Dali, Sunod Kanako
Usa ka Plano sa Kaluoy
Ang Plano sa Langitnong Amahan sa Kaluwasan
Ang plano sa Langitnong Amahan nagpahimutang sa tanang butang diha sa klarong panglantaw, ilabi na sa atong panginahanglan nga modangop ngadto Kaniya ug sa atong Manluluwas—sa pagbuhat og mas maayo ug mahimong mas maayo.
Mga paghulagway pinaagi ni Sarah Keele
Ang Langitnong Amahan adunay usa ka plano. Kini nga plano kasagaran gitawag og ang plano sa kaluwasan tungod kay kini mahitungod sa pagluwas kanato—kana mao ang, pagbuntog sa mga butang nga makapugong kanato gikan sa pagbalik ngadto sa Langitnong amahan. Kini usab usahay gitawag og ang plano sa kalipay tungod kay ang katuyoan niini mao ang pagtabang kanato nga mahimong mas sama sa atong Langitnong Amahan aron nga kita makadawat sa kahingpitan sa kalipay.
Ang pagsabot sa plano sa Langitnong Amahan makahatag kanato og usa ka mahangtorong panaglantaw, diin makatabang kanato sa paghinulsol ug paghimo og mas maayong mga pagpili. Ang Basahon ni Mormon naghatag kanato og usa ka maayong paghulagway bahin niining kamatuoran sa istorya bahin sa anak ni Alma nga si Corianton.
Apan una, ania ang usa ka sukaranan nga pagpasabot bahin sa plano sa Langitnong Amahan.
Ang Plano sa Langitnong Amahan
Sa Wala pa Niining Kinabuhia
Mga Espiritu: Kitang tanan mga espiritu nga mga anak nga mga lalaki ug mga babaye sa langitnong mga ginikanan. Ang Dios nakaila ug nahigugma sa matag usa kanato.
Ang Plano: Ang Langitnong Amahan naghatag og usa ka plano alang sa atong kalipay ug kauswagan. Kini nga plano gipresentar ngari kanatong tanan.
Jesukristo: Si Jesukristo mao ang sentro sa plano ug gipili nga mahimong atong Manluluwas sukad pa sa sinugdanan.
Kabubut-on: Kita mipili sa pagdawat sa plano sa Langitnong Amahan.
Paglalang: Ubos sa direksiyon sa Langitnong Amahan, si Jesukristo milalang sa yuta aron atong mapuy-an.
Atol Niining Kinabuhia
Mortal nga Kinabuhi: Ang atong mga espiritu karon nagpuyo sa pisikal nga mga lawas. Niining kinabuhia, kita makabaton og kasinatian, makakat-on, ug molambo.
Kabubut-on: Ang tanang katawhan matawo nga adunay Kahayag ni Kristo—kana mao ang, konsensiya o ang sukaranang pagbati sa husto ug sayop. Ang Langitnong Amahan naghatag usab sa tanang katawhan og abilidad sa pagbuhat alang sa ilang kaugalingon ug sa pagpili sa maayo o daotan.
Sala ug Kamatayon: Matag usa kanato makasala, ug matag usa kanato mamatay.
Jesukristo: Tungod kay ang Langitnong Amahan nahigugma kanato, Siya mipadala ni Jesukristo, ang Iyang Anak, sa pagtubos kanato gikan sa sala ug kamatayon. Si Jesukristo nag-antos alang sa atong mga sala, namatay, ug nabanhaw. Tungod Kaniya, kita mabanhaw. Tungod Kaniya, kita makahinulsol ug mapasaylo sa atong mga sala.
Ebanghelyo ni Jesukristo: Magpadayag ang Langitnong Amahan sa Iyang plano ngadto sa mga propeta. Magsangyaw sila sa ebanghelyo ni Jesukristo. Kini naglakip sa hugot nga pagtuo diha ni Jesukristo, paghinulsol, bunyag, pagdawat sa gasa sa Espiritu Santo, ug paglahutay sa kataposan.
Human Niining Kinabuhia
Kalibotan sa Espiritu: Human kita mamatay, ang atong mga espiritu padayon nga mabuhi. Ang kalibotan sa espiritu naglakip sa kahimtang sa paraiso (kalinaw ug pagpahulay sa mga matarong) ug bilanggoan sa espiritu.
Kabubut-on: Ang ebanghelyo ni Jesukristo isangyaw didto sa kalibotan sa espiritu aron nga ang tanan makabaton og usa ka oportunidad nga mopili sa pagdawat niini.
Pagkabanhaw: Tungod ni Jesukristo, ang tanan mabanhaw. Ang espiritu ug lawas mahiusa pag-usab, ug matag tawo mabuhi hangtod sa kahangtoran diha sa nahingpit, nabanhaw nga lawas.
Paghukom: Ang tanan dalhon ngadto sa presensiya sa Dios aron pagahukman. Si Jesukristo mao ang atong maghuhukom.
Mga Gingharian sa Himaya: Gawas sa diyotay ra kaayo nga mga eksepsiyon, ang tanan sa mga anak sa Dios makapanunod og usa ka gingharian sa himaya. Kining tulo ka gingharian gitawag og ang celestial, terrestrial, ug telestiyal nga gingharian. Kon kita matinud-anon, makabalik kita sa pagpuyo ngadto sa presensiya sa Dios sa celestial nga gingharian ug makadawat og kahingpitan sa kalipay.
Ang Gahom sa Pagsabot sa Plano: Ang Istorya bahin ni Corianton
Si propeta Alma mihatag kanato og usa ka ehemplo kon sa unsang paagi ang usa ka mas maayo nga pagsabot sa plano sa kaluwasan makatabang kanato sa paghangop sa dalan sa Dios ngadto sa kalipay, ang dalan sa paghinulsol (tan-awa sa Alma 39–42).
Ang anak ni Alma nga si Corianton gitawag nga mouban sa iyang amahan aron sa pagsangyaw ngadto sa mga Zoramite. Apan si Corianton wala kanunay sa hustong gawi. Siya wala maminaw og maayo sa iyang amahan. Siya misupak. Siya nagmapagarbohon ug mahambogon. Ug siya nagpadala sa tentasyon ug nakabuhat og bug-at nga sekswal nga sala.
Si Alma adunay pipila ka pranka nga mga pulong alang kang Corianton mahitungod kon unsa ka bug-at iyang mga sala ug sa unsang paagi ang iyang gawi nakapabalda sa ilang mga paningkamot sa pagdala sa mga Zoramite ngadto sa paghinulsol. Apan labaw sa tanan, gitudlo ni Alma sa iyang anak nga lalaki ang mahitungod sa plano sa kaluwasan.
Si Corianton adunay pipila ka mga pangutana nga nakasamok kaniya kalabot sa ebanghelyo. Ang ubang butang nga wala niya masabti nakaaghat kaniya sa pagdepensa sa iyang kaugalingon diha sa iyang mga sala. Migahin og panahon si Alma sa pagtubag sa mga pangutana sa iyang anak pinaagi sa pagpasabot sa plano sa kaluwasan.
Si Corianton naghunahuna mahitungod sa:
-
Panagna. Nganong ang pag-anhi ni Jesukristo dugay na kaayo nga napahibalo sa wala pa kini nahitabo? Miingon si Alma nga mahinungdanon nga ang plano mapahibalo og una ug nga ang Dios makapadala og mga anghel aron sa pagpamahayag niini sa bisan kanus-a—sa wala pa o human sa pag-anhi ni Kristo. (Tan-awa sa Alma 39:15–19.)
-
Pagkabanhaw. Kanus-a man ang katawhan mabanhaw? Unsa ang anaa sa taliwala sa kamatayon ug pagkabanhaw? Gipasabot ni Alma ngadto kaniya nga ang mga tawo magsugod sa pagkabanhaw human sa Pagkabanhaw ni Jesukristo. Gitudlo usab ni Alma nga tali sa kamatayon ug pagkabanhaw, ang mga espiritu sa mga matarong moadto sa usa ka kahimtang sa kalinaw ug pagpahulay, nga iyang gitawag og paraiso. Ang mga espiritu sa daotan moadto sa usa ka dapit sa kangitngit ug pag-antos. (Tan-awa sa Alma 40:1–15.)
-
Paghinulsol. Nganong kita kinahanglan nga maghinulsol kon ang espiritu ug lawas sa tanan ipahiuli pinaagi sa pagkabanhaw? Gipasabot ni Alma ngadto kaniya nga ang tanang katawhan mabanhaw ug hukman sumala sa ilang mga binuhatan. Kon sila nagbuhat og maayo ug nagtinguha og maayo ug naghinulsol sa ilang mga sala, sila ipahiuli ngadto sa kalipay. Kon sila nagbuhat og daotan, sila dili mapahiuli ngadto nianang sama nga kahimtang sa kalipay, tungod kay sila wala mipili niini dinhi niining kinabuhia. (Tan-awa sa Alma 41:1–15.)
-
Kaangayan ug kaluoy. Sa unsang paagi nga makiangayon alang sa Dios ang pagsilot sa katawhan alang sa ilang mga sala? Gipasabot ni Alma nga ang katawhan ipahimulag gikan sa presensiya sa Dios tungod sa pisikal nga kamatayon ug sa ilang mga sala. Ug sila ipahimulag hangtod sa kahangtoran nga dili ikauban si Jesukristo. Siya mipahinabo sa pagkabanhaw, nagbuntog sa pisikal nga kamatayon. Siya miula usab alang sa tanan natong mga sala. Apan ang Iyang maulaon nga kaluoy dili makaguba sa hustisya, mao nga ang kaluoy malugway lamang ngadto niadtong kinsa maghinulsol. Ang paghinulsol mao ang usa ka kondisyon nga Iyang gitakda aron atong madawat ang kaluoy nga anaa alang kanato tungod sa Iyang maulaon nga sakripisyo. (Tan-awa sa Alma 42:1–28.)
Busa, unsa ang nahitabo ni Corianton?
Siya gitawag pag-usab sa pagsangyaw. Maingon ta nga naminaw siya sa mga pulong sa iyang amahan mahitungod sa plano sa kaluwasan. Naghinulsol siya ug nagtinguha sa pagpakabuhi og usa ka matarong nga kinabuhi (tan-awa sa Alma 63:2).
Kita Kaha?
Kon kita kinahanglan nga maghinulsol (nga—sa tinud-anay lang—kada adlaw), mahimong maghunahuna kita bahin sa plano sa kaluwasan ug magtuon niini. Gitawag kini ni Alma og “plano sa kaluoy” (Alma 42:15). Ang Pag-ula ni Jesukristo alang sa atong mga sala nagtanyag kanato niining kaluoy—kon kita maghinulsol. Mao nga tingali kita makahunahuna sa plano isip ang “plano sa paghinulsol.”
Ang atong Langitnong Amahan gusto nga makabalik kita ngadto Kaniya, mamahimong sama Kaniya, ug makadawat og usa ka kahingpitan sa kalipay sama Kaniya. Mao kana ang tanan mahitungod sa Iyang plano. Kita mipili sa pagdawat niining plano sa wala pa kita matawo. Kita makatuman niining plano karon pinaagi sa pagbaton og hugot nga pagtuo diha ni Jesukristo, paghinulsol, ug paghimo ug pagtuman sa mga pakigsaad.