo ʻoku ʻikai ke nau kau ki ha tui fakalotu. ʻOku nau kei hoko kotoa pē ko e fānau ʻofeina ʻa e ʻOtuá. ʻI hoʻo hokohoko atu ke tauhi hoʻo ngaahi tuʻunga moʻuí, neongo he ʻikai tauhi ia ho ngaahi kaungāmeʻá, ʻe lava ke hoko hoʻo sīpingá ko ha fakalotolahi ia ki he niʻihi kehé ke nau fai ha ngaahi fili ʻoku lelei angé.”

Lusi B., 15, Lima, Pelū

talavou

“Faʻa kātaki mo loto-tauʻatāina. ʻOku fekauʻaki ʻa e anga fakakaumeʻá mo e ʻulungāngá, kae ʻikai ko e tokolahí, pea ʻe lava ke ʻaonga ange ke ke maʻu ha ngaahi kaungāmeʻa moʻoni tokosiʻi pē ʻi haʻo feinga ke kaungāmeʻa mo ha kakai tokolahi ʻoku ʻikai ke faitatau ʻa e ngaahi meʻa ʻoku mou mahuʻingaʻia aí.”

ʻAtetoini ʻAlamā O., 17, ʻOusuni, Naisīlia

finemui

“Vahevahe hoʻo ngaahi tuʻunga moʻuí mo kinautolu. Kapau te nau ʻiloʻi hoʻo ngaahi tuʻunga moʻuí, te nau lava ʻo fakaʻapaʻapaʻi ia. Te ke lava foki ʻo fakaafeʻi ho ngaahi kaungāmeʻa ʻi he akó ki he lotú mo e/pe ngaahi ʻekitivitī ʻa e Siasí ke tokoni ke nau ʻilo lahi ange ki he meʻa ʻokú ke tui ki aí.”

Makeleta P., 13, Tekisisi, USA

finemui

“Kuó u ʻiloʻi te te lava ʻo maʻu ha ngaahi kaungāmeʻa lelei ʻo fakafou ʻi he ngaahi ueʻí mo hoto anga totonú. Ko e taimi ʻe niʻihi te te fetaulaki mo e kakaí, pea ko e taimi ʻe niʻihi ʻe pau ke te feinga moʻoni ke ʻiloʻi kinautolu, ka ʻe ʻi ai ha kakai te nau hoko ko e kaungāmeʻa lelei pe te nau fiemaʻu ha kaungāmeʻa lelei ʻo hangē ko koé.”

Katie R., 18, Nepulasikā, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi fakaʻofisiale ʻo ha tokāteline ʻa e Siasí.

Ko e Hā Hoʻo Fakakaukaú?

“ʻOku lahi haʻaku ngaahi fili mahuʻinga ke fakahoko. Te u maʻu fēfē ha fakahā fakatāutahá?”

ʻOmi hoʻo talí mo e laʻitaá kimuʻa ʻi he ʻaho 15 ʻo ʻAokosi 2024.

ʻĪmeili mai kiate kimautolu ʻi he [e-mail]. Pe ʻalu ki he ftsoy.ChurchofJesusChrist.org pea lomiʻi ʻi he “Submit Your Work (Fakahū Hoʻo Ngāué).” Hū ʻaki hoʻo ʻAkauni ʻi he Siasí pea fili leva ʻa e “For the Strength of Youth (Ki Hono Fakamālohia ʻo e Toʻu Tupú)” ʻi lalo ʻi he “Choose Magazine (Fili ʻa e Makasiní).” Lomiʻi ʻi he “Add File (Tānaki Atu ʻa e Failé)” ke fili hoʻo failé mo e ʻū taá, pea lomiʻi ʻi he “Submit (Fakahū)” ke upload mo ʻomi kiate kimautolu hoʻo failé.

ʻE lava ke liliu ʻa e ngaahi talí koeʻuhí ke lōloa feʻunga pe mahino.